Hama Jaza
هەموو تۆسقاڵێکی لەشی خۆت کرد بە پێ و هەر نەگەیشتی بە هەواری ست فاتیمەکەی جاری جاران هەموو تۆسقاڵێکی هەستی خۆت کرد بە چاو و جارێکی تر کەوی نیگات تێری نەخوارد لە بۆنی بارانی کوردستان هەموو تۆسقاڵێکی دڵی خۆت کرد بە دەست و نەگەیشتییە پرچی کچێکی کوێستان ئاخ هەموو تۆسقاڵێکی گیانی خۆت کرد بە باڵ و هەڵفڕیت و هەڵفڕیت و هەڵفڕیت تۆ هەر نەگەیشتی بە سەیوان ئاخ هەموو تۆسقاڵێکی لەشی خۆت کرد بە دەنگ و گۆرانیت وت دەنگت زریانی شەو بردی و نەگەیشتییە مناڵانی وڵاتێکی بێ ئاو و نان ئاخ تۆ ڕۆییت و لە کیشوەری نامۆییدا پەنجەکانی خۆتت کردە جێی برین و کڕووزە و ژان تۆ ڕۆییت و هەموو شاخ و داخەکانی ئەم وڵاتە لە دوات کشان گردەڵان و مەلەکانی شەوی وڵاتی بەفر سەرەڕۆن لە دوات بڕ بڕ چەپکەگوڵیان بۆ هێناوی گوڵی *؟ دڵی بەردی ست فاتیمەش توایەوە بوو بە ئاو دڵۆپ دڵۆپ بۆت دەگەڕان بە هەزار چاو ئەی تۆ نەبووی ساڵەهای ساڵ ست فاتیمەت خۆش دەویست و بۆی دەگریای وەکوو مناڵ بۆ جێت هێشت و هەموو بەفری ئەم کوێستانەت زویر کرد و خەندەی هەموو هەژارانی ئەم وڵاتەت خستە ناخی سیروانەوە بۆ ئەوپەڕی زەوی چوو ئاخ تۆ بڕۆیت و لە شەوانی بەستەڵەکی بێ دەروازەی نامۆییدا ڕەق هەڵبێیت و تابوتەکەت داری بەڕووی هەڵگورد نەبێ ئاخ تۆ بمریت و لاشەکەشت بۆ کورد نەبێ چاوەکانت هەڵوەرێنی لەودیو شوورەی غەریبیدا ئای بە دەستە بێ دەستەکانی خۆت هەر لە دەرگای زامەکانی خۆت بدەیت و نەکرێیتەوە تۆ بمریت تاکوو گڵکۆی گۆڕەکەشت لە بریسکەی خۆرەتاوی کوردستاندا نەشنێتەوە ئەی ئیتر کێ لە ڕەشەبای سووری ئەوینی چاوەنواڕیی ست فاتیمەدا بتوێتەوە ئەی ئیتر کێ وەک تۆ شەیدای چاوی مەستی ست فاتیمە بێ و لە دڵۆپەی خوێنی ئەوینی دڵی خۆی شیعری بۆ بهۆنێتەوە ئەی تۆ نەبووی بزەیێکی ست فاتمە و نیگایێکی چاوەکانی کەژی دڵتیان سیخناو دەکرد لە پۆڕی وشە و گۆرانی ئەی ئیتر بۆچی نایەی بۆ شارەکەی جارانی خۆت لاشەت لە ناو بەستەڵەکی هەندرێندا بنێژی ئەی بۆ نایەی چەمی قووڵی خوێنی خۆت بەسەر دار و بەرد و گەردی نیشتیماندا بڕێژی بۆ چاوە مەستەکانی ست فاتیمەکەت هەڵبەستی تازە بێژی ئەگەر لێرە چاوەکانت لێک بنێی و لە سەیواندا لە هەر شوێن و قورژبنێکی شاری بەفر و ئەرخەواندا تۆ سێبەری داربەڕووی ئەستوور و کۆن بکەی بە کەپرێ بۆ خۆت ئاخ زستان چۆلەکەی باران پۆل پۆل هەموو قەفەسەی هەور دەشکێنن لق و چڵی داربەڕووەکەت ماچ دەکەن و شیعرەکانت زەنگۆڵ زەنگۆڵ بە دەورتا ئەپرژێنن بۆنی پرچینی ست فاتیمەش لە باکانی سلەیمانی دەدزن و بۆ تۆی دێنن ئاخ لە وڵاتی غەریبیدا کێ دەتناسێ کێ دەزانێ تۆ شاعیری وڵاتێکی هەزار هەزار بەردە قارەمانی تیایە کێ دەزانێ دڵی پیرت هەزار هەزار شیعری تەڕ و جوانی تیایە ئای کە مردیشی کێ دەزانێ لە ژێر گڵکۆکەی تۆدا گیانێک دەنوێنێ و نەخشەی وڵاتێکی تیایە چەقۆی ستەم ئەیکێڵێت و ئەیگڕوێ ئەگەر لێرە چاوەکانت لێک بنێی بە تنۆکی بەستەی سیروان دەشۆرێی و تۆ لە ست فاتیمە زویر بووی ئیتر بۆچی لە تانجەڕۆ و مامەیارەش هەر دەتۆرێی ئاخ ئێ خۆ من گشت کچەکانی ئەم وڵاتە دڵمیان وەکوو یەک ئەشکان نەتۆرام و هەر نەتۆرام باوەش کرد بە هەوار و گوڵ و دڕکی ئەم وڵاتە ئاگرەدا بە دەستی زام ئای نە من ناڕۆم نە من ناڕۆم من نامەوێ لە وڵاتی نامۆییدا دوور لە یاران بمرم و سەر بنێمەوە من دەمەوێ وەک بەفری کۆن لە کەژێکی کوردستاندا نەختە نەختە بتوێمەوە ئاخ بڕژێم بە ڕەگ و ڕیشەی دارهەنارێ کە سبەینێ گوڵەکانی بۆ خۆی دەکا بە ملوانکە کچی ماڵەهەژارێ
Hemû tosqalêkî leşî xot kird be pê û Her negeyştî be hewarî sit fatîmekey carî caran Hemû tosqalêkî hestî xot kird be çaw û Carêkî tir kewî nîgat têrî nexward le bonî baranî kurdistan Hemû tosqalêkî dilî xot kird be dest û Negeyştîye pirçî kiçêkî kwêstan Ax hemû tosqalêkî gyanî xot kird be bal û Helfirît û helfirît û helfirît To her negeyştî be seywan Ax hemû tosqalêkî leşî xot kird be deng û Goranît wit Dengit ziryanî şew birdî û negeyştîye minalanî wilatêkî bê aw û nan Ax to royît û le kîşwerî namoyîda pencekanî xotit kirde cêy birîn û kirûze û jan To royît û hemû şax û daxekanî em wilate le dwat kişan girdelan û melekanî şewî wilatî befir Sereron le dwat bir bir Çepkegulyan bo hênawî gulî *? Dilî berdî sit fatîmeş twayewe bû be aw Dilop dilop bot degeran be hezar çaw Ey to nebûy salehay sal Sit fatîmet xoş dewîst û boy degryay wekû minal Bo cêt hêşt û hemû befrî em kwêstanet zwîr kird û Xendey hemû hejaranî em wilatet xiste naxî sîrwanewe Bo ewperî zewî çû Ax to biroyt û le şewanî bestelekî bê derwazey namoyîda Req helbêyt û tabuteket darî berûy helgurd nebê Ax to bimrît û laşekeşt bo kurd nebê Çawekanit helwerênî lewdîw şûrey xerîbîda Ay be deste bê destekanî xot her le dergay zamekanî xot bideyt û nekirêytewe To bimrît takû gilkoy gorekeşt le birîskey xoretawî kurdistanda neşnêtewe Ey îtir kê le reşebay sûrî ewînî çawenwarîy sit fatîmeda bitwêtewe Ey îtir kê wek to şeyday çawî mestî sit fatîme bê û Le dilopey xwênî ewînî dilî xoy şî’rî bo bihonêtewe Ey to nebûy bizeyêkî sit fatme û nîgayêkî çawekanî kejî diltyan sîxnaw dekird Le porî wişe û goranî Ey îtir boçî nayey bo şarekey caranî xot Laşet le naw bestelekî hendirênda binêjî Ey bo nayey çemî qûlî xwênî xot Beser dar û berd û gerdî nîştîmanda birêjî Bo çawe mestekanî sit fatîmeket helbestî taze bêjî Eger lêre çawekanit lêk binêy û le seywanda Le her şwên û qurijbinêkî şarî befir û erxewanda To sêberî darberûy estûr û kon bikey be keprê bo xot Ax zistan çolekey baran pol pol hemû qefesey hewr deşkênin Liq û çilî darberuweket maç deken û Şî’rekanit zengol zengol be dewrta epirjênin Bonî pirçînî sit fatîmeş le bakanî sileymanî dedzin û bo toy dênin Ax le wilatî xerîbîda kê detnasê Kê dezanê to şa’îrî wilatêkî hezar hezar berde qaremanî tyaye Kê dezanê dilî pîrit hezar hezar şî’rî ter û cwanî tyaye Ay ke mirdîşî kê dezanê le jêr gilkokey toda gyanêk denwênê û nexşey wilatêkî tyaye Çeqoy sitem eykêlêt û eygirwê eger lêre çawekanit lêk binêy Be tinokî bestey sîrwan deşorêy û To le sit fatîme zwîr bûy îtir boçî le tancero û mameyareş her detorêy Ax ê xo min gişt kiçekanî em wilate dilmyan wekû yek eşkan Netoram û her netoram Baweş kird be hewar û gul û dirkî em wilate agireda be destî zam Ay ne min narom Ne min narom Min namewê le wilatî namoyîda dûr le yaran bimirim û ser binêmewe Min demewê wek befrî kon le kejêkî kurdistanda nexte nexte bitwêmewe Ax birjêm be reg û rîşey darhenarê Ke sibeynê gulekanî bo xoy deka be milwanke kiçî malehejarê