مەرزیە فەریقی
ناسر ڕەزازی
هەنگەزەردە ئەبڕێ ڕێی دوور بۆ بینینی گوڵاڵەی سوور چۆن بە پێی خۆی دێ گوڵی گەش بۆ لای شوانی کەپەنکڕەش؟ نەک گوڵێک و نەک سیان و چوار چەن لە دێدا هەبێ نازدار؟! بەڵام منی شای گشت هەنگی هەردەی بەهاران بۆ بینینم خۆیان ئەگرن ڕێی دەشت، نازداران! سۆزی شمشماڵ ئەخەمە کار دەمی ئێواران پۆل بە پۆل ژن، شیردۆشی جوان، ئەکشێن بۆ ناو ڕان! هۆ شوانی بەهرەدار! تێخوڕە چاوەڕێین ئارایشت تەواوە، ئامادەی هەڵپەڕکێین! پەرۆشی ئاوازەی بەسۆزی شمشاڵین بێ سیحری فووی دەمت، بەزم و نۆش بەتاڵین هەنگەزەردە ئەبڕێ ڕێی دوور بۆ بینینی گوڵاڵەی سوور تا نەگەڕێ مێرگی بەهار دەم نانێتە ناو دەمی یار! کە مۆڵم دا مێگەلی تێر لەسەر سەوزە گیا: زەردەی هەتاو ئەگرێتە زێڕ ڕووی دەشت و چیا هەر نازدارە، بۆ هەڵپەڕکێ جۆشێ لە سەریا لە شمشاڵم ئەنێ بە ناز ڕووی نیازی جیا! حەڵقەی چۆپی لەسەر فەرشی گیای قەراغی ئاو لە بەردەمما هەڵئەپەڕێ گا گورج و گا خاو منیش چەشنی پەپوولەیەک گوڵ دایبێتە ناو کێ زۆر شۆخ بێ لەبەر پێیا ئەوەستم تاو تاو! هۆ شوانی بەختیار! تێخوڕە، درەنگە بێ شمشاڵ لە دەشتیش وەکوو ماڵ دڵ تەنگە! تێخوڕە، ئامادەین پاداشتی ئاوازە تێرت کەین لە قووتی دڵ کە جوانی و نازە! هۆنراوە: گۆران
Hengezerde ebrê rêy dûr Bo bînînî gulaley sûr Çon be pêy xoy dê gulî geş Bo lay şwanî kepenkireş? Nek gulêk û nek syan û çwar Çen le dêda hebê nazdar?! Belam minî şay gişt hengî herdey beharan Bo bînînim xoyan egirin rêy deşt, nazdaran! Sozî şimşimal exeme kar demî êwaran Pol be pol jin, şîrdoşî cwan, ekşên bo naw ran! Ho şwanî behredar! têxure çawerêyn Arayşit tewawe, amadey helperkêyn! Peroşî awazey besozî şimşalîn Bê sîhrî fûy demit, bezim û noş betalîn Hengezerde ebrê rêy dûr Bo bînînî gulaley sûr Ta negerê mêrgî behar Dem nanête naw demî yar! Ke molim da mêgelî têr leser sewze gya: Zerdey hetaw egrête zêr rûy deşt û çya Her nazdare, bo helperkê coşê le serya Le şimşalim enê be naz rûy nyazî cya! Helqey çopî leser ferşî gyay qeraxî aw Le berdemma hel’eperê ga gurc û ga xaw Minîş çeşnî pepûleyek gul daybête naw Kê zor şox bê leber pêya ewestim taw taw! Ho şwanî bextyar! têxure, direnge Bê şimşal le deştîş wekû mal dil tenge! Têxure, amadeyn padaştî awaze Têrit keyn le qûtî dil ke cwanî û naze! Honrawe: goran