Ebdula Peşêw
مناڵەکان! ئەی یاخییە ژینتاڵەکان سبەی ئێوە کە پێئەگەن لە لاوکا، لە حەیرانا لە مزگەوت و دیوەخانا لە چیڕۆکا لە هۆنراوەی شاعیرێکی ترسنۆکا ڕەنگە زۆرتان بەرگوێ کەوێ باسی ئێمە و ئازایەتی بەڵام نەکەن بڕوا بکەن هەمووی درۆن، درۆی پەتی! مناڵەکان مناڵەکان ئێمە تووشی سەد کوێڕەڕێین چرای بیرمان ئێجگار کزە هەنگاوی کوێرانە ئەنێین! مناڵەکان! لە وانەکانی دوێنێما گوتم ئێمە، لەوەتی هەین درۆ لەگەڵ خۆمان ئەکەین لە ژینمانا لە کردەوە و نووسینمانا، بێ فەلسەفەین! ئەمەم گوت و دنیا ڕما هەوری تانە بەرەو ئاسۆی بیرم جما! مناڵەکان! توخوا بچن بپرسن لێیان بپرسن لەوانەی چاویان تینی ناگاتە بەر پێیان مەترسن، بپرسن، بڵێن: لە سەفەری دوورگەی خوێنا بۆ مناڵان چیتان هێنا پێمان بڵێن، چیتان هێنا!؟ ئەوەی دەنکەگەنمێکی چاند گوڵەگەنمی دروێنە کرد ئەوەی دڵۆپێک خوێنی چاند تابلۆیەکی بۆ خۆی نەخشاند ئەوەی تەنیا هاوارێکی لە دەم دەرچوو گوێی لە سەدای دەنگی خۆی بوو کەچی ئێمە کاسەسەر و چاو ئەچێنین بارانی خوێن بەسەریانا ئەبارێنین هێشتا وەرزی دروێنەشمان دیار نییە تا گوڵەگەنمێک کێڵگەی ئەو خوێنەشمان دیار نییە! مناڵەکان! زۆر لەمێژە دایکەکانی ئەم وڵاتە مەمکەکانیان شیری سەربەستی تیا قاتە زۆر لەمێژە کێوەکانی ئەم وڵاتە پێغەمبەرێکیان تیا قاتە! مناڵەکان! لە ئاگردانی چاوتانا من چاوەڕێی زەردەشتێکم بێ، جێ بەو بتانە لەق کا من چاوەڕێی چەخماخەی ئاڤێستایەکم بێ جەرگی تاریکی شەق کا
Minalekan! Ey yaxîye jîntalekan Sibey êwe ke pê’egen Le lawka, le heyrana Le mizgewtû dîwexana Le çîroka Le honrawey şa’îrêkî tirsinoka Renge zortan bergiwê kewê Basî êmew azayetî Belam neken birwa biken Hemûy diron, diroy petî! Minalekan Minalekan Ême tûşî sed kwêrerêyn Çiray bîrman êcgar kize Hengawî kwêrane enêyn! Minalekan! Le wanekanî dwênêma Gutim ême, lewetî heyn Diro legel xoman ekeyn Le jînmana Le kirdewew nûsînmana, bê felsefeyn! Emem gutû dinya rima Hewrî tane berew asoy bîrim cima! Minalekan! Tuxwa biçin bipirsin lêyan Bipirsin lewaney çawyan tînî nagate ber pêyan Metirsin, bipirsin, bilên: Le seferî dûrgey xwêna Bo minalan çîtan hêna Pêman bilên, çîtan hêna!? Ewey denkegenmêkî çand Gulegenmî dirwêne kird Ewey dilopêk xwênî çand Tabloyekî bo xoy nexşand Ewey tenya hawarêkî le dem derçû Gwêy le seday dengî xoy bû Keçî ême Kaseserû çaw eçênîn Baranî xwên beseryana ebarênîn Hêşta werzî dirwêneşman dyar nîye Ta gulegenmêk kêlgey ew xwêneşman dyar nîye! Minalekan! Zor lemêje daykekanî em wilate Memkekanyan Şîrî serbestî tya qate Zor lemêje kêwekanî em wilate Pêxemberêkyan tya qate! Minalekan! Le agir idanî çawtana Min çawerêy zerdeştêkim Bê, cê bew bitane leq ka Min çawerêy Çexmaxey avêstayekim Bê cergî tarîkî şeq ka