Ebdula Peşêw
من لەو هەموو بەختەوەرییە ڕانەهاتووم تۆ گەنجینەت خستە بەرپێم لەکاتێکدا من بە تەمای ئاوڕێک بووم تۆ گەردوونت لە ڕۆشنایی خوا هەڵکێشا لە کاتێکدا بۆ ئاورینگێک بۆ قاف دەچووم من لەو هەموو بەختەوەرییە ڕانەهاتووم! دەخیلت بم ماوەم بدە تا لێی ڕابێم زۆر دەترسم دەرنەبەم و لە بنیدا بەچۆکدا بێم هێڵێک بکێشە سنوورێک دانێ بۆ ئەو شێتییەی مەحاڵی دەوێ و سنوور نازانێ سنوورێک دانێ بۆ بزڕکاندن بۆ خەیاڵاتی هەمیشە لاوی و ڕاونانی مردن سنوورێک دانێ بۆ ئەو باڵدارە ڕەنگاوڕەنگانەی لە هەزار لاوە دادەوەرێنە سەر لک و پۆپی درەختی سەرم سنوورێک دانێ بۆ ئەو چیمەن و مێرعوزارانەی بە ڕووت و قووتی خۆ لە گەز دەدەن لە دەورووبەرم من لەو هەموو بەختەوەرییە ڕانەهاتووم چ ڕەوایە تەنیا بۆ من شەوان ئاسمان خۆی بە ئۆیە و پۆیەی ستڕەنگ بخەملێنێ چ ڕەوایە تەنیا بۆ من بەیانییان ئاونگی سەر گوڵەشیلان بزریوێنی! من لەو هەموو بەختەوەرییە ڕانەهاتووم دەخیلت بم، گەر هیچ نەبێ لێی کەم کەوە: چەند پەڕێکی هەڵوەڕێنە چەند چڵێکی لێ داپاچە ڕۆژێک، دوو ڕۆژ باڵەکانی بتارێنە جارێک، دووجار لک و پۆپە بە ئەستێرە قورسەکانی ڕاتەکێنە لەو ڕۆژەوە تەخت و تاجی مەملەکەتت داگیر کردووم سەرانسەری ئەم گەردوونە مەملەکەتمە! لەو ڕۆژەوە لە زمانی بەرد دەگەم و با دەدوێنم لەو ڕۆژەوە بە بۆن ڕەنگان لەیەک جودا دەکەمەوە و بە ئاو دنیا دەنەخشێنم لەو ڕۆژەوە تەخت و تاجی مەملەکەتت داگیر کردووم هەر پنجێک گیا با لێی بدا من لەگەڵ ئەو بەدەم باوە دەشنێمەوە... لەو ڕۆژەوە من هەسارەی بێ تەوەرم بە ئازادی بە گەردووندا دەخولێمەوە! من لەو هەموو بەختەوەرییە ڕانەهاتووم دەخیلت بم ماوەم بدە تا لێی ڕابێم... زۆر دەترسم دامڕمێنێ زۆر دەترسم دەرنەبەم و بە چۆکدا بێم
Min lew hemû bextewerîye ranehatûm To gencînet xiste berpêm Lekatêkda Min be temay awrêk bûm To gerdûnit le roşnayî xwa helkêşa Le katêkda Bo awrîngêk bo qaf deçûm Min lew hemû bextewerîye ranehatûm! Dexîlit bim Mawem bide ta lêy rabêm Zor detirsim dernebemû Le binîda beçokda bêm Hêlêk bikêşe Sinûrêk danê Bo ew şêtîyey Mehalî dewêw sinûr nazanê Sinûrêk danê Bo bizrikandin Bo xeyalatî hemîşe lawîw rawnanî mirdin Sinûrêk danê Bo ew baldare rengawrenganey Le hezar lawe Dadewerêne Ser likû popî dirextî serim Sinûrêk danê Bo ew çîmenû mêr’uzaraney Be rûtû qûtî Xo le gez deden le dewrûberim Min lew hemû bextewerîye ranehatûm Çi rewaye tenya bo min şewan asman Xoy be oyew poyey sitreng bixemlênê Çi rewaye Tenya bo min Beyanîyan Awingî ser guleşîlan bizrîwênî! Min lew hemû bextewerîye ranehatûm Dexîlit bim, ger hîç nebê Lêy kem kewe: Çend perêkî helwerêne Çend çilêkî lê dapaçe Rojêk, dû roj Balekanî bitarêne Carêk, dûcar Likû pope be estêre qursekanî ratekêne Lew rojewe Textû tacî memleketit dagîr kirdûm Seranserî em gerdûne memleketme! Lew rojewe Le zimanî berd degemû ba dedwênim Lew rojewe Be bon rengan leyek cuda dekemewew Be aw dinya denexşênim Lew rojewe Textû tacî memleketit dagîr kirdûm Her pincêk gya ba lêy bida Min legel ew bedem bawe deşnêmewe... Lew rojewe Min hesarey bê tewerim Be azadî Be gerdûnda dexulêmewe! Min lew hemû bextewerîye ranehatûm Dexîlit bim Mawem bide ta lêy rabêm... Zor detirsim damrimênê Zor detirsim Dernebemû be çokda bêm