Abdula Pashew
ئەگەر دیسان خوا لاویمان بداتەوە وەک خەڵاتێکی ئاسمانی ئەگەر سروشت پڕاوپڕمان بکاتەوە لە کڵپە و گڕ شێتی و جوانی: ئەمجارەیان لە پێناوتا کام بەر حەرامە ئەو دەخۆم کامە یاسا ئاسمانییە ئەو دەشکێنم لم و لیتەی بنی دەریاش حەشارت دا وەک مرواری دەرت دێنم خۆم ڕادەستی قەدەر ناکەم دنیاش دەستم لێ بەربدا ئەمجارەیان هەرگیز دەستت لێ بەرنادەم... ئەمجارەیان نیوەشەوێک کە تاریکی تیغ نەیبڕێ و سروشت هەمووی بەپێوە بێ بەفر تا چۆکان کەوتبێ با و بۆران و کڕێوە بێ بە هەسپێکی برووسکەیی هەڵت دەگرم کەژ بە کەژ و یاڵ بە یاڵ و نەوال نەوال دەتفڕێنم هەر شەوێک و لە کونجێکا قۆناخ دەگرین تا وڵاتێک بۆ خۆم و خۆت دەئەفرێنم لەوێندەرێ قەت ناهێڵم شوێنێک هەبێ لە لانەکەی ئێمە کڕتر قەت ناهێڵم کەسێک هەبێ لە تۆ شاد و تەڕوبڕتر لە من شێت و ئەڤیندار و بەرزەفڕتر هەموو ڕۆژێ بە لوێچی دەست شیلەی هەورت لە دەم دەکەم شعر لەسەر قەدی داران دەنەخشێنم هەر برووسکێک چەخماخە دا ڕێی لێ دەگرم گڕی پەتی لێ دەسێنم هەزار خۆزگە هەزار خۆزگە دیسان لاوی ئارایشتی دەداینەوە وەک خەڵاتێکی ئاسمانی هەزار بریا دیسان تژی دەبووینەوە لە کڵپە و گڕ شێتی و جوانی...
Eger dîsan Xwa lawîman bidatewe Wek xelatêkî asmanî Eger siruşt Pirawpirman bikatewe Le kilpew gir şêtîw cwanî: Emcareyan Le pênawta Kam ber herame ew dexom Kame yasa asmanîye ew deşkênim Limû lîtey binî deryaş heşarit da Wek mirwarî derit dênim Xom radestî qeder nakem Dinyaş destim lê berbida Emcareyan hergîz destit lê bernadem... Emcareyan Nîweşewêk Ke tarîkî tîx neybirêw Siruşt hemûy bepêwe bê Befir ta çokan kewtibê Baw boranû kirêwe bê Be hespêkî birûskeyî helt degirim Kej be kejû yal be yalû newal newal detfirênim Her şewêkû le kuncêka qonax degrîn Ta wilatêk bo xomû xot de’efrênim Lewênderê qet nahêlim Şwênêk hebê le lanekey ême kirtir Qet nahêlim kesêk hebê Le to şadû terubritir Le min şêtû evîndarû berzefritir Hemû rojê Be lwêçî dest Şîley hewrit le dem dekem Şi’ir leser qedî daran denexşênim Her birûskêk çexmaxe da Rêy lê degirim Girî petî lê desênim Hezar xozge Hezar xozge Dîsan lawî arayştî dedaynewe Wek xelatêkî asmanî Hezar birya Dîsan tijî debûynewe Le kilpew gir şêtîw cwanî...