Sherko Bekas
«نوگرە سەلمان» ئافاتێکی قەڵاقەڵا، دووپشکێکی گەورە گەورەی کۆنکرێتی ئەشکەنجەیێکی درێژ و کڵپەیەکی بازنەیی نوگرە سەلمان ژەنگی مێژوویەکی کۆن و قوللەی زوڵمێکی زۆر دوور و مەنزڵێکی بیرچوونەوە و یادگارێ بێ پەنجەرە و تاعوونێکی خۆمەڵاسدەر لە ناو لمدا و کینە و ڕقێکی سرمدی(بەردەوام، هەمیشەیی) نوگرە سەلمان قەڵا قەڵای ئازارێکی ڕەش داگەڕاو تینوویەتییێکی ئەزەلی و پێناسەیێک بۆ ونبوون و بۆ تاریکی و شوێنێ بۆ زەمانی غەدر و جێگەیێک بۆ پیاسەی زوڵم و گاڵتەی تاوان نوگرە سەلمان لە زستانا وشکەسەرمای دەم بە گوێزان لە هاوینا گەرمایێکی پڕووکاوی گرنج گرنج جێگەیێک بۆ پشوودانی نێزەی ماندوو شوێنێ بۆ نووستنی هەوا و تا ئێوارە هەڵنەسانی نوگرە سەلمان چەند نەخشەیێکی فیراری نەخشەسازی چەند بینایەکی هەڵاتوو لە ئەندازە چەند پەتایەکی ڕاکردوو لە دەس فورات چەند پاسەوانێ لە نەسڵی گورگی ڕەسەن نوگرە سەلمان «با»یەکی نائومێد وتی: بیابان بۆ خۆی شەرم ئەکا بڵێ مێژووم بنیاتی نا تەیرێکی خۆڵاویش وتی: من شایەتم جارێک بیابان پێی وتم: من شەرم ئەکەم وەختێ نامە و هەر پۆستێکم لە ڕێی ئەمەوە پێ بگا بەردی دیوار هەموو جارێ کە پاسەوان تێپەڕ ئەبوو ئینجا ئەیوت: ئای کە بەختێکی ڕەشم بوو وەختێ نەکرام بە دیواری کتێبخانە و یان مەکتەبێ و یان خانووی شێعر و چیرۆکێ و یان بە بەردڕێژی شەقامی نێو باخێک و ئەم چارەنووسەم پێبڕا ژەکەئاوی ناو بەرمیلیش وەختێ کە پاسەوان ئەڕۆیشت ئەویش ئەیوت: ئای کە بەختێکی ڕەشم بوو نە گەنم و جۆیەک خواردمیەوە و نە چوومە ناو دووپەرداخی عاشقەوە و نە بەفرێ سەردانی کردم و من شەرمەزاری ئەم عەبدە فەقیرانەم دوای سووتانم ئەمخۆنەوە قەڵاقەڵا شەوانەش چرای بنمیچی سەر عەبدەکان وەختێ ئەیزانی بە تەنها ئەوان لەوێن ئەویش ئەیوت: ئای کە بەختێکی ڕەشم بوو لە ژوورسەری خۆشییەکا دانەگیرسام لە ژوورسەری سەمایەکا لە ژوورسەری هیوایەکا من نەمئەویست ئەم قافڵەی کۆیلانە لەسەر جێگەی دەردەداریم زەرد و ژاکاو بمبیننەوە من شەرم ئەکەم ئەیانبینم لە ژێر منا یەکە یەکە گیان ئەدەن و کەچی من دەستەوەستانم و بۆ ڕێزگرتن لەم مردنە چەند ساتێ ناکوژێمەوە! قەڵاقەڵا مردن لێرە بەرجەستەیە پێئەکەنێ و قسە ئەکا و سەیرت ئەکا و سەیری ئەکەی دەس لە دەستیەوە ئەدەیت و بۆنی ئەکەی هەڵئەسێت و دائەنیشێ و ڕائەکشێ و بەناو ڕۆحا پیاسە ئەکات مردن لێرە وەختێ کە دێت سەگەلی ڕەش لە پێشیەوەن چەند کەڕەتێ دێن و ئەڕۆن تا شەو دادێ و ئەوسا مردن بەریان ئەداتە ناومان و بە یەکەوە خەم و گۆشت ئێسکەکانی ئەم غۆربەتە و ژیان ئەخۆن! -دوای پانزە ساڵ هەتا ئیستەش تینوویەتی کۆچم نەشکاوە. هەتا ئیستەش زەمزەمییەکە و ئەو چەند دڵۆپە ڕژاوەی زاری گەورەی عەسکەرەکەم لە یاد ماوە. دوای پانزە ساڵ هەتا ئیستەش هەموو جارێ بە درێژایی خەیاڵم تەپ و تۆزێک لە وڕێنەکانم هەڵئەسێ لە بیابانایە چاوانم و لە قاقڕدایە تینوویەتیم هەموو جارێ بە پانایی ئەم چاوەڕوانییە شێدارەم هەڵمێک لە ڕۆحم هەڵئەسێ لە ناو لمایە خەمانم و لە سەحرادایە تەمەنم چاوەڕوانی ڕواندومی و ئاویش نایە دەنگم قەوزەیێ گرتوویێتی و دووکەڵێکم نە «با» ئەمڕەوێنێتەوە و سێبەرێکی تا هەتاییم پارچە عەردێکی هەتیوم هەموو کاولاشی ڕووناکی لە مندایە هەموو ڕەنگێکی کوژراوی ئەم دنیایە لە چاومایە نووکە نووکی پەلکی داران خشەخشی گەڵاڕێزان قرچەقرچی یادگار و ورتەورتی ئاوی شلوێ و پووکەپووکی گوڵی ژێر پێ و هەرچی باڵنەی یەک چاوە و کوێرەکانی و هەموو مەسافەی دابڕان لە مندایە من ئەسیاری نەختینەکانی تەنیاییم تەنیاییەکی سارد سارد تەنیاییەک کە ڕۆژانە «با»یەکی بێوەژنی پەرەوازە و بەدبەخت لە دەشتێکی کلۆڵا بیلاوێنێتەوە من «زیگاری» ناو ڕەنگێکم ژانی تیا ئەزرنگێتەوە بە دیار چییەوە کرووشکەم(کێروشکە) کردوو؟ دەوەنی سووتاوم و لە خۆم ئەپرسم و بێدەنگی وەڵامێکی خنکاوم ئەداتەوە لەوسەری تەنیاییەوە ژنێک دیارە! ژنە یاخود کۆلکە دارە؟ ژنێک دیارە لەوسەرەوە لەوسەری تەنیاییەوە تاقە درەختێکی تەنیا دیارە ڕووت ڕووت ئەوە ژنە؟ یان درەختی لێو بە بارە؟ نا... درەختە درەختێ لە تینوویەتی درەختێ لە نەزۆکی نە ژنە ژنێک لە هۆزی تەم و مژ ژنێک لە مۆمی کوژاوە ژنێک لە ئێسکی تاریکی بە دیار چییەوە ترووشکەم کردووە؟ کێ دێت؟ چی دێت؟ لە خۆم ئەپرسم و بێدەنگی وەڵامێکی سووتاوم ئەداتەوە ئەی هەڵوەدای ئومێدێکی نائومێد! تۆ لەو چۆلەکە قەتیسە ئەچی کە بەردەوام خۆی بە شووشەی پەنجەرەی ژوورێکا ئەکێشێ و بەڵام دواجار لەناو لەپی دەستی مەرگا مت دەبێت و «با»ی ساردی تەنیایی دێت و پەڕی مردوو ڕائەژەنێ نە کەس دێ و نە کەس ئەڕوا! ئەی ڕێگەی بێ ڕێبوار و ئەی هەڵوەدای ئومێدێکی نائومێد ئەوە هەر خۆتی، هەر خۆتی، هەردووکیان کۆچەری و ماڵ ئاواییکەر، هەر خۆتی هەردووکیان خانەخوێ و میوان هەر خۆتی هەردووکیان نیشتمانیش و غەریبی هیچ باڵنەیەک دیار نییە چونکە هیچ ئاسمانێک دیار نییە هیچ درەختێک دیار نییە چونکە هیچ ئاوێک دیار نییە بگەڕێرەوە بۆ لای خەوبەشکوو لەوێدا بباری -ئەی ژنەکەی پڕ لە سەراب و خۆڵەمێش! ئەی چیرۆکی قژ درێژ و فرمێسک درێژ! من بەقەد خۆشی لێت دوورم من بەقەد بەهەشت لێت دوورم بەڵام هێندەی ئەو دڵۆپە درشتانەی لە کالانەی چاوەکانتا و لە ڕوخساری خۆڵاویتا قەتیس ماون لێت نزیکم! من دووکەڵکێشی شێعرێکی دوور وڵاتم ناوم «مەم»ە و خەڵکی «دووز»م خەڵکی دەشتە تەنیاکان و کوڕی دەغڵە سووتاوەکان خەڵکی دەڤەرێ نەونەمام تیا قەموورە و گوڵ و پەپوولە تیا پیرە و لەو ناوەدا گەر بە ڕێکەوت پێکەنینێ لەدایکبێ بە زگماکی قاقای لاڵە و بە زگماکی سۆمای خڵتانی دەیجوورە لەم ساتەدا من لێرەم و لە ژێر ئەرزا و لە میترۆیەکی دڵتەنگا بەڵام چاوم لە پەلکەکانی باڵاتە کە «با»ی عەدەم لە سەحرادا چۆن ئەیانبا گوێم لە ڕەنگتە کە نووزەی دێ لە ئێوارەی ئاوابوونا سیانزە ساڵە غوربەت بووە بە شوققەیەک لە نهۆمی بێزاریدا شێی بە پێستم هەڵهێناوە غوربەت بووە بە زمانێ لە بەستێنی دابڕانا و شێی بە شێعر و شێی بە دەنگم هەڵهێناوە غوربەت بووە بە تەپ و تۆزی لێنیشتوو لە تەماشا و لە جانتاکەم لە چاوەڕوانی و خەیاڵم و لە یادگار و چاویلکەم! سیانزە ساڵە غوربەت بووە بە هاوسەرم و من لەم ژنە پاییزەیە هەتا ئیستە دەیان مناڵە خەزانی قژزەرد قژزەردەم لێ بووە ئێرە پڕپڕە لە گڵۆپ کەچی من هێشتا تارماییم ئاخر چیبکەم من شەوانی «دووز»م تیایە! ئێرە هەموو هەر شەقامی گوڵ گوڵییە و ئەپارتمانی شووشەییە و کافتریای زەرد و سوورە و کەچی من هێشتا لە ناخا هەر قوڕاویم «ئاخر چیبکەم! من هەر کۆڵانی مەندەلی و بەدرەم تیایە!» ئێرە پڕپڕە لە سەما و لە بالێت و لە هەڵفڕینی گۆرانی و لە نیشتنەوەی کۆتری ماچ و کەچی من هێشتا هەر لاڵم! ئاخر چیبکەم! من قافڵەی بەرەو خوار و «کاڵێ»م تیایە! ئەچمە دەرێ، ئەبمە پەپوولە پاییزە «با»ی گەرمێن دێ و ئەمبا و ئەمبا و ئەمکا بە ناو بازاڕێکی شووشەبەندا جێگە ئەوەندە خاوێنە کۆگایش هێندە ئێسک سووکە، لە لەشی تازە خۆشتووی ژنێک ئەچێ سپی سپی و بە چریسکە سۆپەرمارکێت، نهۆم نهۆم، بەژن و باڵای ئاوێنەیە و سترێجێکی تەسک لە بەردا و گوڵمی لاڕان دەپەڕیوە و ناوک دیارە و لە سەرەوە بۆ خوارەوە، تەماشای شین بە پلیکەی کارەبادا دێتە خوارێ و سەرئەکەوێ و لە بەردەمی فوارەیەکی پەمەییدا سەما ئەکا ئاخر چیبکەم!؟ من دوو چاوی ئەم غوربەتەم بەدبەختیشن لە بەردەمی زمڕووتام و لە بەردەمی گەوهەرام و لە بەردەمی یاقووتام و کەچی لێم ئەبن بە مووروو و بەردەشینەکەی ملی کیژێ لە خانەقین ئاخر چیبکەم!؟ من سوراحییەک کریستاڵ هەڵئەگرم و ورد ورد تەماشای ئەکەم و کەچی کریستاڵ لە دەسما و لە پاش قەیرێ ئەگۆڕدرێت و ئەبێ بە گۆزەی گڵەسوور! ئاخر چیبکەم!؟ ڕەنگە من شێعرێکی گەوج بم! دەست ئەدەمە، تازەترین، گرانترین ڕەفتەی ئاوریشمینی دنیا و هەڵیئەگرم کەچی لەپڕ ئەو ڕەفتەیە لەبەر دیدەم ئەبێتەوە بە سرکەییە زۆر کۆنەکەی ئەوسای دایکم ئاخر چیبکەم!؟ من جوانکوێرم! یاخود شێتم! ئەچمە بەردەمی کڵاوێ لە تووکی قوو دروستکراو شل و شل و نەرم نەرم هەڵیئەگرم... ئەیکەمە سەر وەختێ ئەچمە بەر ئاوێنە کڵاوی قوو ئەبێتەوە بە کلێتە نەگبەتەکەی ئەوسای باوکم! ئاخر چیبکەم! من کە چاوم هی خۆم نەبێ و هی کاڵێ بێ من کە گوێچکەم هی خۆم نەبێ و هی دەوەن و هی دارێ بێ و من کە ڕۆحم هی خۆم نەبێ و هی وڵات و هی خاکێ بێ هەر وام لێدێ! ئاخر چیبکەم!؟ دوانزە ساڵ بوو شاعیرەکە لە ژێرزەمینەکە هاتبووە دەرێ. دوانزە ساڵ بوو لە بەر هەتاوا شێعری ئەنووسی بەڵام هێشتا هەوای ژەهراوی لە بەغا حوکمدار بوو. تا ئەو ڕۆژەی مێژووی بەربەرییەکان بوومەلەرزەیەکی گەورە لێیدا و قەحتان و عەدنان و دەحام تەفر و تونا بوون. یەک لە دوای یەک گۆڕستانی چراکان ئەدۆزرانەوە. لەگەڵ هەڵدانەوەی چوارەم گۆڕستانا، شاعیرەکە چوار شێعری لەسەر باڵای پیرەمەگروون نووسی یەکەم: گومان گومان گومان گومان ئەکەم ناتوانن بیاندۆزنەوە هەر هەموویان نادۆزنەوە ئەو هەموو مانگی ژێر خۆڵە و ئەو هەموو خۆری ژێر گڵە و ئەو هەموو ئێسک و پروسکی گۆرانییانە و ئەو هەموو ڕەشەڕێحانەی گەرمییانە و ئەو هەموو قاسپەی بەفرانە و یەک بە یەکی ئەو گوڵ ئەستێرەی دەشتانە و یەک بە یەکی ئەو هەموو ئاسکە ونبووانە گومان گومان گومان ئەکەم ناتوانن بیاندۆزنەوە هەر هەموویان نادۆزنەوە ئەم حەففارانە بچووکن ئەم حەففارانە ئەترسن ئێوە بڕۆن لە عەمباری حەففارەی ئەو دنیاوە کە بۆ هەڵکەندنی دۆزەخ دانراون ئا لەوێوە ئێوە حەففارەی خوا بێنن حەففارەیێک بە یەک کەڕەت لە زاخۆوە هەتاکوو فاو سەری عێراق هەڵباتەوە! دووەم شێعر: پەیکەرێ ئێسک، سپی سپی ملوانکەیێکی پەمەیی و تاکێ بازنی شووشەیی شپرزە و مات، پیاوێک هات و دانەوییەوە و فوویەکی کرد لە دەم و چاوی خۆڵاوی پەیکەرەکە هەیکەلەکە کەوتە قسە: -ئۆهـ پیاوەکە چەند دەمێکە ئەم سروەیە لێی نەداوم! ملوانکەکە لە ناو دەستی پیاوەکەدا کەوتە جووڵە و ئەویش وتی: چەند دەمێکە ئەم خاتوونەی من نووستووە چەندی شل بووم بە گەردنی ئەم هەڵنەسا و تۆیش نەهاتی بازنەکە ئەویش وتی: چەند دەمێکە ئەم خاتوونەی من خەوتووە هەر هەڵنەسا و چەندیش گەورەبووم بە دەسی لە دوای فوویەک کە پیاوەکە سەیری بازنی شووشەی کرد وردتر بۆوە لە ناو هەناوی شووشەدا سەرچاوی عەسکەرێکی تیا مابۆوە لە ناوچەوانی نووسرابوو: قیامەت و حەشری ئەنفالی عرووبە! سێهەم شێعر: لە چاڵێکی هەشتا و هەشتدا من سەرین و بووکە شووشەی مناڵێکم هەڵگرتەوە لە ناو شێعرا و لەگەڵ خۆما هێنامنەوە بۆ ماڵەوە! کە شەو داهات، وەختی نووستن سەرینەکەی خۆم فڕێدا و سەرم کردە سەر سەرینی مناڵەکە و ئیتر من تاکوو بەیانی هەر خەونەکانی پەپوولە و کانیم بینی! بۆ سبەینێش ساتێ کە چاوم کردەوە تەماشام کرد بووم بە کچ و بچووک بچووک بوومەتەوە و پرچ درێژ و شەش ساڵانم شێعر هات نەیناسیمەوە ئاواز هات نەیناسیمەوە چیرۆک هات نەیناسیمەوە ئەوەی کە منی ناسییەوە سەرینی دایکی کچەکە و گوارەیێکی بەجێماوی کچەکە بوو چوارم شێعر: بەو سەرەوە تەیرێک لە ناو دووکەڵەوە کە منی دی هاتە خوارێ و ڕێک بەرامبەرم نیشتەوە یەکەمجار بوو تەیرێ ببینم عەمامەی لە سەردا بێ! وتی: تۆ ئەمناسیتەوە وتم: تەنها شێوەت ئەکەم وتی: من ناوم نەجەفە و لە شێعری جەواهیریا یەکمان دیوە! کە تۆزێ لێی وردبوومەوە وتم: وایە! وتی: تۆ هەر چاڵی باڵنەکانی خۆت باسکرد تۆ هەر مۆمت لەسەر گۆڕی قوربانییەکانی خۆت هەڵکرد بەڵام ئاخر... نەمهێشت قسەکەی تەواو کا وتم: هێشتا من فڕینم بەردەوامە و نەگەیشتوومەتە ناو دڵت وتی: تەنها من یەک قسەم پێیە و ئەڕۆم! ئەمجارەیان ئێمە و ئێوە لە گۆڕستانی چرادا لە ڕێی ئێسک و پروسکەوە لە ناو مردنا بۆ ژیان بە تەواوی بووین بە برا! ؟؟؟*= واتای ئەو وشەیەمان بۆ ڕوون نەبووەتەوە، تکایە ئەگەر دەیزانن پێمانی بڵێن.
«nugre selman» Afatêkî qelaqela, dûpşikêkî gewre gewrey konkirêtî Eşkenceyêkî dirêjû kilpeyekî bazneyî Nugre selman Jengî mêjûyekî konû qulley zulmêkî zor dûrû menzilêkî bîrçûnewew yadgarê bê pencerew Ta’ûnêkî xomelasder le naw limdaw kînew riqêkî sirimdî(berdewam, hemîşeyî) Nugre selman Qela qelay azarêkî reş dageraw Tînûyetîyêkî ezelîw pênaseyêk bo winbûnû bo tarîkîw şwênê bo zemanî xedrû cêgeyêk bo pyasey Zulmû galtey tawan Nugre selman Le zistana wişkesermay dem be gwêzan Le hawîna germayêkî pirûkawî girinc girinc Cêgeyêk bo pişûdanî nêzey mandû Şwênê bo nûstinî hewaw ta êware helnesanî Nugre selman Çend nexşeyêkî fîrarî nexşesazî Çend bînayekî helatû le endaze Çend petayekî rakirdû le des furat Çend pasewanê le neslî gurgî resen Nugre selman «ba»yekî na’umêd witî: byaban bo xoy şerim eka bilê mêjûm binyatî na Teyrêkî xolawîş witî: min şayetim carêk byaban pêy witim: min şerim ekem wextê namew her postêkim le Rêy emewe pê biga Berdî dîwar hemû carê ke pasewan têper ebû înca eyut: ay ke bextêkî reşim bû Wextê nekiram be dîwarî kitêbxanew yan mektebêw yan xanûy şê’rû çîrokêw yan be berdirêjî Şeqamî nêw baxêkû em çarenûsem pêbra Jeke’awî naw bermîlîş Wextê ke pasewan eroyşit Ewîş eyut: ay ke bextêkî reşim bû Ne genmû coyek xwardimyewew ne çûme naw dûperdaxî ’aşiqewew ne befrê serdanî kirdmû min Şermezarî em ’ebde feqîranem Dway sûtanim emxonewe Qelaqela Şewaneş çiray binmîçî ser ’ebdekan Wextê eyzanî be tenha ewan lewên Ewîş eyut: ay ke bextêkî reşim bû Le jûrserî xoşîyeka danegîrsam Le jûrserî semayeka Le jûrserî hîwayeka Min nem’ewîst em qafley koylane Leser cêgey derdedarîm Zerdû jakaw bimbînnewe Min şerim ekem eyanbînim Le jêr mina yeke yeke gyan edenû keçî min destewestanmû bo rêzgirtin lem mirdine Çend satê nakujêmewe! Qelaqela mirdin lêre bercesteye Pê’ekenêw qise ekaw seyrit ekaw seyrî ekey Des le destyewe edeytû bonî ekey Hel’esêtû da’enîşêw ra’ekşêw Benaw roha pyase ekat Mirdin lêre wextê ke dêt Segelî reş le pêşyewen Çend keretê dênû eron Ta şew dadêw ewsa mirdin beryan edate nawmanû Be yekewe xemû goşt êskekanî em xorbetew jyan exon! -dway panze sal heta îsteş tînûyetî koçim neşkawe. heta îsteş zemzemîyekew ew çend dilope Rijawey zarî gewrey ’eskerekem le yad mawe. dway panze sal heta îsteş hemû carê be dirêjayî Xeyalim tepû tozêk le wirênekanim hel’esê Le byabanaye çawanmû le qaqridaye tînûyetîm Hemû carê be panayî em çawerwanîye şêdarem helmêk le rohim hel’esê Le naw limaye xemanmû le sehradaye temenim Çawerwanî rwandumîw awîş naye dengim qewzeyê girtûyêtîw dûkelêkim Ne «ba» emrewênêtewew sêberêkî ta hetayîm Parçe ’erdêkî hetîwim Hemû kawlaşî rûnakî le mindaye Hemû rengêkî kujrawî em dinyaye le çawmaye Nûke nûkî pelkî daran Xişexşî gelarêzan Qirçeqirçî yadgarû wirtewrtî awî şilwêw pûkepûkî gulî jêr pêw herçî balney yek çawew Kwêrekanîw hemû mesafey dabran le mindaye Min esyarî nextînekanî tenyayîm Tenyayyekî sard sard Tenyayyek ke rojane «ba»yekî bêwejnî perewazew bedbext le deştêkî kilola bîlawênêtewe Min «zîgarî» naw rengêkim Janî tya eziringêtewe Be dyar çîyewe kirûşkem(kêruşke) kirdû? Dewenî sûtawmû le xom epirsmû bêdengî welamêkî xinkawim edatewe Lewserî tenyayyewe jinêk dyare! Jine yaxud kolke dare? Jinêk dyare Lewserewe lewserî tenyayyewe Taqe dirextêkî tenya dyare rût rût Ewe jine? Yan dirextî lêw be bare? Na... direxte Dirextê le tînûyetî Dirextê le nezokî Ne jine Jinêk le hozî temû mij Jinêk le momî kujawe Jinêk le êskî tarîkî Be dyar çîyewe tirûşkem kirduwe? Kê dêt? çî dêt? Le xom epirsmû bêdengî welamêkî sûtawim edatewe Ey helweday umêdêkî na’umêd! To lew çoleke qetîse eçî Ke berdewam xoy be şûşey pencerey jûrêka ekêşêw belam dwacar lenaw lepî destî merga Mit debêtû «ba»y sardî tenyayî dêtû perî mirdû ra’ejenê Ne kes dêw ne kes erwa! Ey rêgey bê rêbwarû ey helweday umêdêkî na’umêd Ewe her xotî, her xotî, herdûkyan Koçerîw mal awayîker, her xotî herdûkyan Xanexwêw mîwan Her xotî herdûkyan Nîştimanîşû xerîbî Hîç balneyek dyar nîye Çunke hîç asmanêk dyar nîye Hîç dirextêk dyar nîye Çunke hîç awêk dyar nîye Bigerêrewe bo lay xewbeşkû lewêda bibarî -ey jinekey pir le serabû xolemêş! Ey çîrokî qij dirêjû firmêsk dirêj! Min beqed xoşî lêt dûrim Min beqed beheşt lêt dûrim Belam hêndey ew dilope diriştaney le kalaney çawekantaw le ruxsarî xolawîta qetîs mawin lêt nizîkim! Min dûkelkêşî şê’rêkî dûr wilatim Nawim «mem»ew xelkî «dûz»m Xelkî deşte tenyakanû kurî dexle sûtawekan Xelkî deverê newnemam Tya qemûrew gulû pepûle tya pîrew Lew naweda ger be rêkewt pêkenînê ledaykibê Be zigmakî qaqay lalew Be zigmakî somay xiltanî deycûre Lem sateda min lêremû le jêr erzaw le mîtroyekî diltenga Belam çawim le pelkekanî balate Ke «ba»y ’edem le sehrada çon eyanba Gwêm le rengite ke nûzey dê Le êwarey awabûna Syanze sale Xurbet buwe be şuqqeyek le nihomî bêzarîda Şêy be pêstim helhênawe Xurbet buwe be zimanê le bestênî dabranaw şêy be şê’rû şêy be dengim helhênawe Xurbet buwe be tepû tozî lênîştû Le temaşaw le cantakem Le çawerwanîw xeyalmû le yadgarû çawîlkem! Syanze sale Xurbet buwe be hawsermû min lem jine payîzeye heta îste Deyan minale xezanî qijzerd qijzerdem lê buwe Êre Pirpire le gilop Keçî min hêşta tarmayîm Axir çîbkem Min şewanî «dûz»m tyaye! Êre hemû her şeqamî gul gulîyew epartimanî şûşeyyew kaftiryay zerdû sûrew keçî min hêşta Le naxa Her qurawîm «axir çîbkem! Min her kolanî mendelîw bedrem tyaye!» Êre pirpire le semaw le balêtû le helfirînî goranîw le nîştinewey kotrî maçû keçî min hêşta her Lalim! Axir çîbkem! Min qafley berew xwarû «kalê»m tyaye! Eçme derê, ebme pepûle payîze «ba»y germên dêw embaw embaw emka be naw bazarêkî şûşebenda Cêge ewende xawêne kogayş hênde êsk sûke, le leşî taze xoştûy jinêk eçê sipî sipîw be Çirîske Sopermarkêt, nihom nihom, bejnû balay awêneyew sitrêcêkî tesk le berdaw gulmî laran deperîwew Nawik dyarew le serewe bo xwarewe, temaşay şîn Be pilîkey karebada dête xwarêw ser’ekewêw le berdemî fwareyekî pemeyîda sema eka Axir çîbkem!? Min dû çawî em xurbetem Bedbextîşin Le berdemî zimrûtamû le berdemî gewheramû le berdemî yaqûtamû keçî lêm ebin be mûrûw Berdeşînekey milî kîjê le xaneqîn Axir çîbkem!? Min surahîyek kirîstal hel’egirmû wird wird temaşay ekemû keçî kirîstal le desmaw le paş qeyrê Egordirêtû ebê be gozey gilesûr! Axir çîbkem!? Renge min şê’rêkî gewc bim! Dest edeme, tazetrîn, girantirîn Reftey awrîşmînî dinyaw helî’egirim Keçî lepir ew refteye leber dîdem Ebêtewe be sirkeyye Zor konekey ewsay daykim Axir çîbkem!? Min cwankiwêrim! yaxud şêtim! Eçme berdemî kilawê Le tûkî qû dirustikiraw Şilû şilû nerim nerim Helî’egirim... eykeme ser Wextê eçme ber awêne Kilawî qû ebêtewe Be kilête negbetekey ewsay bawkim! Axir çîbkem! min ke çawim hî xom nebêw hî kalê bê Min ke gwêçkem hî xom nebêw hî dewenû hî darê bêw min ke rohim hî xom nebêw hî wilatû hî xakê bê Her wam lêdê! axir çîbkem!? Dwanze sal bû şa’îreke le jêrzemîneke hatbuwe derê. dwanze sal bû le ber hetawa şê’rî enûsî belam hêşta heway jehrawî le bexa hukmidar bû. ta ew rojey mêjûy berberîyekan bûmelerzeyekî Gewre lêydaw qehtanû ’ednanû deham tefrû tuna bûn. yek le dway yek goristanî çirakan Edozranewe. legel heldanewey çwarem goristana, şa’îreke çwar şê’rî leser balay pîremegrûn nûsî Yekem: Guman Guman guman guman ekem Natwanin byandoznewe Her hemûyan nadoznewe Ew hemû mangî jêr xolew ew hemû xorî jêr gilew ew hemû êskû piruskî goranîyanew ew Hemû reşerêhaney germîyanew ew hemû qaspey befranew yek be yekî ew gul estêrey deştanew Yek be yekî ew hemû aske winbuwane Guman guman guman ekem Natwanin byandoznewe Her hemûyan nadoznewe Em heffarane biçûkin Em heffarane etirsin Êwe biron le ’embarî heffarey ew dinyawe Ke bo helkendinî dozex danrawin A lewêwe Êwe heffarey xwa bênin Heffareyêk be yek keret Le zaxowe hetakû faw Serî ’êraq helbatewe! Duwem şê’ir: Peykerê êsk, sipî sipî Milwankeyêkî pemeyîw takê baznî şûşeyî Şipirzew mat, pyawêk hatû danewîyewew fûyekî kird Le demû çawî xolawî peykereke Heykeleke kewte qise: -oh pyaweke Çend demêke em sirweye lêy nedawim! Milwankeke Le naw destî pyawekeda kewte cûlew ewîş witî: çend demêke em xatûney min nûstuwe Çendî şil bûm be gerdinî em helnesaw toyş nehatî Bazneke ewîş witî: çend demêke em xatûney min xewtuwe Her helnesaw çendîş gewrebûm be desî Le dway fûyek ke pyaweke seyrî baznî şûşey kird Wirditir bowe Le naw henawî şûşeda Serçawî ’eskerêkî tya mabowe Le nawçewanî nûsrabû: Qyametû heşrî enfalî ’irûbe! Sêhem şê’ir: Le çalêkî heştaw heştida Min serînû bûke şûşey minalêkim helgirtewe Le naw şê’raw legel xoma hênamnewe bo malewe! Ke şew dahat, wextî nûstin Serînekey xom firêdaw serim kirde ser serînî minalekew îtir min takû beyanî Her xewnekanî pepûlew kanîm bînî! Bo sibeynêş Satê ke çawim kirdewe Temaşam kird Bûm be kiçû biçûk biçûk bûmetewew pirç dirêjû şeş salanim Şê’ir hat neynasîmewe Awaz hat neynasîmewe Çîrok hat neynasîmewe Ewey ke minî nasîyewe Serînî daykî kiçekew gwareyêkî becêmawî kiçeke bû Çwarim şê’ir: Bew serewe Teyrêk le naw dûkelewe Ke minî dî Hate xwarêw rêk beramberim nîştewe Yekemcar bû teyrê bibînim ’emamey le serda bê! Witî: to emnasîtewe Witim: tenha şêwet ekem Witî: min nawim necefew le şê’rî cewahîrya yekman dîwe! Ke tozê lêy wirdibûmewe Witim: waye! Witî: to her çalî balnekanî xot baskird To her momit leser gorî qurbanîyekanî xot helkird Belam axir... Nemhêşt qisekey tewaw ka Witim: hêşta min firînim berdewamew negeyştûmete naw dilit Witî: tenha min yek qisem pêyew erom! Emcareyan êmew êwe Le goristanî çirada Le rêy êskû piruskewe Le naw mirdina bo jyan be tewawî bûyn be bira! ???*= watay ew wişeyeman bo rûn nebuwetewe, tikaye eger deyzanin pêmanî bilên.