Sherko Bekas
شەهیدان دەرگامان لێ ناکەنەوە هەموو ساڵێ لە یادی شەکراو خواردنەوەی ڕاپەڕین و ئازادییا قوربانییەکان یەکە یەکە بە خۆیان و گوڵی ژاڵەی سەر سنگیان و باوەشی پڕئەستێرەوە ئەگەڕێنەوە بۆ ماڵێ. ساڵی یەکەم شارەکەمان جمەی ئەهات لە جریوەی خەمی سوور و لەبەر باوەشپیاکردن و ماچی ئەوان لەبەر هات و چۆی پەپوولە و لەبەر خۆنیشاندانی هەزاران گوڵەهێرۆ و دارئەرخەوان لەبەر قریوەی برین و تێکڕژانی دارهەنار و گێلاسەکان شەقامەکان هەناسەیان بۆ نەئەدرا زۆر گۆڕەپان وەختێ هەوایان لێبڕا بوورانەوە زۆر نەونەمام هەر بوون بە ژێر دەست و پێوە لەبەر شەهید زیندوو ڕێگەی نەبوو دەرچێ چایخانەکان لەبەر جامانە و تەزبیح و قەمسەڵەی زەیتوونیی ئەوان یەک کورسی چۆڵیان تیا نەما بەردەمی ئەمنە سوورەکە ئەتوت شەفەق تیا ڕژاوە ئاڵ ئەچووەوە لەبەر سروودی ئەی ڕەقیب هەرچی گۆرانی غەزەلە دیار نەمابوون ساڵی دووهەم گەڕانەوەی قوربانییەکان وەک هاتنەوەی حاجی لەق لەق یان گەڕانەوەی هۆنراوەی پێنج خشتەکی کەم بوونەوە ساڵی سێهەم و چوارەم و بەرەو ژوورتر شەقام چۆڵ و بازاڕ چۆڵ و چایخانە چۆڵ گەڕانەوەی برینەکان وەکوو پەپووسڵێمانکە کەم ئەبینران هەر بە نامە لە ئێمەیان ئەپرسییەوە ئەیاننووسی: بۆ بێینەوە؟ لەبەر کۆپی کردنەوەی سەرمان و لەبەر تەزویری دەنگمان و تێکەڵبوونی چاوی ئێمە و چاوی گورگ و گۆڕینەوەی دەستی ئێمە و دەستی کورسی لەگەڵ یەکا بۆ بێینەوە؟ بۆچی لەبەر عەلەشیشی بۆینباخی سوور لە مل و لەبەر فیزی کەڵەشێری شەبقە بەسەر لەبەر تاوسی پڕگیڤی لەخۆبایی تەلارەکان ڕێ بەر چۆلەکە و ڕیشۆڵەی خانووە قوڕەکان ئەکەوێ؟ بۆچی لەبەر ڕیزی علووج ڕێ بەر شەهیدان ئەکەوێ؟ وا ئێستاکەش من خۆم ئەچم بە مشتەکۆڵەی قەسیدەم یەکە یەکە لە دەرگای خوێنیان ئەدەم و بە دەنووکی وشەکانم لە شووشەی پەنجەرەی زامیان بەڵام کەسیان نایکەنەوە من تەریق تەریق ئەبمەوە لەم دیوەوە خۆم گوێم لێیە ئەو دەنگە باش ئەناسمەوە هەر دەنگی شەهید خۆیەتی وەختێ ئەڵێ: ئەو دەرگایە مەکەنەوە و پێیان بڵێن: لێرە نییە...
Şehîdan dergaman lê nakenewe Hemû salê Le yadî şekiraw xwardinewey raperîn û azadîya Qurbanîyekan yeke yeke be xoyan û gulî jaley ser singyan û Baweşî pir’estêrewe egerênewe bo malê. Salî yekem şarekeman cimey ehat Le cirîwey xemî sûr û Leber baweşpyakirdin û maçî ewan Leber hat û çoy pepûle û Leber xonîşandanî hezaran gulehêro û dar’erxewan Leber qirîwey birîn û têkrijanî darhenar û gêlasekan Şeqamekan henaseyan bo ne’edra Zor gorepan Wextê hewayan lêbra Bûranewe Zor newnemam her bûn be jêr dest û pêwe Leber şehîd Zîndû rêgey nebû derçê Çayxanekan Leber camane û tezbîh û qemseley zeytûnîy ewan Yek kursî çolyan tya nema Berdemî emne sûreke etut şefeq tya rijawe Al eçuwewe Leber sirûdî ey reqîb Herçî goranî xezele dyar nemabûn Salî dûhem Geranewey qurbanîyekan Wek hatnewey hacî leq leq Yan geranewey honrawey pênc xiştekî Kem bûnewe Salî sêhem û çwarem û berew jûrtir Şeqam çol û bazar çol û çayxane çol Geranewey birînekan Wekû pepûslêmanke kem ebînran Her be name le êmeyan epirsîyewe Eyannûsî: bo bêynewe? Leber kopî kirdinewey serman û Leber tezwîrî dengiman û Têkelbûnî çawî ême û çawî gurg û gorînewey destî ême û destî kursî legel yeka Bo bêynewe? Boçî leber ’eleşîşî boynbaxî sûr le mil û Leber fîzî keleşêrî şebqe beser Leber tawsî pirgîvî Lexobayî telarekan Rê ber çoleke û rîşoley Xanuwe qurekan ekewê? Boçî leber rîzî ’ilûc Rê ber şehîdan ekewê? Wa êstakeş Min xom eçim Be miştekoley qesîdem yeke yeke Le dergay xwênyan edem û Be denûkî wişekanim Le şûşey pencerey zamyan Belam kesyan naykenewe Min terîq terîq ebmewe Lem dîwewe xom gwêm lêye Ew denge baş enasmewe Her dengî şehîd xoyetî Wextê elê: Ew dergaye mekenewe û Pêyan bilên: Lêre nîye...