عەبدوڵڵا پەشێو
ڕۆژباش کچانی سەد ساڵ لەمەوپاش! ڕۆژباش کوڕانی سەد ساڵ لەمەوپاش! چاوەڕێم کەن وا تێنەگەن هێندە دوورم... ئەو بەڵێنەی بە ئێوەم دا هەنووکەش لە سەری سوورم چاوەڕێم کەن نابێ ناشێ نەتانبینم مەپرسن کەی مەپرسن چۆن گومان مەکەن لە زڤرینم لەوانەیە ڕۆژێ نەورۆز وەک پنجێک گیا لەسەر گردی «مەلا مەروان» بژیێمەوە ڕەنگە شەوێک لەگەڵ تیشکی برووسکەدا داپەڕمە خوار و بێمەوە بێنێک وەکوو تاپۆی ئاڵا لە بەر چاوان بشنێم لەوانەیە هەر دوای ڕێژنەبارانێکی سەربەکڵاوە لە داوێنی ئەسپیندارێک وەکوو کارگێک هەڵبتۆقم یا لە دەشتی «کاولەقەراج» شین بم وەکوو گوڵەجۆیەک یا لە گەرمەی ڕەشبەڵەکدا بترنجێمە ناو ئاپۆڕە و لەپڕ بێمە دەستی دۆیەک ڕۆژباش کچانی سەد ساڵ لەمەوپاش! ڕۆژباش کوڕانی سەد ساڵ لەمەوپاش! کە منتان دی بانگم بکەن بۆ سەر سفرەی پڕی خۆتان من دڵنیام نانی ئێوە تامی خوێن و ڕۆندک نادا با شەوێکیش بە ئارامی بنووم لەناو پێخەوتانا لەم ژینەدا هەرچەند گەڕام بە دنیادا پێخەوی من یا کەڵەکی سەر شەپۆل بوو یا لکێک دار لەبەردەمی ڕەشەبادا! لێم گەڕێن جارێک لە چەقی ڕێگە بە ڕۆژی ڕووناک لە ترس ڕەها لە تانە بێباک تێر ئاوێزانی کچەکوردێک بم هەناسەی بۆنی نێرگزی لێ بێ بەری دەستیشی تام و بۆنی خاک ڕۆژباش کچانی سەد ساڵ لەمەوپاش! ڕۆژباش کوڕانی سەد ساڵ لەمەوپاش! تکا دەکەم بۆ ئەو ڕۆژە ڕۆژی زڤرین یا داپەڕین ڕۆژی شینبوون یا هەڵتۆقین پەساپۆرتێک بۆ من دانێن گرینگ نییە! با ئەستوور بێ یا تەنکۆکە با لاکێش بێ یا چوارگۆشە... گرینگ نییە! چۆنی دەڵێن با ئاوا بێ: زەرد بێ سوور بێ شین بێ مۆر بێ یا ڕەشێکی وەک قەتران بێ... لەم ژینەدا بە حەسرەت بووم تەنیا ڕۆژێک پێناسێکی زێدی خۆمم لە گیرفان بێ! ڕۆژباش کچانی سەد ساڵ لەمەوپاش! ڕۆژباش کوڕانی سەد ساڵ لەمەوپاش!
Rojbaş Kiçanî sed sal lemewpaş! Rojbaş Kuranî sed sal lemewpaş! Çawerêm ken Wa tênegen hênde dûrim... Ew belêney be êwem da Henûkeş le serî sûrim Çawerêm ken Nabê Naşê netanbînim Mepirsin key Mepirsin çon Guman meken le zivrînim Lewaneye Rojê newroz wek pincêk gya Leser girdî «mela merwan» bijyêmewe Renge şewêk Legel tîşkî birûskeda Daperme xwar û bêmewe Bênêk wekû tapoy ala Le ber çawan bişnêm Lewaneye Her dway rêjnebaranêkî serbeklawe Le dawênî espîndarêk Wekû kargêk helbitoqim Ya le deştî «kawleqerac» Şîn bim wekû gulecoyek Ya le germey reşbelekda Bitirincême naw apore û Lepir bême destî doyek Rojbaş Kiçanî sed sal lemewpaş! Rojbaş Kuranî sed sal lemewpaş! Ke mintan dî Bangim biken Bo ser sifrey pirî xotan Min dilnyam Nanî êwe tamî xwên û rondik nada Ba şewêkîş be aramî Binûm lenaw pêxewtana Lem jîneda herçend geram be dinyada Pêxewî min Ya kelekî ser şepol bû Ya likêk dar leberdemî reşebada! Lêm gerên carêk Le çeqî rêge be rojî rûnak Le tirs reha le tane bêbak Têr awêzanî kiçekurdêk bim Henasey bonî nêrgizî lê bê Berî destîşî tam û bonî xak Rojbaş kiçanî sed sal lemewpaş! Rojbaş kuranî sed sal lemewpaş! Tika dekem Bo ew roje Rojî zivrîn ya daperîn Rojî şînbûn ya heltoqîn Pesaportêk bo min danên Girîng nîye! Ba estûr bê ya tenkoke Ba lakêş bê ya çwargoşe... Girîng nîye! Çonî delên ba awa bê: Zerd bê Sûr bê Şîn bê Mor bê Ya reşêkî wek qetran bê... Lem jîneda be hesret bûm Tenya rojêk Pênasêkî zêdî xomim le gîrfan bê! Rojbaş kiçanî sed sal lemewpaş! Rojbaş kuranî sed sal lemewpaş!