عەبدوڵڵا پەشێو
لەم نیشتمانە چارەڕەشەدا چیتان هێشتووە دابەشی نەکەن وەک ڕەزی خۆتان؟ هەر بە شەهیدان سەرمان بڵند بوو ئەوانیشتان کرد بە پەزی خۆتان! ناوێرم قەڵەمێک هەڵگرم ناوێرم کراسێک لەبەر کەم ڕووتان ڕەش بێ خۆ ڕەنگەکانیشتان بەش کرد! بڵێم خوێندکار یا قوتابی؟ ژن یا ئافرەت؟ ڕووتان ڕەش بێ تا وشەی ناو فەرهەنگەکانیشتان بەش کرد! دوو کەناری جاویدانی خانی و حاجی قادرتان بەش کرد خاک و ئاو و ئاگرتان بەش کرد کوا؟ چیتان هێشت؟ کوا؟ کێتان هێشت؟ بگرە قەحپە و دز و ڕێگرتان بەش کرد وەک زڕتەکی گاکۆژبەدەست نیشتمانێکتان کرد بە دوو شار بە شار گوند بە گوند گەڕان لە هەر ماڵێک ئاگردانێکتان کرد بە دوو خەڵک مێژوویەکی هەیە ئێمە دوو مێژوومان هەیە هەموو دنیا یەک سەرکردەی لێ بەڵایە ئێمە لەویش دوومان هەیە! گەورەینە! لە سایەتان بەعس لەناو دەمماندا زمانێکە دەگەڕێ بەعس کەڵەگایەکە سبەینە و ئێواران لە ئاوەزمان دەپەڕێ! کێ بێ بەعس نەناسێ؟ تا دوێنێ هەتیوێک بوو زەلامکوژ، زلحۆرت، جرپن لە سای سەرتان هاتەوە هاتەوە و کەس نایبینێ وەکوو تارمایی مردن لێمان بوو بە «تی ئێن تی» چووە ناو سەفتەی دینار لەگەڵمان دێتە سەر خوان جێمان لەگەڵ بەش دەکا و لەگەڵمان دەچێتە ژوان! لەناو مانشێتی ڕۆژنامەکاندا بەعس دەبێنم لەناو مەوکیبی سەرکردەکاندا بەعس دەبێنم لە ففتی ففتی ناو پەرلەماندا بەعس دەبێنم لە دیل کوشتن و بەرائەت پێدان لە زەنگ لێدان و دەرگەلێدانی نیوەشەواندا بەعس دەبینم لە سایەی ئێوە ئەوا چاوێکم شایی دەگێڕێ چونکە چاوەکەی ترم ڕژاوە لە سایەی ئێوە وا دەمارێکم شاگەشکە بووە چونکە دەماری برای بڕاوە لە سایەتان ئەمڕۆ لە شارە دیلەکەم جەمەدانی پێشمەرگەیێک ساڵەهای ساڵ تاج لەسەرێک زۆر نەماوە لەبەر چاوم ببێ بە خوودەی عەسکەرێک! ئەوەی دەیبینین چما تازەیە؟ کاتژمێرێکە سی ساڵی خشتە قورمیش کراوە بێ کەڵکە سەد جار پێش و پاش خرێ چرکە چرکەکەی شفرەی مردنە لەعنەتژمێرە ناوەستێ مەگەر ورد و خاش کرێ! زەنگ لێ دەدەم کاستان دەکەم پڕ بە گەروو دەقیژێنم لە زۆنگاوان شەپۆل دەخەمە سەر پاشوو هەوای مەییوو دەوڕووژێنم دڕک لە چاوتان ڕادەکەم تا خەو لە چاوتان بتارێ خوێ دەکەمە ناو برینتان هەتا بێتە سوێ بە جارێ لێ ناگەڕێم لێ ناگەڕێم لێ ناگەڕێم ئەو زامانەش ئارام بگرن کە ساڕێژن یا بێئێشن هەستن مەنوون ئێمە لە ناو پەیتوونێکین دوو هەسپی کوێر ڕایدەکێشن
Lem nîştimane çarereşeda Çîtan hêştuwe dabeşî neken wek rezî xotan? Her be şehîdan serman bilind bû Ewanîştan kird be pezî xotan! Nawêrim qelemêk helgirim Nawêrim kirasêk leber kem Rûtan reş bê Xo rengekanîştan beş kird! Bilêm xwêndikar ya qutabî? Jin ya afret? Rûtan reş bê Ta wişey naw ferhengekanîştan beş kird! Dû kenarî cawîdanî Xanîw hacî qadirtan beş kird Xakû awû agir itan beş kird Kwa? çîtan hêşt? Kwa? kêtan hêşt? Bigre qehpew dizû rêgirtan beş kird Wek zirtekî gakojbedest Nîştimanêktan kird be dû Şar be şar gund be gund geran Le her malêk agir idanêktan kird be dû Xelk mêjûyekî heye Ême dû mêjûman heye Hemû dinya yek serkirdey lê belaye Ême lewîş dûman heye! Gewreyne! le sayetan Be’is lenaw demmanda zimanêke degerê Be’is kelegayeke Sibeynew êwaran le awezman deperê! Kê bê be’is nenasê? Ta dwênê hetîwêk bû zelamkuj, zilhorit, cirpin Le say sertan hatewe Hatewew kes naybînê Wekû tarmayî mirdin Lêman bû be «tî ên tî» Çuwe naw seftey dînar Legelman dête ser xwan Cêman legel beş dekaw Legelman deçête jwan! Lenaw manşêtî rojnamekanda Be’is debênim Lenaw mewkîbî serkirdekanda Be’is debênim Le fiftî fiftî naw perlemanda Be’is debênim Le dîl kuştnû bera’et pêdan Le zeng lêdanû dergelêdanî nîweşewanda Be’is debînim Le sayey êwe Ewa çawêkim şayî degêrê Çunke çawekey tirim rijawe Le sayey êwe wa demarêkim şageşke buwe Çunke demarî biray birawe Le sayetan emro le şare dîlekem Cemedanî pêşmergeyêk Salehay sal tac leserêk Zor nemawe leber çawim Bibê be xûdey ’eskerêk! Ewey deybînîn çima tazeye? Katjimêrêke sî salî xişte qurmîş kirawe Bê kelke sed car pêşû paş xirê Çirke çirkekey şifrey mirdine Le’netjimêre Nawestê meger Wirdû xaş kirê! Zeng lê dedem Kastan dekem Pir be gerû deqîjênim Le zongawan Şepol dexeme ser paşû Heway meyyû dewrûjênim Dirk le çawtan radekem Ta xew le çawtan bitarê Xwê dekeme naw birîntan Heta bête swê be carê Lê nagerêm Lê nagerêm Lê nagerêm ew zamaneş aram bigirin Ke sarêjin ya bê’êşin Hestin Menûn Ême le naw peytûnêkîn Dû hespî kwêr raydekêşin