Amin Gardiglani
برین تاکوو چەک بیکەن لە کوردستانەکەم گێرەی برین پڕ دەبێ ئاسمانەکەم بێ شک لە ئەستێرەی برین گوللە تا زیاتر ڕەگاژۆ کات لە گۆشت و ئێسکما گەشتر و چڕتر دەبێ ئەم پیرە زەنوێرەی برین خوێن دەڵێنن دەشت و شاخ و ماڵ و کۆڵان و شەقام بست بە بست دەڕوێن لەسەر ئەم خاکە شللێرەی برین تاکوو دەریا لووشەری جەستەم بێ ویشکە سوێترە جەرگی دەبڕم بەو کفارەی ڕۆندکە سوێرەی برین بۆیە چێشکەی شلکی وەک "ئایلان"ی پێ قووت نادرێ قوڕگی گرت خوێناوی خەستی پڕ کەف و لێرەی برین گڕ دەھاوێژێ قەمۆچکەی گڕپژێنی دژ ڕەوێن مێشک و سینگی شەوپەرست ئامانجە بۆ سێرەی برین غیرەتی شەنگال و کۆبانیی لە دڵدا کۆوەبوون گشت جیھانی ڕاپەڕاندن زایەڵەی چوێرەی برین تاکوو قووڵتر بێ برینم پڕوزە و ئاشقترم با لەسەر سنگم چەکی دنیا بکەن گێرەی برین فەرهەنۆگۆک: وشکەسوێ: زۆر تینوو، سیوشکە. ڕۆندک: فرمێسک، ئەسرین. چێشکە: چێشتە. لێرە: زنچکاو. قەمۆچکە: زارکی گڕپژێن. چوێرە: قیژە و هەرا، هاوار و گریان
Birîn Takû çek bîken le kurdistanekem gêrey birîn Pir debê asmanekem bê şik le estêrey birîn Gulle ta zyatir regajo kat le goşt û êskima Geştir û çirtir debê em pîre zenwêrey birîn Xwên delênin deşt û şax û mal û kolan û şeqam Bist be bist derwên leser em xake şillêrey birîn Takû derya lûşerî cestem bê wîşke swêtre Cergî debirim bew kifarey rondike swêrey birîn Boye çêşkey şilkî wek "aylan"y pê qût nadrê Qurgî girt xwênawî xestî pir kef û lêrey birîn Gir dehawêjê qemoçkey girpijênî dij rewên Mêşk û sîngî şewperist amance bo sêrey birîn Xîretî şengal û kobanîy le dilda kowebûn Gişt cîhanî raperandin zayeley çwêrey birîn Takû qûltir bê birînim piruze û aşqitrim Ba leser singim çekî dinya biken gêrey birîn Ferhenogok: Wişkeswê: zor tînû, sîwişke. Rondik: firmêsk, esrîn. Çêşke: çêşte. Lêre: ziniçkaw. Qemoçke: zarkî girpijên. Çwêre: qîje û hera, hawar û giryan