Ebdula Peşêw
دەستم گوتیە پەنجەکانم: «با لە مەیدان بتانبڕن بەڵام هەرگیز نەتانکڕن» دەمیشم گوتیە زمانم: «من بە درێژی تۆ دەخوڕم مەپرینگێوە بئەنگێوە! سەروبەر بکەی دەتبڕم» گەڕام سووڕام بە دنیادا... چەند شار ویستیان کچ ئاسایی بێنە دەستم بەڵام بووکی دیلی ئاسیا نەیهێشت شایی لەگەڵ هیچیان داببەستم! ڕۆژباش پەنجەکانم ڕۆژباش! سپاس پەنجەکانم سپاس! هەتا ئەمڕۆ ئێوە چەند جار چوونە مەیدان درانە بەر شیر و تیران بریندار بوون گلانە خوار بەڵام بە دیل قەت نەگیران! ڕۆژباش زمانەکەم ڕۆژباش! سپاس زمانەکەم سپاس! تا ئێستا چەند جارت بەزاند کەوشەنی پاوانی گەوران! چەند جار بە ناو کێردەڵانا ڕچەت شکاند کەوتیتە کەمینی تەوران! چەند جار دەرزیئاژن کرای لە خاچی ڕاست و چەپ درای! بەڵام سپاس سپاس کە تۆ هەر زمانی و دەستت نەدا کارێکی تر هەر کلیلی سەری خۆمی و نەچوویتە ناو زارێکی تر سپاس کە تۆ لەناو سەنگەری دەممدا چەکی «نا»ت هەر لە سەر پێیە لە کاتێکدا دەست بۆ چەپڵە و دەمیش تەنیا بۆ «بەڵێ»یە!
Destim gutye pencekanim: «ba le meydan bitanbirn Belam hergîz netankirn» Demîşim gutye zimanim: «min be dirêjî to dexurim Meprîngêwe bi’engêwe! Seruber bikey detbirim» Geram sûram be dinyada... Çend şar wîstyan kiç asayî bêne destim Belam bûkî dîlî asya neyhêşt şayî legel hîçyan dabbestim! Rojbaş pencekanim rojbaş! Sipas pencekanim sipas! Heta emro êwe çend car çûne meydan Dirane ber şîrû tîran Birîndar bûn gilane xwar Belam be dîl qet negîran! Rojbaş zimanekem rojbaş! Sipas zimanekem sipas! Ta êsta çend carit bezand Kewşenî pawanî gewran! Çend car be naw kêrdelana riçet şikand Kewtîte kemînî tewran! Çend car derzî’ajin kiray Le xaçî rastû çep diray! Belam sipas Sipas ke to her zimanîw Destit neda karêkî tir Her kilîlî serî xomîw Neçûyte naw zarêkî tir Sipas ke to lenaw sengerî demmida Çekî «na»t her le ser pêye Le katêkda dest bo çeplew Demîş tenya bo «belê»ye!