Muhammad Mamle
ئاخ ڕۆڵە ڕووناکی گلێنەی چاوم بەندی جەرگ و دڵ هێزی هەناوم چۆڵەمەی ئەستۆم ڕەگی حەیاتم هەنگوین و قەند و نوقڵ و نەباتم ڕیحانەی بۆنخۆش سوورەگوڵەکەم ئاوپڕشکێنەی کوڵی دڵەکەم خەوی خێرت بێ دە بنوو درەنگە تا کەڵەبابەی بەیان بێدەنگە هەی لایە لایە ڕۆڵە لای لایە ئەوشۆ بەزەییت بە مندا نایە ژیر بەوە ڕۆڵەی ژیر و جوانم لە داخی لانک دەگری دەزانم دەڵێی بۆ حەپسم بۆ دەستەبەستم بەو بەند و حەپسە من جەستە خەستەم لەنێو کورد نەبێ دەسرازە نییە ئەو بەند و قوفڵە و قەڕازە نییە ڕۆڵە من بیرم لە تۆ زیاترە دەسرازە و لانک بتبێ چاترە هەی لایە لایە ڕۆڵە لای لایە گوێ بدە پێت بڵێم لەبەر چی وایە ڕاستە نەوەی شێری ژیانی نەتەوەی پاکی گەلی کوردانی بەڵام چونکوو کورد ئەوڕۆ بێکەسە بەشیان لە دنیا کۆت و مەحبەسە بۆیە دەتپێچم تا خووی پێ بگری نەک تا من ماوم لە بەندا بمری هەی لایە لایە ڕۆڵە لای لایە هەزار تێبینی دواڕۆژم لایە دەسرازە: ئەو پەتە پانەی بە بەنی ڕەنگاوڕەنگ وەک کەژوو دەیهۆننەوە بۆ بەستنەوەی دەست و لاقی منداڵ لە لانکەدا. قەڕازە: زنجیری شت بەستن. هۆنراوە: هەژار
Ax role rûnakî gilêney çawim Bendî cerg û dil hêzî henawim Çolemey estom regî heyatim Hengiwîn û qend û nuqil û nebatim Rîhaney bonxoş sûregulekem Awpirişkêney kulî dilekem Xewî xêrit bê de binû direnge Ta kelebabey beyan bêdenge Hey laye laye role lay laye Ewşo bezeyît be minda naye Jîr bewe roley jîr û cwanim Le daxî lank degrî dezanim Delêy bo hepsim bo destebestim Bew bend û hepse min ceste xestem Lenêw kurd nebê desraze nîye Ew bend û qufle û qeraze nîye Role min bîrim le to zyatre Desraze û lank bitbê çatre Hey laye laye role lay laye Gwê bide pêt bilêm leber çî waye Raste newey şêrî jyanî Netewey pakî gelî kurdanî Belam çunkû kurd ewro bêkese Beşyan le dinya kot û mehbese Boye detpêçim ta xûy pê bigrî Nek ta min mawim le benda bimrî Hey laye laye role lay laye Hezar têbînî dwarojim laye Desraze: ew pete paney be benî rengawreng wek kejû deyhonnewe bo bestinewey dest û laqî mindal le lankeda. Qeraze: zincîrî şit bestin. Honrawe: hejar