Muhammad Mamle
لە باغان ئاهـ و ناڵین دێ دەڵین شای گوڵان ڕۆیی لە مەیخانە سەدای شین دێ دەڵێن پیری موغان ڕۆیی دەڵێی دەوری فەلەک سەیری قەمەر میزانی گۆڕاوە کە وا گوڵ زەرد و سونبول تێک چوو ڕەنگی ئەرغەوان ڕۆیی لەبەر چاوی جیهانبینم جیان تاریک بوو نەمزانی نە نووری چاوەکانم چوو نە خورشیدی جیهان ڕۆیی مەڵێن بولبول مەناڵێنە کە وا گوڵ گوڵشەنی چۆڵ کرد دڵ ئارامی نەما قوربان کە ئارامی دڵان ڕۆیی سەرحەر مەستانە هات بولبول بە شادی بۆ تەوافی گوڵ کە دی باغ بێگوڵە داغ بوو بە سەد ناڵە و فوغان ڕۆیی بەهار هات غونچە پشکووت دەنگی بولبول سوو بە سوو ڕۆیی دەبێ حاڵی چ بێ بولبول بەهار زۆر پێ نەچوو ڕۆیی بە ناڵەی دڵ شیفام نایێ درێغ بۆ مەرهەمی جەرگم لە زەنگی کاروان چ بکەم دەلیلی کاروان ڕۆیی قیامەت بۆ دڵان هەستا کە چاوی مەستی وەرگێڕا مەگەر ئازوردە بووە ساقی لە بەزمی مەیکەشان ڕۆیی چ شین و ڕۆ و چ هاوارە لە نێو حەڵقەی موریداندا مەگەر خواجەی سەمەرقەندی لە نێو ساحێب دڵان ڕۆیی خرابوو خانەقا بێ شێخ و شەوقی تالیبان سەد حەیف چەمەن وێران بوو نەغمەی بولبولان چوو باغەبان ڕۆیی لە ناڵەی بولبول و قومری وەفایی بۆیە هەر دەگری گوڵێکی سەرو باڵام بوو بە تاراجی خەزان ڕۆیی هۆنراوە: وەفایی
Le baxan ah û nalîn dê delîn şay gulan royî Le meyxane seday şîn dê delên pîrî muxan royî Delêy dewrî felek seyrî qemer mîzanî gorawe Ke wa gul zerd û sunbul têk çû rengî erxewan royî Leber çawî cîhanbînim cyan tarîk bû nemzanî Ne nûrî çawekanim çû ne xurşîdî cîhan royî Melên bulbul menalêne ke wa gul gulşenî çol kird Dil aramî nema qurban ke aramî dilan royî Serher mestane hat bulbul be şadî bo tewafî gul Ke dî bax bêgule dax bû be sed nale û fuxan royî Behar hat xunçe pişkût dengî bulbul sû be sû royî Debê halî çi bê bulbul behar zor pê neçû royî Be naley dil şîfam nayê dirêx bo merhemî cergim Le zengî karwan çibkem delîlî karwan royî Qyamet bo dilan hesta ke çawî mestî wergêra Meger azurde buwe saqî le bezmî meykeşan royî Çi şîn û ro û çi haware le nêw helqey murîdanda Meger xwacey semerqendî le nêw sahêb dilan royî Xirabû xaneqa bê şêx û şewqî talîban sed heyf Çemen wêran bû nexmey bulbulan çû baxeban royî Le naley bulbul û qumrî wefayî boye her degrî Gulêkî seru balam bû be taracî xezan royî Honrawe: wefayî