Ebdula Peşêw
با کەس ڕەخنەیان لێ نەگرێ! هەرچی دەیکەن، پاکە وەک نوێژ هەرچی دەیڵێن، وەک گەوهەرە! دیالێکتیک، سەرمایەی مارکس فەرموودەی «ماو» یان لەبەرە! ئەورووپایان هەموو دیوە کە دێنە گۆ بۆ ڕۆژنامان؛ پەیڤێک زێڕە و یەکێک زیوە! لەندەن، پاریس، ئەنقەرە، شام یەکە یەکە پایتەختەکانی هەندەران شارەزاترن لە شێخەڵڵا و سابوونکەران چاک دەزانن کە ئەورووپا بۆیاخچی پسپۆڕی دەوێ بۆ مەیخانان پیاڵە و هیرباشۆری دەوێ بۆ کۆڵکێشی بازووی زۆر بەتینی دەوێ کوردی چیایی ناولەپ زبر و شان و پیل بەردینی دەوێ! با کەس ڕەخنەیان لێ نەگرێ! دەیانناسم لە پاکیدا، چاک و پیرن لە ژیریدا، ئەنیشتاین شاگردیانە هێندە ژیرن! شارەزای مێژووی جیهانن کون بە کون، کەلێن بە کەلێن... ستڕاتیژی دوژمن تەقەی بێ جبەخانەی تاکتیک پڕە مەخزەنێکی پێوە دەنێن! دەیانناسم! لە پاکیدا، چاک و پیرن لە ژیریدا، ئەنیشتاین شاگردیانە هێندە ژیرن! بیانبینن! بزانن لە پێناو ئێمە چەند بێتووکن چەند پەڕپووت و ڕووت و گەدان چۆن شەو و ڕۆژ تەنیا لە بیری ئێمە دان! باوەڕ بکەن هەرچی دەیکەن بۆ ئێمەیە... باوەڕ بکەن هەرچی دەیڵێن بۆ ئێمەیە... هەر بۆ ئەوەی لەم ئازارە ڕزگارمان بێ هەر بۆ ئەوەی خۆشاوی شەهادەت فڕ کەین هەر بۆ ئەوەی خوێن وەکوو نان گران نەبێ و هەموو جێیەکی لێ پڕ کەین یەکێک دێنن قڕمان بکا ئەگەر نەهات؟ فێرمان دەکەن یەکتر قڕ کەین! با کەس ڕەخنەیان لێ نەگرێ! شوان هەر شوانە... پەز هەر پەزە، هەتا دەمرێ... با کەس ڕەخنەیان لێ نەگرێ!
Ba kes rexneyan lê negrê! Herçî deyken, pake wek nwêj Herçî deylên, wek gewhere! Dyalêktîk, sermayey markis Fermûdey «maw» yan lebere! Ewrûpayan hemû dîwe Ke dêne go bo rojnaman; Peyvêk zêrew yekêk zîwe! Lenden, parîs, enqere, şam Yeke yeke paytextekanî henderan Şarezatirin le şêxellaw sabûnkeran Çak dezanin ke ewrûpa boyaxçî pisporî dewê Bo meyxanan pyalew hîrbaşorî dewê Bo kolkêşî Bazûy zor betînî dewê Kurdî çyayî nawlep zibrû Şanû pîl berdînî dewê! Ba kes rexneyan lê negrê! Deyannasim Le pakîda, çakû pîrin Le jîrîda, enîştayn şagridyane hênde jîrin! Şarezay mêjûy cîhanin Kun be kun, kelên be kelên... Sitratîjî dujmin teqey bê Cibexaney taktîk pire Mexzenêkî pêwe denên! Deyannasim! Le pakîda, çakû pîrin Le jîrîda, enîştayn şagridyane hênde jîrin! Byanbînin! Bizanin le pênaw ême çend bêtûkin Çend perpûtû rûtû gedan Çon şewû roj tenya le bîrî ême dan! Bawer biken Herçî deyken bo êmeye... Bawer biken Herçî deylên bo êmeye... Her bo ewey lem azare rizgarman bê Her bo ewey xoşawî şehadet fir keyn Her bo ewey Xwên wekû nan giran nebêw Hemû cêyekî lê pir keyn Yekêk dênin qirman bika Eger nehat? Fêrman deken yektir qir keyn! Ba kes rexneyan lê negrê! Şwan her şwane... Pez her peze, heta demrê... Ba kes rexneyan lê negrê!