میدیا حوسێن
سیروان دەخیلە ئاگر دەبارێ شەپۆلێ بە گوڕ بهاوە جارێ ڕەشماڵانی جاف هۆبەی دەشت و دەر کەوای پوولەکەی گڕیان کردە بەر بەرداشی ئاشی ئاشووبی گەردوون بە ناخی کوردا کەوتە هاتوچوون شیوەن دەگێڕێ دایک لە هەردا قوڕ دەگرێتەوە بیکا بە سەردا زریکەی ساوای مەلۆتکەکراو دێ لە نێو ماڵ و حاڵی بەجێماو ئاگر لە دەوری لانک بەربووە ئاسمان هەناوی کوناودەر بووە مناڵ پشتوێنی باوکی توند دەگرێ باوک بە ڕێوە ئەکەوێ، ئەمرێ لەولاوە خوشک دەیەوێ ڕاکا خوەی بە قوربانی باوک و برا کا ئەو پێڕاناگا یەخەی خوەی بدڕێ چۆلەکەی گیانی بۆ ئاسمان ئەفڕێ قەتارەی خێڵی وێڵی کۆڵ بە کۆڵ بەرد وە دەنگ دێنێ ئەم دۆڵا و ئەو دۆڵ ئەم پێی زامارە لە کۆڵی ئەوا ئەو چۆک دادەدات لە نیوەی ڕەوا زەڵم بە پەرۆش سیروانە ڕێگەی بەڵام باخی میر سووتانە جێگەی سیروان دەخیلە دەشتی شارەزوور سەوزی دەپۆشی هەڵگەڕا بە سوور دەمی بەهارە جەژنی دەشت و کۆ بۆ لەبار بچێ نێرگز و شەوبۆ کام دار کام دەوەن کام چڵە گیایە ئەمێستا پچەک هەناسەی تیایە؟ دوندی شەمێران هەواری هەڵگورد پرسە دەگێڕێ بۆ ئەم حاڵەی کورد ترۆپکی چڕی شاخی هەورامان بە دووکەڵ ئامان لە خوێنا دامان چیای شەراب و کەژی ئاسەوەر غەرقی خەردەڵن پێ تا تەوقی سەر شیوی دەرەقووڵ چەمی خواجایی بسکی خۆ دەڕنن لەتاو کیمایی چەم و جۆباری پڕ مرواریم ڕۆ سروشتی جوانی کوردەواریم ڕۆ خاکی بەراو و مێرگی شینم ڕۆ مەندیلی کەژی بلوورینم ڕۆ بناری چڕی دارستانم ڕۆ بێستانی وشکی کوردستانم ڕۆ جۆلانەی داری قەدپاڵانم ڕۆ هەزاران خەونی مناڵانم ڕۆ بەهەشت و قیبلەی دڵدارانم ڕۆ جێ ڕازونیازی نازدارانم ڕۆ سیاچەمانە و لەنجە گیانم ڕۆ قاڕەی مێگەل و هۆرەی شوانم ڕۆ خانەقا و تەکیەی باپیرانم ڕۆ لانکەی عارف و شاعیرانم ڕۆ ئاسمان دەخیلە بارانێ داکە خەڵک شپرزە و گەلێ هیلاکە گەر ڕۆژی حەشرە و مەرگە و کۆتایی ئێمەش ئامادەین بۆ ماڵئاوایی بەڵام وا تازە خەڵکی لە ژینا دەگەڕێن بە ناو کەونی بەرینا بۆ دەبێ ئێمە لە بستە خاکێ هەموودەم ڕەو کەین لە دەس زووحاکێ سیروان دابەستەی خاکی چەند ساڵە چاوی بێخەوی مێژووی ئەم حاڵە بەخوڕ داگەڕێ بە گەرمەسێرا بە ناو کەندەڵان بە خاکی سوێرا هەڕەشەی گڕ و ئاسن بنێرە زەعامەت لەوێ و ڕاپەڕین لێرە شاری شەهیدان شاکاری خۆشی تارای پیرۆزی شۆڕشی پۆشی ئەم خاکە خاکی کوردی دلێرە بێشەی پڵنگە و جەنگەڵی شێرە هەر کوردزوبانێ لەم گەلە تیاچێ دڵۆپێ خوێنی بەفیڕۆ ناچێ خوێنم خەڵاتی ئاڵای سوور ئەکەم بۆ هێرۆشیمای شارەزوورەکەم
Sîrwan dexîle agir debarê Şepolê be gur bihawe carê Reşmalanî caf hobey deştû der Keway pûlekey giryan kirde ber Berdaşî aşî aşûbî gerdûn Be naxî kurda kewte hatuçûn Şîwen degêrê dayk le herda Qur degrêtewe bîka be serda Zirîkey saway melotkekiraw Dê le nêw malû halî becêmaw Agir le dewrî lank berbuwe Asman henawî kunawder buwe Minal piştiwênî bawkî tund degrê Bawik be rêwe ekewê, emrê Lewlawe xuşk deyewê raka Xwey be qurbanî bawkû bira ka Ew pêranaga yexey xwey bidrê Çolekey gyanî bo asman efrê Qetarey xêlî wêlî kol be kol Berd we deng dênê em dolaw ew dol Em pêy zamare le kolî ewa Ew çok dadedat le nîwey rewa Zelim be peroş sîrwane rêgey Belam baxî mîr sûtane cêgey Sîrwan dexîle deştî şarezûr Sewzî depoşî helgera be sûr Demî behare cejnî deştû ko Bo lebar biçê nêrgzû şewbo Kam dar kam dewen kam çile gyaye Emêsta piçek henasey tyaye? Dundî şemêran hewarî helgurd Pirse degêrê bo em haley kurd Tiropkî çirî şaxî hewraman Be dûkel aman le xwêna daman Çyay şerabû kejî asewer Xerqî xerdeln pê ta tewqî ser Şîwî dereqûl çemî xwacayî Biskî xo dernin letaw kîmayî Çemû cobarî pir mirwarîm ro Siruştî cwanî kurdewarîm ro Xakî berawû mêrgî şînim ro Mendîlî kejî bilûrînim ro Binarî çirî daristanim ro Bêstanî wişkî kurdistanim ro Colaney darî qedpalanim ro Hezaran xewnî minalanim ro Beheştû qîbley dildaranim ro Cê razunyazî nazdaranim ro Syaçemanew lence gyanim ro Qarey mêgelû horey şwanim ro Xaneqaw tekyey bapîranim ro Lankey ’arfû şa’îranim ro Asman dexîle baranê dake Xelk şipirzew gelê hîlake Ger rojî heşrew mergew kotayî Êmeş amadeyn bo mal’awayî Belam wa taze xelkî le jîna Degerên be naw kewnî berîna Bo debê ême le biste xakê Hemûdem rew keyn le des zûhakê Sîrwan dabestey xakî çend sale Çawî bêxewî mêjûy em hale Bexur dagerê be germesêra Be naw kendelan be xakî swêra Hereşey girû asin binêre Ze’amet lewêw raperîn lêre Şarî şehîdan şakarî xoşî Taray pîrozî şorşî poşî Em xake xakî kurdî dilêre Bêşey pilingew cengelî şêre Her kurdizubanê lem gele tyaçê Dilopê xwênî befîro naçê Xwênim xelatî alay sûr ekem Bo hêroşîmay şarezûrekem