Abdula Pashew
وڵاخی جاران خاکی و ڕۆحسووک بوون گوێدێر و بێوەی بێ ورتە و پرتە بێ نووکەنووک بوون هاوتەویلە بوون چ نێر و چ مێ چ دێز و چ بۆز یەکسمپەروەر بوون نە ڕێوڕەچەڵەک بای تێ دەکردن نە گوڕە و هەڵڵای ئەم تیرە و ئەو هۆز چەند چنگێک کا و جۆ بەس بوو بۆ قنیات نە حەرەمسەرا و بەرتاشیان هەبوون نە میرغەزەبی تێرمووچە و بەرات نە دەستەی جێگر نە فەوجی مێگر نە مەڕلەمان و تیڤی و شاتەشات مردنەکەشیان وەک ژین سادە بوو نە شاخ و باخ و گرد بوو گڵکۆیان نە گابۆڕ دنیای پڕ دەکرد بۆیان لێ ئێستا توخمێک کەر پەیدا بووە نامووسی کەری چوارپێی بردووە! گەواڵەی مێرگ و پاوانی دنیاش بەسەریادا کا هەڵدەتۆزێنێ قنیاتی نایێ و هەر تێری ناکا ئەو توخمەکەرە چ هی ئەوبەر بێ چ هی ئەمبەرە کفرە بڵێم کەر! جانەوەرێکە سەیر و سەمەرە نە خاکی و ڕەند و مەندە وەک چوارپێ نە ئاکاریشی وەک هی بەشەرە بە جاشکۆڵەیی سۆکراتبەزێنە، زیتە، پیتۆڵە پسپۆری بۆرسە و مارکێت و مۆڵە سوپاسالارە سەرگەلەی ڕانە دەوڵەتمەدارە تا بینەقاقاش لە ڕیخ چەقیبێ شکۆی ناشکێت و داشی هەر سوارە هەور پینە کا هەواش بکێڵێ خۆی وا دەنوێنێ سەرگەرمی کارە! ئەو جانەوەرە کفرە بڵێم کەر کەربەشەرێکە سەیر و سەمەرە: بنزەویناسە نەوتپەروەرە قیبلەی بۆرییە کابەی تانکەرە لەودیو سنووران داری تێ دەبڕن لەمدیو سوڵتانە، خانە، قەیسەرە... سواری ملیۆنان زگی قۆپاو و مێشک و مینبەرە! 07/07/2016 هێلسنکی
Wilaxî caran xakîw rohsûk bûn Gwêdêrû bêwey Bê wirtew pirte Bê nûkenûk bûn Hawtewîle bûn Çi nêrû çi mê çi dêzû çi boz Yeksimperwer bûn Ne rêwreçelek bay tê dekirdin Ne gurew hellay em tîrew ew hoz Çend çingêk kaw co bes bû bo qinyat Ne heremseraw bertaşyan hebûn Ne mîrxezebî têrmûçew berat Ne destey cêgir Ne fewcî mêgir Ne merlemanû tîvîw şateşat Mirdinekeşyan wek jîn sade bû Ne şaxû baxû gird bû gilkoyan Ne gabor dinyay pir dekird boyan Lê êsta tuxmêk ker peyda buwe Namûsî kerî çwarpêy birduwe! Gewaley mêrgû pawanî dinyaş beseryada ka Heldetozênê Qinyatî nayêw her têrî naka Ew tuxmekere Çi hî ewber bê çi hî embere Kifre bilêm ker! Canewerêke seyrû semere Ne xakîw rendû mende wek çwarpê Ne akarîşî wek hî beşere Be caşkoleyî Sokiratbezêne, zîte, pîtole Pisporî borsew markêtû mole Supasalare Sergeley rane dewletmedare Ta bîneqaqaş le rîx çeqîbê Şikoy naşkêtû daşî her sware Hewr pîne ka hewaş bikêlê Xoy wa denwênê sergermî kare! Ew canewere Kifre bilêm ker Kerbeşerêke seyrû semere: Binzewînase Newtiperwere Qîbley borîye kabey tankere Lewdîw sinûran darî tê debirn Lemdîw sultane, xane, qeysere... Swarî milyonan zigî qopawû mêşkû mînbere! 07/07/2016 hêlsinkî