Mistafa Dadar
پەپوولە! بە دوو باڵە ڕەنگین و نەخشینەکەت لەگەڵ قاسپەقاسپی کەوی مەستی بادەی کوڕادە لەگەڵ شەوشنەی شەوگەڕی تۆزی ڕێگا وەلادەر لەگەڵ پێکەنینی گوڵی مەندی تێراوی دێراوی جوانی بڕۆ، هەڵفڕە، ڕوو لە ئادەی بەهەشتی ئەهوورای مەزن کە! کە ئەهریمەنی تاریکایی لە نووری تەریکە تەماشا کە داری تەیاری بەهاری مەسیحا چلۆن بۆتە چەتری پشوودانی ڕێبواری تینوو تەماشا گڕی ئاگری شوانی ماندوو حەساوە چلۆن جەرگی شەوگاری دەبڕی بەرەو ژیانی هەرمان چلۆن بێچوو ئاسکانی ئاواتی گەورەی لەمێژین بەبێ ترسی ڕاوکەر خەریکی گەمە و هەڵبەزینن پەپوولە! پەپوولەی بەنازی لە دڵ جوان! بڕۆ گوێ بدە زمزەمەی ئاوی لێژێ کە لەنگێزەیەک ڕەها بووە لە بەندی کەوی و کۆیلەیی بەرەو مێرگ و زەنوێری هەربوون بەڕێوە بە دەنگی برینداری داوودییە بانگەوازی کە بۆ هەڵپەڕینی زەماوەندی ئازادی دڵ هان ئەدا بە دڵ بانگ ئەکا: شەرمی ڕوانینی شللێر ئەوە زەعفەرانی پەژارە بە فەوتان ئەدا پەپوولە! پەپوولەی بەنازی لە دڵ جوان! گزینگی بەیانی ژیانێکی نوێیە کەوا تیشکی ئەڕوا بەرەو دوور... بەرەو دوور ئەوا هەندەرانی هەموو کردە نوور پەپوولە! پەپوولەی بەنازی لە دڵ جوان! وڵاتم هەموو مەستی هەستی ژیانە هەموو چاوەڕوانی زەماوەندی گەورەن ئەوەی بیری لێ ناکرێ تێکشکانە، نەمانە پەپوولە! پەپوولەی بەنازی لە دڵ جوان! پەپوولە! لە کاتی زەماوەند و شایی -کە نیزیکە لێمان - من و تۆ لەگەڵ مامزی دوورەزێدم ئەچین سەیری گۆوەندی ئاواتی خۆمان ئەکەین لە دەنگدانەوەی دەنگی خاوەندی هیوا لە بەرزایی کوێستانی ئازادی گوێ هەڵئەخەین
Pepûle! Be dû bale rengîn û nexşîneket Legel qaspeqaspî kewî mestî badey kurade Legel şewşiney şewgerî tozî rêga welader Legel pêkenînî gulî mendî têrawî dêrawî ciwanî Biro, helfire, rû le adey beheştî ehûray mezin ke! Ke ehrîmenî tarîkayî le nûrî terîke Temaşa ke darî teyarî beharî mesîha Çilon bote çetrî pişûdanî rêbwarî tînû Temaşa girî agirî şwanî mandû hesawe Çilon cergî şewgarî debirî berew jiyanî herman Çilon bêçû askanî awatî gewrey lemêjîn Be bê tirsî rawker xerîkî geme û helbezînin Pepûle! Pepûley benazî le dil ciwan! Biro gwê bide zimzemey awî lêjê Ke lengêzeyek reha buwe le bendî kewî û koyleyî Berew mêrg û zenwêrî herbûn berêwe Be dengî birîndarî dawudîye bangewazî Ke bo helperînî zemawendî azadî dil han eda Be dil bang eka: şermî rwanînî şillêr Ewe zeferanî pejare be fewtan eda Pepûle! Pepûley benazî le dil ciwan! Gizîngî beyanî jiyanêkî nwêye Kewa tîşkî erwa berew dûr... berew dûr Ewa henderanî hemû kirde nûr Pepûle! Pepûley benazî le dil ciwan! Wilatim hemû mestî hestî jiyane Hemû çawerwanî zemawendî gewren Ewey bîrî lê nakirê têkşikane, nemane Pepûle! Pepûley benazî le dil ciwan! Pepûle! Le katî zemawend û şayî -ke nîzîke lêman - Min û to legel mamizî dûrezêdim Eçîn seyrî gowendî awatî xoman ekeyn Le dengdanewey dengî xawendî hîwa Le berzayî kwêstanî azadî gwê helexeyin