فەتاح خوڕاسانە
پێش ئەوەی گزنگی هەتاو ترۆپکی چیا بنگێوێ پێش ئەوەی شنەی بەیانی بسکی بەڕەزا ببزێوێ پێش ئەوەی قاسپەی خاسەکەو لە زەرد و ما دەنگ داتەوە پێش ئەوەی بولبول بخوێنێ خونچە دەمی بکاتەوە پێش ئەوەی سیڕەی هەڵۆیان پەردەی بێدەنگی دادڕێ پێش ئەوەی چووڕە پۆپنەکی بەرەو ڕووناکی هەڵفڕێ پێش ئەوەی شەمی سەر چاکی ئاخر فرمێسکی هەڵوەرێ پێش ئەوەی گژەبای تووڕە ژیلەمۆی پەپوولە بەرێ پێش ئەوەی لاوی بەختەوەر دەم ڕاگوێزێ لەسەر خاڵان پێش ئەوەی شەوگەڕی دڵتەڕ وەڕەز بێ لە ماڵە و ماڵان پێش ئەوەی بێری شل و مل چاوی خەواڵووی هەڵبێنێ پێش ئەوەی شوان مەڕی شەوێن وەگێڕێ، بەردا دەسبێنێ پێش ئەوەی پۆلی نەشمیلان شل شل داگەڕێن بۆ کانی پێش ئەوەی سەرکانی و دەراو ژاوەی بێ لە پەری جوانی پێش ئەوەی حاجی سەلەمخۆر هەژارێک هەڵنێ بە تەماڵ پێش ئەوەی ڕێچکە ببەستن بۆ مزگەوتێ شان بەبەرماڵ پێش ئەوەی دەروێشی چڵکن پەنجەی خەلیفەی کوشیبێ پێش ئەوەی شێخ وەک تارمایی بەرەو خانەقا خوشیبێ پێش ئەوەی گزیری بەدفەڕ لە دیوەخان پاروو بادا پێش ئەوەی خاتوونێک بەناز پەردەی کۆشکی ئاغا لادا من کاوی خۆم لە کار دیوە من جەرگی زەویم دڕیوە من شیلەگەم هەڵبڕیوە من یەک سەریم ئاخنیوە من ڕیزە سواڵەم داناوە شەغرە وێنجەم پێوە داوە من گاگێرەم تێر کراوە یا خۆیانم وەرگێڕاوە هاوین و پایز و بەهار هەتاو لێی نەداوم بێکار من جووتیارم، من جووتیارم من لەگەڵ هەتاو هاوکارم من بە ئارەق و ئەو بەتین دامان ڕشتووە بناخەی ژین باسکی من و تیشکی ئەوی بژیو دەستێنن لە زەوی گەر جووتیار ئارەق نەڕێژێ گەر هەتاو تیشک ناوێژێ دانیشتووی ناو کۆشک و قەڵا دەخۆن نانی گەڵا گەڵا؟ بەڵام حەیف ئێستاش لێرە من برسیم و کەسێک تێرە نە قەت ئارەقی ئەسڕیوە نە قەت گەوزی هەڵبڕیوە نە مەچەکی جەمام بووە نە چۆڵەمەی لە جێ چووە نە ئەنگوستی ڕاگیراوە نە داسوو لە چاوی داوە نە دڵی پێی دڕدڕ بووە نە بنهەنگڵی خڕ بووە نە کەفی دەردا بە کڵۆ نە پەنجەی دەری کرد دڵۆ نە دەستی پاشبارەی ناسی نە ساوێکی دا لە داسی نە بەگەرما داهێزاوە نە خەوی لە چاوی زاوە نە بەسەرمایە تەزیوە نە لە کای پایز خزیوە نە نووسەکەی پێوە نووسا نە لەبەر بارانێ خووسا نە زوقمی بەسەردا باری نە لە قوڕدا کەوت باری نە دی شەو و شەونخوونی نە چێشتی دەردی نەبوونی تا کەی وا بم، تا کەی وا بم دەس بەتاڵ و ڕەنج بە با بم تاکەی ڕەنجی شان و پیلم بۆ دوژمن بێ، بۆ من دیلم؟ نا نا، تازە ڕاپەڕیوم ناتوانن بدەن فریوم ڕێبازی شۆڕش بەرنادەم مەودا بە داگیرکەر نادەم لە شان و باهۆی خۆم ڕادی هەڵگرم ئاڵای ئازادی
Pêş ewey giznigî hetaw tiropkî çya bingêwê Pêş ewey şiney beyanî biskî bereza bibzêwê Pêş ewey qaspey xasekew le zerdû ma deng datewe Pêş ewey bulbul bixiwênê xunçe demî bikatewe Pêş ewey sîrey heloyan perdey bêdengî dadrê Pêş ewey çûre popnekî berew rûnakî helfirê Pêş ewey şemî ser çakî axir firmêskî helwerê Pêş ewey gijebay tûre jîlemoy pepûle berê Pêş ewey lawî bextewer dem ragwêzê leser xalan Pêş ewey şewgerî dilter werez bê le malew malan Pêş ewey bêrî şilû mil çawî xewalûy helbênê Pêş ewey şwan merî şewên wegêrê, berda desbênê Pêş ewey polî neşmîlan şil şil dagerên bo kanî Pêş ewey serkanîw deraw jawey bê le perî cwanî Pêş ewey hacî selemxor hejarêk helnê be temal Pêş ewey rêçke bibestin bo mizgewtê şan bebermal Pêş ewey derwêşî çilkin pencey xelîfey kuşîbê Pêş ewey şêx wek tarmayî berew xaneqa xuşîbê Pêş ewey gizîrî bedfer le dîwexan parû bada Pêş ewey xatûnêk benaz perdey koşkî axa lada Min kawî xom le kar dîwe min cergî zewîm dirîwe Min şîlegem helbirîwe min yek serîm axnîwe Min rîze swalem danawe şexre wêncem pêwe dawe Min gagêrem têr kirawe ya xoyanim wergêrawe Hawînû payzû behar hetaw lêy nedawim bêkar Min cûtyarim, min cûtyarim min legel hetaw hawkarim Min be areqû ew betîn daman riştuwe binaxey jîn Baskî minû tîşkî ewî bijîw destênin le zewî Ger cûtyar areq nerêjê ger hetaw tîşk nawêjê Danîştûy naw koşkû qela dexon nanî gela gela? Belam heyf êstaş lêre min birsîmû kesêk têre Ne qet areqî esrîwe ne qet gewzî helbirîwe Ne meçekî cemam buwe ne çolemey le cê çuwe Ne engustî ragîrawe ne dasû le çawî dawe Ne dilî pêy dirdir buwe ne binhengilî xir buwe Ne kefî derda be kilo ne pencey derî kird dilo Ne destî paşbarey nasî ne sawêkî da le dasî Ne begerma dahêzawe ne xewî le çawî zawe Ne besermaye tezîwe ne le kay payz xizîwe Ne nûsekey pêwe nûsa ne leber baranê xûsa Ne zuqmî beserda barî ne le qurda kewt barî Ne dî şewû şewnxûnî ne çêştî derdî nebûnî Ta key wa bim, ta key wa bim des betalû renc be ba bim Takey rencî şanû pîlim bo dujmin bê, bo min dîlim? Na na, taze raperîwim natwanin biden firîwim Rêbazî şorş bernadem mewda be dagîrker nadem Le şanû bahoy xom radî helgirim alay azadî