جەلال داودی
تەنیا و غەریب لە چوار ڕێیانی گەردوونا ڕاوەستاوم وەکو باوە ئادەم تەنیا لە خاکێکی ڕەش خوڵقاوم! بەهەشتی خوام لەبەر حەوا فڕێ داوە بەڵام حەوا لە دواژوانگەی بەر جەننەتی چاوەکانیا سێوی کاڵی دڵی بردم ڕۆیی و ئیتر نەهاتەوە! ئێستا، تەنیا، تەنیا، تەنیا لە شەقامە چۆڵەکانی ڕۆحی خۆمدا، سەرگەردانم! وەک شەپۆلێکی یاخیم و لە دەریای خۆم هەڵبڕاوم هیچ بەندەرێک باوەشم بۆ ناکاتەوە! ئێستا لێرە، شاعیرێکم زامەکانم دەهۆنمەوە گۆرانیبێژێکی تەنیام و لە شەوێکی بێ بواردا دەنک دەنک خەمەکانم دەنووسمەوە! وەکوو ئاوی بنی گۆمێ کە جێ مابێ لە ڕووبارێ وەکوو بەردی سەری شاخێ کە دانرابێ لە دیوارێ وەکوو کاتێ گەڵای زەردێ دەسی بەر بێ لەسەر دارێ دڵم تەنگە لە تەنیایی، نە هاوڕازێ نە خەمخوارێ من ئەو بەردەی گرفتارم کە دیلی چینی دیوارم من ئەو ئاوەی بنی گۆمم کە جێ ماوم لە ڕووبارم گەڵای زەردم، مەلی پیرم، منم دڵداری زەنجیرم لە بیرم دێ کە چەن ساڵە لە بەندیخانە یەخسیرم لە تاریکی ژیانمدا لە سووچی سەردی زیندانا بە مۆرەی نەردی ناکامی بە جارێ عومری خۆم دانا بەڵێ ئەوسا تەلارێ بووم وەلێ ئێستا وەها پیرم هەیە جارێ بەسەرهاتی خەمینی خۆم نییە بیرم
Tenya û xerîb Le çwar rêyanî gerdûna rawestawim Weku bawe adem tenya Le xakêkî reş xulqawim! Beheştî xwam leber hewa firê dawe Belam hewa Le dwajwangey ber cennetî çawekanya Sêwî kalî dilî birdim Royî û îtir nehatewe! Êsta, tenya, tenya, tenya Le şeqame çolekanî rohî xomda, sergerdanim! Wek şepolêkî yaxîm û Le deryay xom helbirawim Hîç benderêk baweşim bo nakatewe! Êsta lêre, şa’îrêkim Zamekanim dehonmewe Goranîbêjêkî tenyam û Le şewêkî bê bwarda Denk denk Xemekanim denûsmewe! Wekû awî binî gomê ke cê mabê le rûbarê Wekû berdî serî şaxê ke danrabê le dîwarê Wekû katê gelay zerdê desî ber bê leser darê Dilim tenge le tenyayî, ne hawrazê ne xemxiwarê Min ew berdey giriftarim ke dîlî çînî dîwarim Min ew awey binî gomim ke cê mawim le rûbarim Gelay zerdim, melî pîrim, minim dildarî zencîrim Le bîrim dê ke çen sale le bendîxane yexsîrim Le tarîkî jyanmida le sûçî serdî zîndana Be morey nerdî nakamî be carê ’umrî xom dana Belê ewsa telarê bûm welê êsta weha pîrim Heye carê beserhatî xemînî xom nîye bîrim