یاران یادم کەن ئەی هاوار یاران یادم کەن
یادی دڵەکەی ئا توخوا نامرادم کەن
بە ویسالی یار ئەی هاوار دەمێک شادم کەن
لە بەندیخانەی ئا توخوا خەم ئازادم کەن
عیلاجی ژانی ئەی هاوار کۆنەبرینم کەن
ئاو لە دەروونی ئەی هاوار ئاگرینم کەن
یاران یادم کەن ئەی هاوار یاران یادم کەن
یادی دڵەکەی ئا توخوا نامرادم کەن
نامە بە خوێنی ئەی هاوار هەناوی بریان
بنووسن ئەمما ئا توخوا مەیدەن بە زریان
بیدەن بە شەماڵ ئەی هاوار هەناسەی پەریان
بیباتە حوزوور ئا توخوا شۆخی موکریان
بانگی تەبیبێک ئەی هاوار بۆ سەرینم کەن
سۆراغی یاری ئەی هاوار نازەنینم کەن
یاران یادم کەن ئەی هاوار یاران یادم کەن
یادی دڵەکەی ئا توخوا نامرادم کەن
یاران پێم خۆشە ئەی هاوار گۆڕم لە بان بێ
با گوێم لە قاسپەی ئا توخوا خۆشی کەوان بێ
با گوێم لە ڕازی ئەی هاوار شمشاڵی شوان بێ
با گوێم لە قاقای ئا توخوا بێریانی جوان بێ
خانەخوێی بەزمی ئەی هاوار پڕ ئەوینم کەن
نەکەن هەر بێن و ئەی هاوار گەرمەشینم کەن
یاران یادم کەن ئەی هاوار یاران یادم کەن
یادی دڵەکەی ئا توخوا نامرادم کەن