Celal Melekşa
خۆشەویستی من چۆن بەرایی دا چاوەکانت وا ببینێ من بە تەنیایی؟ خۆ دڵی من کۆتری بن گوێسوانەی چاوەکەی تۆ بوو نەتەزانی من بە بێ تۆ ڕۆحی نەسرەوتم؟ وەک گوڵی نێو شۆرەکاتی وەرزی بێباران زڕ دەژاکێ سیس دەبێ دەمرێ سەد مخابن من ئەوینداری هەژار و تۆ لە خۆبایی ئێستە سەرگەردان وا دەپێوم کوێرەڕێی سەختی ژیانی تووش توێشە خاڵی دەس بەتاڵ و قاڵبێکی بێدڵ و هەستم ئیتر ئەم تاڵاوە بادەش ئۆقرە نابەخشێ من تەژی دەردم نوقمی هاڵاوی خەیاڵم شاعیرێکی شەوگەڕی مەستم ڕەنگە نەمناسیتەوە ئەم جارە بمبینی بەفری وەرزی خەم دۆڵی دڵمی کردووە جێگەی ڕنووی ماتەم ون بووە سیمای زەمانی لاوەتیم تەنیا تاپۆیەک ماوە تاپۆیێکی نێو مژێکی خۆڵەمێشیی خەم ڕەنگە چارەنووسی من وا بێ وەک چلۆن تەنیا لە دایک بووم هەر بە تەنیاش ڕابوێرم ژین تازە ئاخر هەر بە تەنیایی سەر بنێمە باوەشی مەرگ و بایەقوش لە کاولاشی نێو دڵی خۆمدا بۆم بخوێنێ سوورەتی یاسین خۆشەویستم کاتێ من مردم قەت مەپرسە چۆن بە بێ تۆ ژینم تێپەڕ کرد ژین نەبوو هەر ساتە مەرگێ بوو قەت هەواڵی شوێنی مەرگ و گۆڕەکەم لە کەس مەپرسە بەس من بەڵێنم بردە سەر پەیمانەکەم نەشکاند کاتی مەرگیش دوا هەناسەم هەر بە یادی تۆوە هەڵکێشا دوا وشەم هەر ناوی تۆ هەر ناوی تۆ هەر ناوەکەی تۆ بوو
Xoşewîstî min Çon berayî da Çawekanit wa bibînê min be tenyayî? Xo dilî min Kotrî bin gwêswaney çawekey to bû Netezanî min be bê to Rohî nesrewtim? Wek gulî nêw şorekatî werzî bêbaran Zir dejakê sîs debê demrê Sed mixabin Min ewîndarî hejarû to le xobayî Êste sergerdan Wa depêwim kwêrerêy sextî jyanî tûş Twêşe xalî Des betalû qalbêkî bêdlû hestim Îtir em talawe badeş oqre nabexşê Min tejî derdim Nuqmî halawî xeyalim Şa’îrêkî şewgerî mestim Renge nemnasîtewe em care bimbînî Befrî werzî xem Dolî dilmî kirduwe cêgey rinûy matem Win buwe sîmay zemanî lawetîm Tenya tapoyek mawe Tapoyêkî nêw mijêkî xolemêşîy xem Renge çarenûsî min wa bê Wek çilon tenya le dayk bûm Her be tenyaş rabwêrim jîn Taze axir her be tenyayî Ser binême baweşî mergû Bayequş le kawlaşî nêw dilî xomda Bom bixiwênê sûretî yasîn Xoşewîstim katê min mirdim qet mepirse Çon be bê to jînim têper kird Jîn nebû her sate mergê bû Qet hewalî şwênî mergû Gorekem le kes mepirse Bes min belênim birde ser Peymanekem neşkand Katî mergîş dwa henasem Her be yadî towe helkêşa Dwa wişem her nawî to Her nawî to Her nawekey to bû