عەبدوڵڵا پەشێو
سەدان ساڵە لە وێرانەماڵی خۆمدا کتکەکۆرەی گۆشەی متبەقی سوڵتانم سەدان ساڵە حەوش و بەرەی خۆم واڵایە و لەبەر دەرگەی دزانی خۆم پاسەوانم سەدان ساڵە ڕۆژێک دەبم بە مەیتەری والیی بەغدا ڕۆژێک لە تاران کوتاڵم ڕۆژێک لفکەم پشتی ژنی سوڵتان دەشۆم ڕۆژێک گەسکم شام دەماڵم سەدان ساڵە وەکوو چنگێک دانەوێڵە ئاشی مێژوو فڕێی داوم هەر چوار دەورم شارۆچکەیە و مێروولە دەمیان تێ ناوم سەدان ساڵە کاسەسەرم منارەیە کێ بێ، دەنگی تیا هەڵدەبڕێ سەدان ساڵە نیشتمانم نێرگەلەیە کێ بێ، بە دەمیەوەی دەگرێ سەدان ساڵە لەبەر دەگەی تەکیەی جیهان جووتێک سۆلی پینەپینەم کێ لە پێم کا بۆ ئەو دەشێم سەدان ساڵە دوای تڵیشێ فڕێ دەدرێم سەدان ساڵە دوای پینەیێک لە پێ دەکرێم من پشتێکی بریندارم لە قامچیی خۆم ڕاپەریوم من لافاوێکی لاسارم لەو کەنارانە هەڵساوم کە تەنگیان پێ هەڵچنیوم نانیشمەوە، نانوومەوە بێ ئارامم ئارامی من، چرایەک بوو ڕەشەبای دەورم خوێنی ڕشت بێبەزەییم بەزەیی من دەریایەک بوو دەمیان پێوەنا و هەڵیانمشت نانیشمەوە، نانوومەوە کە من دان بم، کوا دەرفەت؟ یا من یا مێروو کە من خوێن بم کوا دەرفەت؟ یا من یا زێروو قەحپەن ئەوانەی پێم دەڵێن دان و مێروو برای یەکن قەحپەن ئەوانەی پێم دەڵێن خوێن و زێروو برای یەکن قەحپەن ئەوانەی پێم دەڵێن ماسی و چنگاڵ مشک و جەواڵ دەست و چزوو برای یەکن قەحپەن ئەوانەی پێم دەڵێن پەت و گەردن گوێزان و موو برای یەکن وەرن خەڵکە لە نێچیر و زام بپرسن بڵێن توخوا خەنجەر هەیە زام تیمار کا؟ ڕاوچی هەیە نێچیر نەخوا؟ دە خەڵکە، لە کا بپرسن قەت ئاگری ساردی دیوە؟ لە هێلانەی مەل بپرسن بەنیازی ماچ، قەت مار دەمی تێ ژەنیوە؟ دە لە دار بەڕوو بپرسن تەوری دیوە داربڕ نەبێ؟ دە لە کەرێکیش بپرسن گورگی دیوە کەردڕ نەبێ؟ قەحپەن ئەوانەی پێم دەڵێن ماری شیرین ژاریش هەیە قەحپەن ئەوانەی پێم دەڵێن تەوری برای داریش هەیە من پشتێکی بریندارم لە قامچیی خۆم ڕاپەڕیوم من لافاوێکی لاسارم لەو کەنارانە هەڵساوم کە تەنگیان پێ هەڵچنیوم نانیشمەوە نانوومەوە بێ ئارامم ئارامی من، چرایەک بوو ڕەشەبای دەورم خوێنی ڕشت بێ بەزەییم بەزەیی من زەریایەک بوو بینیان پێوەنا و هەڵیانمشت
Sedan sale Le wêranemalî xomda kitkekorey goşey mitbeqî sultanim Sedan sale Hewşû berey xom walayew leber dergey dizanî xom pasewanim Sedan sale Rojêk debim be meyterî walîy bexda Rojêk le taran kutalim Rojêk lifkem piştî jinî sultan deşom Rojêk geskim şam demalim Sedan sale Wekû çingêk danewêle Aşî mêjû firêy dawim Her çwar dewrim şaroçkeyew mêrûle demyan tê nawim Sedan sale Kaseserim minareye kê bê, dengî tya heldebrê Sedan sale Nîştimanim nêrgeleye kê bê, be demyewey degrê Sedan sale Leber degey tekyey cîhan cûtêk solî pînepînem kê le pêm ka bo ew deşêm Sedan sale Dway tilîşê firê dedrêm Sedan sale Dway pîneyêk le pê dekirêm Min piştêkî birîndarim Le qamçîy xom raperîwim Min lafawêkî lasarim Lew kenarane helsawim Ke tengyan pê helçinîwim Nanîşmewe, nanûmewe Bê aramim Aramî min, çirayek bû Reşebay dewrim xwênî rişt Bêbezeyîm Bezeyî min deryayek bû Demyan pêwenaw helyanmişit Nanîşmewe, nanûmewe Ke min dan bim, kwa derfet? Ya min ya mêrû Ke min xwên bim kwa derfet? Ya min ya zêrû Qehpen ewaney pêm delên Danû mêrû biray yekin Qehpen ewaney pêm delên Xwênû zêrû biray yekin Qehpen ewaney pêm delên Masîw çingal Mişkû cewal Destû çizû biray yekin Qehpen ewaney pêm delên Petû gerdin Gwêzanû mû biray yekin Werin xelke Le nêçîrû zam bipirsin Bilên tuxwa Xencer heye zam tîmar ka? Rawçî heye nêçîr nexwa? De xelke, le ka bipirsin Qet agir î sardî dîwe? Le hêlaney mel bipirsin Benyazî maç, qet mar demî tê jenîwe? De le dar berû bipirsin Tewrî dîwe darbir nebê? De le kerêkîş bipirsin Gurgî dîwe kerdir nebê? Qehpen ewaney pêm delên Marî şîrîn jarîş heye Qehpen ewaney pêm delên Tewrî biray darîş heye Min piştêkî birîndarim Le qamçîy xom raperîwim Min lafawêkî lasarim Lew kenarane helsawim Ke tengyan pê helçinîwim Nanîşmewe Nanûmewe Bê aramim Aramî min, çirayek bû Reşebay dewrim xwênî rişt Bê bezeyîm Bezeyî min zeryayek bû Bînyan pêwenaw helyanmişit