هۆمەر نۆریاوی
بە کوێری دائەنیشم ڕوو لە دەرگا دەرگایەکی کراوە بەسەر ئەڵقەڕێزی ژەنگگرتووی ساڵە داخراوەکانا پشت لە وێنەی گەنجێتیی خۆم بەقەد دیوارە خۆڵەمێشییەکەوە فززەم لە دەم نایەتە دەر تا گوڵم بۆ دێ لە خزمەت تۆوە خۆم بە خەیاڵێکەوە سەرقاڵ کردووە کەس بە پوولێ نایکڕێ خووم بە شتێکەوە گرتووە کاڵفامیی نەبێ هیچی تری لێ شین نابێ دەست لەو ئاوریشمی خەیاڵ و خووەش هەڵناگرم تا گوڵم بۆ دێ لە خزمەت تۆوە هەر بۆ دڵنەوایی نەورەس ئەڵێم دەریا جوانە بۆ کات لەپێکردن پیاسەی نێو دارستان ئەکەم بە گاڵتەجاڕییەوە لە درەوشانەوەی ئەستێرە ئەدوێم بەڵام هەر بە ڕاستیی چاوم بەسەر تەمەوە ئەبڵەق ئەبێ تا گوڵم بۆ دێ لە خزمەت تۆوە غەمگینە یان نا ئەو گۆرانییە چ کارم پێی نییە ئەمباتە سەر کوێ ئەم ڕاستە شەقامە کێشە نییە لە هەر شوێنێ بێ لا ئەدەم گرنگ ئەوەیە لە جێیەک چاوەڕێ بم تا گوڵم بۆ دێ لە خزمەت تۆوە تەکلیفی باران ناشکێنم بە ڕۆحێکی تەنکەوە ئەچمە ناوەڕاستی کۆڵان و بەدەم گەمەکردنەوە ختووکەی دڵۆپەکانی ئەدەم لەگەڵ باریندا بە نازێکەوە ڕاوم ئەنێ ڕا ئەکەم تەڕ تەڕ ڕا ئەکەم ناوەستم چۆڕەچۆڕ ناوەستم تا گوڵم بۆ دێ لە خزمەت تۆوە گڵۆپێ لە خۆم کزتر دائەگیرسێنم کتێبێ لە خۆم مەلوولتر ئەگرم بە دەستەوە کورسییەک لە خۆم ماندووتر ڕائەکێشم وەک قوتابی تەممەڵ خۆم ئەخافڵێنم وەک بازرگانی مایەپووچ داڵغە لێئەدەم وەک سەربازی دیل سەرکز و زەلیل دادەنیشم تا گوڵم بۆ دێ لە خزمەت تۆوە سووک و ئاسان تارمایی سەوزی خەیاڵێ چەکم ئەکا و لۆژلۆژ پشت ئەکەمە دوژمن لەچاوترووکانێکا لە خوێنا ئەخووسێمەوە و هەر ئاوڕێکیش نادەمەوە بەدەم چاوەڕوانییەکی لێڵەوە بەچۆکا دێم تا گوڵم بۆ دێ لە خزمەت تۆوە ئەم سپێدە نوورانییە بە عەتری پژاوی سەر سینگییەوە لەگەڵ خۆی ئەمباتەوە سەر سفرەی بۆنخۆشی یەکەم بەیانیی جەژن ئەو دەمەش وەک منداڵ خیشم کردووە و لە سووچێکدا گرمۆڵە بووم تا گوڵم بۆ دێ لە خزمەت تۆوە ئەچمە بالکۆنە لێو تەزیوە قژ تەڕەکە لەوێوە شەقامێکی خەوتوو تا ئەوسەری کاڵبوونەوە لە گلێنەمەوە سەر ئەکا جودان؛ ئەمشەو هەموو شتەکان وەک شێتبوونی من جودان پێکەکەم لەسەر لێواری داڵغەیەک دائەنێم و ورتە ورت گۆرانی ئەڵێم تا گوڵم بۆ دێ لە خزمەت تۆوە
Be kwêrî da’enîşim rû le derga Dergayekî kirawe beser elqerêzî jengigirtûy sale daxrawekana Pişt le wêney gencêtîy xom beqed dîware xolemêşîyekewe Fizzem le dem nayete der Ta gulim bo dê le xizmet towe Xom be xeyalêkewe serqal kirduwe Kes be pûlê naykirê Xûm be şitêkewe girtuwe Kalfamîy nebê hîçî tirî lê şîn nabê Dest lew awrîşmî xeyal û xuweş helnagirim Ta gulim bo dê le xizmet towe Her bo dilnewayî newres elêm derya cwane Bo kat lepêkirdin Pyasey nêw daristan ekem Be galtecarîyewe le direwşanewey estêre edwêm Belam her be rastîy çawim beser temewe ebleq ebê Ta gulim bo dê le xizmet towe Xemgîne yan na ew goranîye Çi karim pêy nîye Embate ser kwê em raste şeqame kêşe nîye Le her şwênê bê la edem Giring eweye le cêyek çawerê bim Ta gulim bo dê le xizmet towe Teklîfî baran naşkênim Be rohêkî tenkewe eçme nawerastî kolan û Bedem gemekirdinewe xitûkey dilopekanî edem Legel barînda be nazêkewe rawim enê Ra ekem ter ter ra ekem Nawestim çoreçor nawestim Ta gulim bo dê le xizmet towe Gilopê le xom kiztir da’egîrsênim Kitêbê le xom melûltir egirim be destewe Kursîyek le xom mandûtir ra’ekêşim Wek qutabî temmel xom exaflênim Wek bazirganî mayepûç dalxe lê’edem Wek serbazî dîl serkiz û zelîl dadenîşim Ta gulim bo dê le xizmet towe Sûk û asan tarmayî sewzî xeyalê çekim eka û Lojloj pişt ekeme dujmin Leçawtirûkanêka Le xwêna exûsêmewe û Her awrêkîş nademewe Bedem çawerwanîyekî lêlewe beçoka dêm Ta gulim bo dê le xizmet towe Em sipêde nûranîye be ’etrî pijawî ser sîngîyewe Legel xoy embatewe Ser sifrey bonxoşî yekem beyanîy cejin Ew demeş wek mindal xîşim kirduwe û Le sûçêkda girmole bûm Ta gulim bo dê le xizmet towe Eçme balkone lêw tezîwe qij tereke Lewêwe şeqamêkî xewtû Ta ewserî kalbûnewe le gilênemewe ser eka Cudan; emşew hemû şitekan Wek şêtbûnî min cudan Pêkekem leser lêwarî dalxeyek da’enêm û Wirte wirit goranî elêm Ta gulim bo dê le xizmet towe