Aram Mistewfî
یارە ژیکەڵانەکەم! گوڵم! بە هەر نیگایێ، مەوجی چاوە مەستە جوانەکەت دەچێتە ناو دڵم! هەر بە گوێی دڵم! گوێ دەگرمە گرفە گرفی شیعرە ئاگرینەکەت شیعرە ڕێک و پێکەکەی بە تاو و تینەکەت! هەر بە چاوی دڵ دەڕوانمە دیمەنی ئەوینەکەت! تۆ! ئەوینمی ڕێک و پێکترینە شیعری تاکوو ئێستا هەڵنەبەستراوی ژینمی! تۆ! هەڵۆی خەیاڵی هەڵفڕینمی! هەر دەکەومە سەر هەوا، بە هەڵفڕینەکەت! بە جازیبەی ڕەوەندی تێپەڕینەکەت! بە شیعری باڵی چەندە ڕەنگی تاوسی خەیاڵ بە خوێندنەوەی سروودی مەرگی کۆرپە نازەنینەکەت مەرگی کۆرپە نازەنینەکەت لادە لادە لادە لادە لادە لەچکە تەسکە کەسکەکەت! خۆشەویستەکەم! عەزیزەکەم! گەزیزەکەم! تاقە ڕۆڵە جوانەمەرگەکەی بەهاری کورت! ڕۆڵە خۆشەویستەکەی تەلان و کێو و چەم! تۆ! هەزار ئایەتی، لە کانیاوی پڕ لە ئاو و خیزەکەم! لە کاتی تونییایەتی بە چەشنی بیری بەرزەفڕ، بێ سنوور و بێ نیهایەتی تۆ! قیامەتی! دڵستێن و دڵڕفێن و خەوڕەوێنمی! تۆ! تەواونوێنی عەشقی پاک و خەمڕەوێنمی! تۆ! پەل و نەمام ڕاوەشێنی باخی بادەهێنمی! تێکەڵاوی گوشت و پێست و ئێسک و خوێنمی! خوێنی خوێنەکەم! هیچ وەبیرتە ئەو دەمەی کە کەوتمە جەغزی کەسکە کەسکی چاوە مەستە کەسکەکانی پڕ لە سیحر و جوانیی تۆ؟ بوومە مەستی مەست و سێحری سێحری چاوە مەستەکانی تۆ؟ دەستی خۆم بڕی! دەستی خۆم بڕی بە بەژنی باڵی شیعری ئاڵی تەمنیشانی تۆ بۆیە کورتە دەستی ئەمن و خوێن دەبارێ هەر لە هەوری ئاسمانی مانی تۆ جوانە بووکەکە! هەر هەنووکە دەمهەوێ کە بێمە جێژوانی تۆ مەرگی کۆرپە نازەنینەکەت لادە لادە لادە لادە لەچکە تەسکە کەسکەکەت! ها ترووسکەکەم جامی دڵ پڕی شەڕابی شەوقی شیعری شەو شەوە بەو نیگایە پاکە مەندەیەت وەسوەسەی دڵی پڕم هەلاهەلا کە، ببیە شیعرەکەم! ببیە شیعرەکەم تا کە ڕۆشنایی خاتە هەوری دڵ برووسکەکەت تا ڕەها بێ گوڵپەڕی خەیاڵی ناسکی تاسکە تاسکی ئاسکی باسکی بسکەکەت لادە لادە لادە لادە لەچکە تەسکە کەسکەکەت!
Yare jîkelanekem! gulim! Be her nîgayê, mewcî çawe meste cwaneket deçête naw dilim! Her be gwêy dilim! Gwê degirme girfe girfî şî’re agirîneket Şî’re rêk û pêkekey be taw û tîneket! Her be çawî dil derwanme dîmenî ewîneket! To! ewînmî Rêk û pêktirîne şî’rî takû êsta helnebestirawî jînmî! To! heloy xeyalî helfirînmî! Her dekewme ser hewa, be helfirîneket! Be cazîbey rewendî têperîneket! Be şî’rî balî çende rengî tawsî xeyal Be xwêndinewey sirûdî mergî korpe nazenîneket Mergî korpe nazenîneket Lade lade lade lade lade leçke teske keskeket! Xoşewîstekem! ’ezîzekem! gezîzekem! Taqe role cwanemergekey beharî kurt! Role xoşewîstekey telan û kêw û çem! To! hezar ayetî, le kanyawî pir le aw û xîzekem! Le katî tunîyayetî Be çeşnî bîrî berzefir, bê sinûr û bê nîhayetî To! qyametî! Dilistên û dilrifên û xewrewênmî! To! tewawniwênî ’eşqî pak û xemrewênmî! To! pel û nemam raweşênî baxî badehênmî! Têkelawî guşt û pêst û êsk û xwênmî! Xwênî xwênekem! Hîç webîrte ew demey ke kewtime cexzî keske keskî çawe meste keskekanî Pir le sîhir û cwanîy to? Bûme mestî mest û sêhrî sêhrî çawe mestekanî to? Destî xom birî! Destî xom birî be bejnî balî şî’rî alî temnîşanî to Boye kurte destî emin û xwên debarê her le hewrî asmanî manî to Cwane bûkeke! Her henûke demhewê ke bême cêjwanî to Mergî korpe nazenîneket Lade lade lade lade leçke teske keskeket! Ha tirûskekem Camî dil pirî şerabî şewqî şî’rî şew şewe Bew nîgaye pake mendeyet Weswesey dilî pirim helahela ke, bibye şî’rekem! Bibye şî’rekem Ta ke roşnayî xate hewrî dil birûskeket Ta reha bê gulperî xeyalî naskî Taske taskî askî baskî biskeket Lade lade lade lade leçke teske keskeket!