Aram Mistawfi
شەکەتەنان شەکەت لالۆ دەسوو وێمۆ دەسوو شاریۆ دەسوو وەریۆ دەسوو هوایۆ دەسوو مانگێ دەسوو خودایۆ ژیانم بییەن قەرە لالۆ شەکەتەنان فرە لالۆ شەوەم شەوگاروو پاییزی ڕێوم دەیجۆروو ئازیزی نەمام وادەو گەڵا ڕێزی جەمین ماچوو ڕۆەو دێزی وشکەن هانە و دەرە لالۆ شەکەتەنان فرە لالۆ شیویان سات و مانگ و ساڵم دیویان دیسان نەحسی تاڵم مڕیان هەرد و لاق و باڵم ڕنیان جە باخ مێوەی کاڵم یانەم نیشتەن هەڕە لالۆ شەکەتەنان فرە لالۆ ساڵم یەکسەر بێ وەهارەن کەش و کۆ مات و ئەوگارەن خاکەلێوەم پەنجو تارەن هەرچی ساڵ خۆزگە وە پارەن سۆتێ وەنی و نەرە لالۆ شەکەتەنان فرە لالۆ تاریک بییەن یانەو دڵی نمەشنیۆ لام ڕووەو گوڵی قەداخەن دەنگ و بۆڵبوڵی بووڵە وەشتێنە زاوەڵی شادی نمەی بەرە لالۆ شەکەتەنان فرە لالۆ شەماڵ بییەن تۆف و زلان ڕواسی بیێنە قازی کەڵان بانگ و مزگیشان دان قەلان دیواخان بییەن یاگێ شەلان شێتخانە بییەن مەرە لالۆ شەکەتەنان فرە لالۆ هەڵۆی ئاسمانی مەردێنێ قاڵاو قسێش زلێ بیێنێ ژەرەژی خاڵێش شەردێنێ قاچێ شێریشان مەڕدێنێ وەرگێ بیێنێ وەرە لالۆ شەکەتەنان فرە لالۆ مانیا و لێوە و هەردەنان همەی پڕچن جە دەردەنان جە ژیانی دڵ سەردەنان درەختێوە پایوە مەردەنان نمەنەنم ورە لالۆ شەکەتەنان فرە لالۆ لالۆ هەوارێ چۆڵێنێ بیرێ خەمان فرە قووڵێنێ نامەردێ پیا ماقووڵێنێ ڕەفیقێ گردێ زۆڵێنێ ڕەهنەما بییەن هەرە لالۆ شەکەتەنان فرە لالۆ لالۆ ڕاو ڕاسی سەخڵەتەن بەشوو ڕاس واچی مەینەتەن وەڵادیمو سکێ شەهوەتەن دانسقەو لێمان غیرەتەن گەواد بییەن پیای سەرە لالۆ شەکەتەنان فرە لالۆ کۆن سیاچەمانە و هەواران کۆن کەپرە و تارمە و کەلاران کۆن زرمە و ناڵوو سواران کۆن گەلە پاڵوو دواران هەڵیزە بێ کەرە لالۆ شەکەتەنان فرە لالۆ کۆن گیانو ئەمن و گیانوو تۆ کۆن سەوزایی چنوور و لۆ کۆن وەرکەمەر تا کەرمێش بۆ کۆنە زامان ئاماینێ سۆ بووە کۆرە بییەن سەیرە لالۆ شەکەتەنان فرە لالۆ کۆن ترووسکە و چراوە و کەوێڵی کۆن یەکڕەنگی گردو خێڵی کۆن قەسەمو تاڵ و سوێڵی کۆن وێژدان بە جیای بەرتێڵی پاژنە بییەن سەرە لالۆ شەکەتەنان فرە لالۆ دڕودا هاڵ سەرو ڕایۆ پەنگەڵ وێش چەسپنان مایۆ ژیان دریان دەسوو وایۆ گیرمان واردەن دەسوو شایۆ بنچینە کەوت لەرە لالۆ شەکەتەنان فرە لالۆ کۆن مەولەوی واچم خاڵۆ وێش ئاسای قۆڵێ هۆرماڵۆ دەمش سەروو خاڵان ماڵۆ تۆموو عەشق و وەفای کاڵۆ بۆ بە خەمەوەرە لاڵۆ شەکەتەنان فرە لالۆ ئاخ پەی سەیدی ڕاوە بەیۆ ساتێ جە لامانۆ سیۆ کەرۆ هاوار دەم بە مەیۆ خۆ کافرستانی نیۆ بچنۆ باڵاشەرە لالۆ شەکەتەنان فرە لالۆ پەی قادری و لێفە شڕەکەیش پەی هاواری و دڵە پەڕەکەیش پەی قەڵاخوانی و دەرەکەیش پەی مەلە بەرزەفڕەکەیش کۆلەی کەرۆ گەرە لالۆ شەکەتەنان فرە لالۆ پەی عەشقەکەو جەهان ئارای چەنی خەمی وێش و نارای دڵ بە شەرەفی سپارای پەی پاییزی و خەزان وارای وەفاش کەرد بە مارە لالۆ شەکەتەنان فرە لالۆ خەڵکی پەشێو و ماتەمەن خێڵخانەی مەینەتشان جەمەن ئانە فرە بۆ، دەروون خەمەن مەردەی ئاسان ژین ئەستەمەن قەورسان بییەن مەنزەرە لالۆ شەکەتەنان فرە لالۆ ئاخ پەی مەردمەکەو جارانی وێش بدو وەروو وارانی بلۆوە هەوارو داڵانی خۆرێڵە و میشاوو هاڵانی دیسان بەسۆ کەپرە لالۆ شەکەتەنان فرە لالۆ لالۆ تووخۆدا تۆ بۆرێوە سەردەن با ئەیرەێ کەرمێوە دەورشەنە جەمێ بێمێوە سروودەو گاتای بوانمێوە واچم زاڵم بمرە لالۆ شەکەتەنان فرە لالۆ بەڵ ئاتەشگا ڕۆشنە بۆوە شەوقەش وەڵاتێ گێرۆوە تاریکی وێش بشارۆوە پنداری نیک دیسان بەیوە درۆزن بلۆ مەڕە لالۆ شەکەتەنان فرە لالۆ
Şeketenan şeket lalo Desû wêmo desû şaryo Desû weryo desû hwayo Desû mangê desû xudayo Jyanim bîyen qere lalo Şeketenan fire lalo Şewem şewgarû payîzî Rêwim deycorû azîzî Nemam wadew gela rêzî Cemîn maçû ڕۆەو dêzî Wişken hanew dere lalo Şeketenan fire lalo Şîwyan satû mangû salim Dîwyan dîsan nehsî talim Miryan herdû laqû balim Rinyan ce bax mêwey kalim Yanem nîşten here lalo Şeketenan fire lalo Salim yekser bê weharen Keşû ko matû ewgaren Xakelêwem pencu taren Herçî sal xozge we paren Sotê wenîw nere lalo Şeketenan fire lalo Tarîk bîyen yanew dilî Nimeşnyo lam ruwew gulî Qedaxen dengû bolbulî Bûle weştêne zawelî Şadî nimey bere lalo Şeketenan fire lalo Şemal bîyen tofû zilan Rwasî byêne qazî kelan Bangû mizgîşan dan qelan Dîwaxan bîyen yagê şelan Şêtxane bîyen mere lalo Şeketenan fire lalo Heloy asmanî merdênê Qalaw qisêş zilê byênê Jerejî xalêş şerdênê Qaçê şêrîşan merdênê Wergê byênê were lalo Şeketenan fire lalo Manyaw lêwew herdenan Himey pirçin ce derdenan Ce jyanî dil serdenan Dirextêwe paywe merdenan Nimenenim wire lalo Şeketenan fire lalo Lalo hewarê çolênê Bîrê xeman fire qûlênê Namerdê pya maqûlênê Refîqê girdê zolênê Rehnema bîyen here lalo Şeketenan fire lalo Lalo raw rasî sexleten Beşû ras waçî meyneten Weladîmu sikê şehweten Danisqew lêman xîreten Gewad bîyen pyay sere lalo Şeketenan fire lalo Kon syaçemanew hewaran Kon keprew tarmew kelaran Kon zirmew nalû swaran Kon gele palû dwaran Helîze bê kere lalo Şeketenan fire lalo Kon gyanu emnû gyanû to Kon sewzayî çinûrû lo Kon werkemer ta kermêş bo Kone zaman amaynê so Buwe kore bîyen seyre lalo Şeketenan fire lalo Kon tirûskew çirawew kewêlî Kon yekrengî girdu xêlî Kon qesemu talû swêlî Kon wêjdan be cyay bertêlî Pajne bîyen sere lalo Şeketenan fire lalo Diruda hal seru rayo Pengel wêş çespinan mayo Jyan diryan desû wayo Gîrman warden desû şayo Binçîne kewt lere lalo Şeketenan fire lalo Kon mewlewî waçim xalo Wêş asay qolê hormalo Demş serû xalan malo Tomû ’eşqû wefay kalo Bo be xemewere lalo Şeketenan fire lalo Ax pey seydî rawe beyo Satê ce lamano syo Kero hawar dem be meyo Xo kafiristanî nyo Biçno balaşere lalo Şeketenan fire lalo Pey qadrîw lêfe şirekeyş Pey hawarîw dile perekeyş Pey qelaxwanîw derekeyş Pey mele berzefrekeyş Koley kero gere lalo Şeketenan fire lalo Pey ’eşqekew cehan aray Çenî xemî wêşû naray Dil be şerefî siparay Pey payîzîw xezan waray Wefaş kerd be mare lalo Şeketenan fire lalo Xelkî peşêwû matemen Xêlxaney meynetşan cemen Ane fire bo, derûn xemen Merdey asan jîn estemen Qewrsan bîyen menzere lalo Şeketenan fire lalo Ax pey merdimekew caranî Wêş bidu werû waranî Bilowe hewaru dalanî Xorêlew mîşawu halanî Dîsan beso kepre lalo Şeketenan fire lalo Lalo tûxoda to borêwe Serden ba ئەیرەێ kermêwe Dewrşene cemê bêmêwe Sirûdew gatay bwanmêwe Waçim zalim bimre lalo Şeketenan fire lalo Bel ateşga roşne bowe Şewqeş welatê gêrowe Tarîkî wêş bişarowe Pindarî nîk dîsan beywe Dirozin bilo mere lalo Şeketenan fire lalo