Abdula Pashew
ئەوەی عاشق بێ پێی دەڵێم با بۆ تەواف هەر بەحزان و بۆ مرازیش هەر گۆڕی تۆ هەڵبژێرێ... چونکە تەنیا سەر بە هۆزی پێغەمبەران تۆ ئاسایی لەبن کەڵبەی ئازیزانی گیان دەسپێرێ! زریکەیێک دەگاتە گوێم ئاسمان هەڵدڕهەڵدڕ دەکا: چ قەوماوە؟ چییە خوایە؟ قەولێکی مسحەفا ڕەشە پێخوست دەکرێ یا سووڕەتەکەی حەڕڕایە؟ چییە خوایە؟ سیپارەیەکی ئنجیلە ڕەجم دەکرێ یا گاتایە؟ چییە خوایە؟ چ قەوماوە؟ چییە خوایە؟ شەبەیخوونی مەغۆلانە بۆ سەر مەعبەدێکی بوودا یا زریکەی تەوارێکی باڵشکاوی بێنەوایە؟ چییە خوایە؟ پارچەیێک نوور لەو ساکەگۆڕە کەوتووە... هی دوعایە یا مەفتەنە هەتک دەکرێ؟ ئەو بزگوڕەی دایپۆشیوە بزگوڕی بەر کچی منە یا بەرماڵی خواناسانە لەبەر تف و بەرد باڵدەگرێ؟ ئێستا گومان لە چی بکەم لە چی نەکەم؟ ئێستا گومان لە کێ بکەم لە کێی نەکەم؟ لە هەر چل هەزار پێغەمبەر؟ لە کتێبە پیرۆزەکان؟ لە کردگار؟ فیرعەونەکان دنیایان خوارد بۆچی مووسا دار عەساکەی هەڵنابڕێ و نایکا بە مار؟ ئەوا دیسان بەردبارانی مەجدەلییە کەنگی مەسیح دێتە هاوار؟ بۆ شێخ ئادی مەرقەدەکەی جێ ناهێڵێ؟ بۆ گومبەتێک منارەیەک بە زەویدا ناچێتە خوار؟ ئەی من بۆچی ناتپارێزم؟ ئازیزەکەم جگەرگۆشەم نیشتمانی بن پێلەقە و بڵۆک و دار! بۆ بڵێسەی قەلەمەکەم دەوراندەوری جەستەی پیرۆز هەڵنابەستێ شوورە و دیوار؟ دەک شەرمەزار بم شەرمەزار بم شەرمەزار!
Ewey ’aşiq bê pêy delêm Ba bo tewaf her behzanû Bo mirazîş her gorî to helbijêrê... Çunke tenya ser be hozî pêxemberan To asayî Lebin kelbey azîzanî gyan despêrê! Zirîkeyêk degate gwêm Asman heldirheldir deka: Çi qewmawe? Çîye xwaye? Qewlêkî mishefa reşe pêxust dekirê Ya sûretekey herraye? Çîye xwaye? Sîpareyekî incîle recim dekirê Ya gataye? Çîye xwaye? Çi qewmawe? Çîye xwaye? Şebeyxûnî mexolane bo ser me’bedêkî bûda Ya zirîkey tewarêkî balişkawî bênewaye? Çîye xwaye? Parçeyêk nûr lew sakegore kewtuwe... Hî du’aye ya meftene hetik dekirê? Ew bizgurey daypoşîwe Bizgurî ber kiçî mine Ya bermalî xwanasane Leber tifû berd baldegrê? Êsta guman le çî bikem le çî nekem? Êsta guman le kê bikem le kêy nekem? Le her çil hezar pêxember? Le kitêbe pîrozekan? Le kirdigar? Fîr’ewnekan dinyayan xward Boçî mûsa dar ’esakey helnabrêw nayka be mar? Ewa dîsan berdibaranî mecdelîye Kengî mesîh dête hawar? Bo şêx adî merqedekey cê nahêlê? Bo gumbetêk minareyek be zewîda naçête xwar? Ey min boçî natparêzim? Azîzekem Cigergoşem Nîştimanî bin pêleqew bilokû dar! Bo bilêsey qelemekem Dewrandewrî cestey pîroz Helnabestê şûrew dîwar? Dek şermezar bim Şermezar bim Şermezar!