Abdula Pashew
کە هاتن و دار چنارە شیکەکەیان لوول دا و ڕفاند لەو ساتەوە کە هاتن و گوڵەجۆیە گڕتێزاوەکەیان کرتاند کۆتری خەم هەتا ئێستاش هەر گمەی دێ کۆڕی پرسەی هەموان تەواو پرسەکەی من بەردەوامە و هەر جمەی دێ! داخی ئەوەم لە دڵدایە نەیگەیشتمێ تا پێی بڵێم: «ئاگادار بە! لەم وڵاتە ئەوەی قەڵەم چۆڵەچرا و ئاورگی بێ دەبێ زمان چەقۆی تیژی سەر قورگی بێ!» نە دەزانم نە دەشپرسم کێ بوون دابارینە سەری! ئیدی بۆ من وەکوو یەکە بنیادەم بوون یا کەمتیار بە چی هاتن: بە جامڕەشێک یان بە جامڕوون بێ نمرە بوو یا نمرەدار! ئیدی بۆ من وەکوو یەکە بەڵام پرسیم پرسیم و دیسان دەپرسم: ئەو سبەینەی نرکە و گۆڵەی ئەو هەورەیان مت و کڕ کرد ئەو سبەینەی ئەو تەلارە نەخشینەیان خاشەبڕ کرد ئەوێ ڕۆژێ یاسای سەروەر بۆ کام بەرخی کەڕەواڵە چووبووە کەمین؟ گیرفانی کێی دەپشکنی؟ لە ئاسمان بوو یان لە زەمین؟! هەر پرسیم و پرسیمەوە هەندێک دەڵێن: «یاسای سەروەر مایەسیری گیری دابوو دوورەدەست بوو» هەندێک دەڵێن: «زۆر سەرقاڵ بوو شوورەی دەوری کۆشک و سەرای هەڵدەچنی خەمی خەست بوو» هەندێک دەڵێن: «ئاسمانی ژوور باخەکەی خۆی تەلبەند دەکرد لە چریکە و فڕکەی باڵی باڵدار پەست بوو» هەندێک دەڵێن: «نەخێر بێشکەی حکوومەتە ساوایەکەی ڕادەژەنی ناوەناوە دایبییەکی لەپێ دەکرد ناوە ناوە دایبییەکی دادەکەنی!» هەندێک دەڵێن: «نا ئەو ڕۆژە بە شەرابی زەماوەندی بە شوودانی کەرکووک مەست بوو» هەندێک دەڵێن: «لە بانکێکا پارەی دەژمارد لەبەر چاوی ڕژدی ئەغیار سڵ و سرک و لەسەرهەست بوو» منیش دەڵێم: «کەس نەیزانی یاسای سەروەر زگچووی لێبوو لە ئاودەست بوو!»
Ke hatnû Dar çinare şîkekeyan lûl daw rifand Lew satewe ke hatnû Gulecoye girtêzawekeyan kirtand Kotrî xem heta êstaş her gimey dê Korî pirsey hemwan tewaw Pirsekey min Berdewamew her cimey dê! Daxî ewem le dildaye Neygeyştimê ta pêy bilêm: «agadar be! Lem wilate Ewey qelem çoleçraw awirgî bê Debê ziman çeqoy tîjî ser qurgî bê!» Ne dezanim Ne deşpirsim Kê bûn dabarîne serî! Îdî bo min wekû yeke Binyadem bûn ya kemtyar Be çî hatin: Be camreşêk yan be camrûn Bê nimre bû ya nimredar! Îdî bo min wekû yeke Belam pirsîm Pirsîmû dîsan depirsim: Ew sibeyney Nirkew goley ew hewreyan mitû kir kird Ew sibeyney Ew telare nexşîneyan xaşebir kird Ewê rojê Yasay serwer Bo kam berxî kerewale çûbuwe kemîn? Gîrfanî kêy depşikinî? Le asman bû yan le zemîn?! Her pirsîmû pirsîmewe Hendêk delên: «yasay serwer Mayesîrî gîrî dabû dûredest bû» Hendêk delên: «zor serqal bû Şûrey dewrî koşkû seray heldeçnî Xemî xest bû» Hendêk delên: «asmanî jûr baxekey xoy telbend dekird Le çirîkew firkey balî baldar pest bû» Hendêk delên: «nexêr bêşkey hikûmete sawayekey radejenî Nawenawe daybîyekî lepê dekird Nawe nawe daybîyekî dadekenî!» Hendêk delên: «na ew roje Be şerabî zemawendî be şûdanî kerkûk mest bû» Hendêk delên: «le bankêka parey dejmard Leber çawî rijdî exyar Silû sirkû leserhest bû» Minîş delêm: «kes neyzanî Yasay serwer zigçûy lêbû Le awdest bû!»