عەبدوڵڵا پەشێو
وەڕەس نابیت! لە شاخ و شار تەزبێحەکەت هەر بادەدەی دەنکەکانی دەگێڕیت و ئەویان بەمدا دەماڵیت و لەپڕ ئەمیش بەودا دەدەی! هەزار بریا من دەمزانی بەو تەزبێحە چ دەژمێری ئەو سەرانەی میرغەزەب و تەور وەشێن پەڕاندییان؟ ئەو ملانەی مل ئەستوورە دابەستەکان شکاندییان؟ یا ئەو ڕنووە درۆیانەی کۆمایەک بوون هەر هەڵیان دا بوون بە گرد و ئێستا چیان! چ دەژمێری و تەواو نابێ؟ ئەو تانکەرە ملحیزانەی میزەڵدانیان نەوتی تیایە قەتار قەتار ئاودیو دەبن هەڵتەک هەڵتەک هەر بەڕێوەن وەک تاژی ڕاو؟ چ دەژمێری؟ شیش و شۆفڵ یا سۆندەی ئاو؟ بورغی و بزمار یا قەللابە و گرێدەری بێخمەی خنکاو؟ چ دەژمێری؟ دەرگەوان و پەردەوان و ڕاپۆرتنووسە خوێنڕێژەکان یا باجگرە لە شاخ و شار دەستنێژەکان؟ چ دەژمێری؟ ئەو پێتەخت و مێتەختانەی لەملا هەر خۆت تاڵانکەر و لەولاش هەر خۆت سامانیان بووی؟ ئەو ئەنفالچی و وانەکانەی لەمسەر دوژمن لەوسەر هەر خۆت مامانیان بووی!؟ چ دەژمێری ٥٨ لوغمەکەی گارنەر؟ یا ١٤٠ قازووخەکەی پۆل برێمەر؟ ئەو دەستانەی دەمت لەجێی دەست بۆ بردن؟ ئەو پێکانەی بە سیححەتی جەللادان و قوربانییان لە یەک کاتا نۆشت کردن؟ چ دەژمێری؟ ئەو سەتانەی لە ماوەی چاوقوچانێکا دەبنە هەزار؟ یا سفری ئەو ملیۆنانەی وەکوو بەراز دەترەکێن و دەبنە ملیار؟ چ دەژمێری؟ چ دەژمێری و تەواو نابێ؟ ئەو ئاڕبیجی بەشانانەی وەکوو حوشتر یەخیان دەدەی یا سمێڵە بابڕە گەسکدەرەکان؟ هونەرمەندانی هونەرگەند؟ ڕۆشەنبیرانی فشنبیر یا نووسەرە گووسەرەکان! چ دەژمێری؟ قوڕگی گیراو؟ حەرفی خەساو؟ یا قەڵەمی لە بارەگا و دیوەخانان ماسک و دەرپێ پێ داکەنراو؟ چ دەژمێری؟ ئەو کەسانەی هەڵتدێران یا ئەوانەی لەمەودوا هەڵیاندەدەێری؟ بریا سەت بریا دەمزانی بەو تەزبێحە دەنک وردە چ دەژمێری!
Weres nabît! Le şaxû şar Tezbêheket her badedey Denkekanî degêrîtû Ewyan bemda demalîtû Lepir emîş bewda dedey! Hezar birya Min demzanî bew tezbêhe çi dejmêrî Ew seraney Mîrxezebû tewr weşên perandîyan? Ew milaney Mil estûre dabestekan şikandîyan? Ya ew rinuwe diroyaney komayek bûn Her helyan da Bûn be girdû êsta çyan! Çi dejmêrîw tewaw nabê? Ew tankere milhîzaney Mîzeldanyan newtî tyaye Qetar qetar awdîw debin Heltek heltek Her berêwen wek tajî raw? Çi dejmêrî? Şîşû şofil ya sondey aw? Burxîw bizmar Ya qellabew girêderî bêxmey xinkaw? Çi dejmêrî? Dergewanû perdewanû Raportinûse xwênrêjekan Ya bacgire le şaxû şar destinêjekan? Çi dejmêrî? Ew pêtextû mêtextaney Lemla her xot talankerû Lewlaş her xot samanyan bûy? Ew enfalçîw wanekaney Lemser dujmin Lewser her xot mamanyan bûy!? Çi dejmêrî 58 luxmekey garner? Ya 140 qazûxekey pol birêmer? Ew destaney demit Lecêy dest bo birdin? Ew pêkaney Be sîhhetî celladanû qurbanîyan Le yek kata noşt kirdin? Çi dejmêrî? Ew setaney Le mawey çawquçanêka debne hezar? Ya sifrî ew milyonaney Wekû beraz Detrekênû debne Milyar? Çi dejmêrî? Çi dejmêrîw tewaw nabê? Ew arbîcî beşananey Wekû huştir yexyan dedey Ya simêle babre geskiderekan? Hunermendanî hunergend? Roşenbîranî fişnibîr Ya nûsere gûserekan! Çi dejmêrî? Qurgî gîraw? Herfî xesaw? Ya qelemî le baregaw dîwexanan Maskû derpê pê dakenraw? Çi dejmêrî? Ew kesaney heltidêran Ya ewaney Lemewdiwa هەڵیاندەدەێری? Birya set birya demzanî Bew tezbêhe denk wirde çi dejmêrî!