Abdula Pashew
ئەوەی هەور پەڕە دەکا و دەیتارێنێ قۆناغ قۆناغ، ئاقار ئاقار هەر خۆمانین ئەوەی کەوە و کەو ڕاو دەنێ ڕەوەز ڕەوەز، زنار زنار هەر خۆمانین هەر تابووتێک بۆمان دەکرێ تەختە و چەکوچ، مێخ و بزمار هەر خۆمانین هەر شارێکمان دوگمەی یەخەی دەترازێنرێ دەستەدز و پاشەدز و حەسحەسی شار هەر خۆمانین لە هەر باخێک، گڕ لە باڵی دارێک بەر بێ لە هەر شاخێک، تاشەبەردێک بڕمیتە خوار هەر خۆمانین هەر ڕۆژێکمان، هەر مانگێکمان، هەر ساڵێکمان هەڵدەواسرێ، سێدارە و پەت هەر خۆمانین دوو لەت بین و چوار لەت بین و هەزار لەت بین تیخی نەفرەت هەر خۆمانین پشت و قامچی، باڵدار و داو هەر خۆمانین پێ و بەرپێنە، ئاگر و ئاو هەر خۆمانین با کەس چیدی تف هەڵناوێ بۆ ئەوانەی مێژووی مردوون با کەس چیدی سووچ نەخانە ئەستۆی دەریا و قیسمەتی خوا و کەچ گەڕانی چەرخی گەردوون گشت سەحراکان بنارێکیان پێ ناگیرێ ئێمە خۆمان لووتکەکانمان پێشکەش کردوون
Ewey hewr pere dekaw deytarênê Qonax qonax, aqar aqar Her xomanîn Ewey kewew kew raw denê Rewez rewez, zinar zinar Her xomanîn Her tabûtêk boman dekirê Textew çekuç, mêxû bizmar Her xomanîn Her şarêkman dugmey yexey detrazênrê Destedzû paşedzû heshesî şar Her xomanîn Le her baxêk, gir le balî darêk ber bê Le her şaxêk, taşeberdêk birmîte xwar Her xomanîn Her rojêkman, her mangêkman, her salêkman Heldewasrê, sêdarew pet Her xomanîn Dû let bînû çwar let bînû hezar let bîn Tîxî nefret Her xomanîn Piştû qamçî, baldarû daw Her xomanîn Pêw berpêne, agir û aw Her xomanîn Ba kes çîdî tif helnawê Bo ewaney mêjûy mirdûn Ba kes çîdî sûç nexane Estoy deryaw qîsmetî xwaw keç geranî çerxî gerdûn Gişt sehrakan binarêkyan pê nagîrê Ême xoman lûtkekanman pêşkeş kirdûn