Abdula Pashew
چما من چۆڕەخوێنە داگیرساوەکەتان نیم؟ من خەنجەرە هەمیشە هەڵکێشراوەکەتان نیم؟ چما من مەلی تیژباڵی داودۆزی ڕەوەکتان نیم؟ لە خەوباراندا زەنگ و لە تۆفاندا کەڵەک و لە ڕۆژی بەستەڵەکدا ئاگردان و گەرمەکتان نیم؟ چ زوو پێم گوتن چ زوو پێم گوتن کوندەبۆیانی کەلاوەنشین چاویان هەڵ نایێ بە ڕۆژی ڕووناک چ زوو پێم گوتن ئەو خەرتەلانە ئارام ناگرن تا زێدەکەمان نەکەن بە کەلاک ئێستاش تێم ناگەن، لێم بەدگومانن دە چاک بزانن ئەو وانەکانە سبەینان بازی دەزندەخۆری نەوەی حەججاجن نیوەڕۆیانیش چاوساغی ئۆردووی دمدمشکێنن عەسران تاژیلەی چوارپەل بەخەنەی عرووبەی شامن لە حەرەمسەرای ئالی عوسمانیش، شەوان بە نۆرە هەتیوخەسێنن هێشتا تێم ناگەن، لێم بەدگومانن دە چاک بزانن هەر کانییەک ئەوان ئاوی زەقنەبووت کەن هیشکاو دێنێ دۆبڕن دۆبڕن دۆبڕ هەر درەختێک لە سایەیدا ئەوان بنوون بێ بەر دەبێ تاعوونن تاعوونن تاعوون لە هەر جێیێک گەرا بخەن تۆوی مەرگی پێ وەردەبێ کوچکڕەشن کوچکڕەشن کوچکڕەشن کوچکڕەشن بڵێ هانێ، ئەمە ئاڵای سەرفرازی ئەوان کفنت بۆ هەڵدەکەن بڵێ هانێ، ئەمە کەوسەری سەرکەوتن ئەوان ژاری تێشکانی تێکەڵدەکەن خۆریان وەک تاج لەسەر بنێ تیشکەکانی دەتارێنن شۆڕابەیان بۆ زین بکە لمی داخبوو دەبارێنن ئەو هینانە، ئەو هینانە شەنگەبەرەی داری ژاری بەربینگمانن دوو لاگون و سەد باتمانی مێردەزمەی سەر سینگمانن هێشتا تێم ناگەن، لێم بەدگومانن دە چاک بزانن تا سێبەری ئەوان مابێ نە بایەزید خانی دەبێ نە گۆڕقەرەچ حاجی قادر تا سێبەری ئەوان مابێ کوردستانمان وەک دێڵەیێک دەبێ جێگەی بەر درگا بێ هەر بترەکێ و هەتاکوو دنیا دنیا بێ دەرزن دەرزن، تەغار تەغار تووتکەخەفی و براکوژێ لێ پەیدا بێ تا سێبەری ئەوان مابێ هەر بە شکست تۆڵەی شکست دەکەینەوە هەر بە ماچ وەڵامی ئەنفال دەدەینەوە بە تریاکی هەڵەبجەیێک، هەڵەبجەیێک لەبیر خۆمان دەبەینەوە تا سێبەری ئەوان مابێ دەبێ هەروا بە ئومێدی فرۆی چەوری بەرخەنێر بین چاو لە هێلکەی دووزەردێنەی کەڵەشێر بین تا سێبەری ئەوان مابێ هەرجارەو گوندێک، شارێکمان لە پەردەی عۆجەیێک دەکەن وەکوو کەرکووک لەملا دەبنە ئاوەڵزاوا و دەقریوێنن لەولاش دەبن بە دایکی بووک ئێستاش تێم ناگەن، لێم بەدگومانن دە چاک بزانن کوردستانی ئێمە ئاشە کوردستانی ئێمە ئاشە و سەرکردەکانیش ئاشەوان کورد باراشە و هاڕینەکەی بە قۆنتەرات دراوە بە وان
Çima min çorexwêne dagîrsaweketan nîm? Min xencere hemîşe helkêşraweketan nîm? Çima min melî tîjbalî dawdozî rewektan nîm? Le xewbaranda zengû le tofanda kelekû le rojî bestelekda agir idanû germektan nîm? Çi zû pêm gutin Çi zû pêm gutin kundeboyanî kelawenşîn Çawyan hel nayê be rojî rûnak Çi zû pêm gutin ew xertelane aram nagirin ta zêdekeman neken be kelak Êstaş têm nagen, lêm bedgumanin De çak bizanin Ew wanekane sibeynan bazî deznidexorî newey heccacin Nîweroyanîş çawsaxî ordûy dimdimişkênin ’esran tajîley çwarpel bexeney ’irûbey şamin Le heremseray alî ’usmanîş, şewan be nore hetîwxesênin Hêşta têm nagen, lêm bedgumanin De çak bizanin Her kanîyek ewan awî zeqnebût ken Hîşkaw dênê Dobirn dobirn dobir Her dirextêk le sayeyda ewan binûn bê ber debê Ta’ûnin ta’ûnin ta’ûn Le her cêyêk gera bixen Towî mergî pê werdebê Kuçkireşin Kuçkireşin kuçkireşin kuçkireşin Bilê hanê, eme alay serfirazî Ewan kifinit bo heldeken Bilê hanê, eme kewserî serkewtin Ewan jarî têşkanî têkeldeken Xoryan wek tac leser binê Tîşkekanî detarênin Şorabeyan bo zîn bike Limî daxbû debarênin Ew hînane, ew hînane şengeberey darî jarî berbîngimanin Dû lagunû sed batmanî Mêrdezmey ser sîngimanin Hêşta têm nagen, lêm bedgumanin De çak bizanin Ta sêberî ewan mabê Ne bayezîd xanî debê Ne gorqereç hacî qadir Ta sêberî ewan mabê Kurdistanman wek dêleyêk debê cêgey ber dirga bê Her bitrekêw hetakû dinya dinya bê Derzin derzin, texar texar Tûtkexefîw birakujê lê peyda bê Ta sêberî ewan mabê Her be şikist toley şikist dekeynewe Her be maç welamî enfal dedeynewe Be tiryakî helebceyêk, helebceyêk lebîr xoman debeynewe Ta sêberî ewan mabê Debê herwa be umêdî firoy çewrî berxenêr bîn Çaw le hêlkey dûzerdêney keleşêr bîn Ta sêberî ewan mabê Hercarew gundêk, şarêkman Le perdey ’oceyêk deken wekû kerkûk Lemla debne awelzawaw deqrîwênin Lewlaş debin be daykî bûk Êstaş têm nagen, lêm bedgumanin De çak bizanin Kurdistanî ême aşe Kurdistanî ême aşew serkirdekanîş aşewan Kurd baraşew harînekey be qonterat dirawe be wan