Hasan Zyafati
هاوار هاوار هاوار هەر من ڕەنجەڕۆوە خۆم سەدان ساڵە لە وێرانەماڵی خۆمدا کتکەکوێرەی گۆشەی متبەقی سوڵتانم سەدان ساڵە حەوشوبەرەی خۆم واڵایە و لە بەر دەرکەی دزانی خۆم پاسەوانم هەر من ڕەنجەڕۆوە خۆم سەدان ساڵە وەکوو چنگێک دانەوێڵە ئاشی مێژوو فڕێی داوم هەر چوار دەورم شارۆچکەیە و مێروولە دەمیان تێ ناوم هەر من ڕەنجەڕۆوە خۆم من پشتێکی بریندارم لە قامچیی خۆم ڕاپەڕیوم من لافاوێکی لاسارم لەو کەنارانە هەڵساوم کە تەنگیان پێ هەڵچنیوم نانیشمەوە، نانوومەوە بێ ئارامم ئارامی من چرایەک بوو ڕەشەبای دەورم خوێنی ڕشت بێبەزەییم بەزەییی من زەریایەک بوو بینیان پێوەنا و هەڵیانمشت خوێڕین ئەوانەی پێم دەڵێن: دان و مێروو برای یەکن خوێڕین ئەوانەی پێم دەڵێن: خوێن و زەروو برای یەکن خوێڕین ئەوانەی پێم دەڵێن: ماسی و چەنگاڵ مشک و جەواڵ دەست و چزوو برای یەکن قەحبەن ئەوانەی پێم دەڵێن پەت و گەردن گوێزان و موو برای یەکن وەرن خەڵکە! لە نەچیر و زام بپرسن بڵێن توخودا خەنجەر هەیە زام تیمار کا؟ ڕاوچی هەیە نەچیر نەخوا؟ دە خەڵکە لە کا بپرسن قەت ئاگری ساردی دیوە؟ لە هێلانەی مەل بپرسن بەنیازی ماچ قەت مار دەمی تێ ژەنیوە!؟ دە لە داربەڕوو بپرسن تەوری دیوە داربڕ نەبێ؟ دە لە کەرێکیش بپرسن گورگی دیوە کەردڕ نەبێ!؟ قەحبەن ئەوانەی پێم دەڵێن: تەوری برای داریش هەیە قەحبەن ئەوانەی پێم دەڵێن: ماری شیرین ژاریش هەیە ساڵەهایە ساڵەهایە تەونی درۆ هەڵدەبەستن کۆسەکانی ئەم دنیایە ساڵەهایە بەقەد ئەسپێی نیفۆکانمان بەقەد ڕشکی تووکەسەرمان هەوری بەڵێن بەم خاکەدا تێدەپەڕێ و دڵۆپە بارانێ نایە ساڵەهایە بن زمانیان هەزار و یەک زوڕنای تیایە گوێتان بگرن تێ نەکەون پەیژەکەیان دەندەی ڕووتی برسییەکانە وریای سەربانەکانتان بن سەرنەکەون
Hawar hawar hawar Her min rencerowe xom Sedan sale Le wêranemalî xomda Kitkekwêrey goşey mitbeqî sultanim Sedan sale Hewşuberey xom walaye û Le ber derkey dizanî xom pasewanim Her min rencerowe xom Sedan sale Wekû çingêk danewêle Aşî mêjû firêy dawim Her çwar dewrim şaroçkeye û Mêrûle demyan tê nawim Her min rencerowe xom Min piştêkî birîndarim Le qamçîy xom raperîwim Min lafawêkî lasarim Lew kenarane helsawim Ke tengyan pê helçinîwim Nanîşmewe, nanûmewe Bê aramim Aramî min çirayek bû Reşebay dewrim xwênî rişt Bêbezeyîm Bezeyîy min zeryayek bû Bînyan pêwena û helyanmişit Xwêrîn ewaney pêm delên: Dan û mêrû biray yekin Xwêrîn ewaney pêm delên: Xwên û zerû biray yekin Xwêrîn ewaney pêm delên: Masî û çengal Mişk û cewal Dest û çizû biray yekin Qehben ewaney pêm delên Pet û gerdin Gwêzan û mû biray yekin Werin xelke! Le neçîr û zam bipirsin Bilên tuxuda Xencer heye zam tîmar ka? Rawçî heye neçîr nexwa? De xelke le ka bipirsin Qet agirî sardî dîwe? Le hêlaney mel bipirsin Benyazî maç Qet mar demî tê jenîwe!? De le darberû bipirsin Tewrî dîwe darbir nebê? De le kerêkîş bipirsin Gurgî dîwe kerdir nebê!? Qehben ewaney pêm delên: Tewrî biray darîş heye Qehben ewaney pêm delên: Marî şîrîn jarîş heye Salehaye salehaye Tewnî diro heldebestin kosekanî em dinyaye Salehaye beqed espêy nîfokanman beqed rişkî tûkeserman Hewrî belên bem xakeda têdeperê û dilope baranê naye Salehaye Bin zimanyan Hezar û yek zurnay tyaye Gwêtan bigirin tê nekewn Peyjekeyan Dendey rûtî birsîyekane Wiryay serbanekantan bin sernekewn