Ebdula Peşêw
لەوەتی هەم خەو دەبینم خەونی مەخمەری خاسەڕەنگ خەونی بڵند وەک ئەستێرە خەونی تیژڕۆی وەک تیشک و دەنگ لەوەتی هەم خەو دەڕوێنم ڕۆژ لە دوای ڕۆژ، ساڵ لە دوای ساڵ خەو دەڕوێنم کەوشەن بە کەوشەن، ماڵە و ماڵ خەو دەڕوێنم هەندێ جاران کە دەنووسم پەیڤێک لێرە، یەکێک لەوێ، یاخی دەبن من پیادەم و ئەوان سوار من بێ باڵ و ئەوان باڵدار هەرچەند دەکەم نایانگەمێ هێندە سرک و دوورەدەستن کە دەڕازێم سەرم دەکەن بە پلوورە و شانەی شەعر هەڵدەبەستن جار هەیە، سمۆرەیەکی سرک و قیتەڵ ئەم چڵ، ئەو چڵ، لێم ڕادەکا هەر کە خەوم لێ دەکەوێ بە پێی خۆی دێ لەسەر لەپم سەما دەکا جار هەیە جەنگی ئەستێران، چڕنۆبل، هەڵەبجەی وێران، دەمامکەکەی مایکڵ جاکسن، لە شووشەدا مرۆڤ چاندن، ئینتەرنێت و کونتێبوونی چینی ئوزۆن ڕاوم دەنێن دەمتۆقێنن کە دەڕازێم گەردوون بەهەشتی سەرمۆرە ئەستێرەکان یەکەم شەوە تاریکایی دەترووکێنن یەکەم وەرزە وەکوو بەهێ، بە پەل و پۆی ئاسمانەوە دەزریوێنن کە بێدارم دەبینم چەند تنۆکە ئاوێکی زەندەقچووی بەر هەتاوین کە دەڕازێم دەبینم تیشکی خۆر دەخۆینەوە خوڕەمان دێ، شەتاوین لەوەتی هەم خەو دەبینم ساتەوەختێک ئازیزەکەی ئەوێم کیژە ئەسمەرەکەی هەولێر لە فڕگەدا چاوەڕێمە هەر خۆی و باقەیێک کنێر پێش ئەوەی ماچبارانی کەم یا توند لە ئامێزی بگرم لێم دەپرسێ چۆن بە سەرچوو کۆڕی شعری دیاربەکرم ساتێکی تر لەو خەوەدا لە مەهاباد نەرمەشعر دەخوێنمەوە قامشلوو بۆم لە قرمژنی چەپڵە دەدا من هەر وا بووم ئێستاش هەر وام لەوەتی هەم خەو دەبینم لەوەتی هەم خەو دەڕوێنم ساتەوەختێک بە دەستێکم شواری کێوی حەمرین دەگرم دەستەکەی دیم، شانەیەکە وردەپێلی گۆلی «وان»ی پێ دادێنم ساتێکی تر پێیەکم لە هەورەمانە ئەوی ترم بەرەو عەفرین سووک هەڵدێنم تا دەستماڵی سیاچەمانە لە گەردنی کێلی بئاڵێنم لەوەتی هەم خەو دەبینم لەوەتی هەم خەو دەڕوێنم ساتێک، لەوێ لە پۆستەخانەی بایەزید دەبینم حەزرەتی خانی خەرمانەی نوور دەوری داوە لێی دەچمە پێش سام دەمگرێ سەرنج دەدەم ئەویش وەک من شڵەژاوە من لە شەرمی گەورەیی ئەو ئەویش تا بە ئێکسپرێس کەوش و کاڵەک بۆ فەقێ کۆییەکەی خۆی ڕەوان بکا بەرەو باڵەک لەوەتی هەم خەو دەبینم لەوەتی هەم خەو دەڕوێنم نیوەشەوێک لە خەومدا برووسکە لێی دام و مردم هاوڕێیانم لە سێبەری دارەبەنێک لەسەر تاتەشۆرێکی ئاڵ تەرمەکەیان درێژ کردم ئاوەچۆڕەی دەوروبەرم پەیتا پەیتا، بوو بە جۆگە پاشان بە چەم قاز و قوڕینگ قەتاریان بەست ئاوێتە بوون پریشکی ئاو، تیشک و تەم لەو ناوەدا بێشکەی دنیای ڕادەژنی شنەبایەکی یەزدانی یاسەمەن خوناوکەی دەکرد ئاسمان پڕ بوو لە ئەستێرەی ڕەنگ قەزوانی کە کفنیشیان کردە بەرم لەپڕ کفنەکەم خۆی هەڵخەست بەرز بۆوە ڕەنگی گۆڕا بوو بە پەلکەزێڕینەیەک نەرم و شلک، ئاڵ و واڵا زۆری نەبرد هەڵیکردە کزەبا بینم پەلکەزێڕینەکە شەکایەوە، بوو بە ئاڵا لەوەتی هەم خەو دەبینم لەوەتی هەم خەو دەڕوێنم خەونی مەخمەری خاسەڕەنگ خەونی بڵند وەک ئەستێرە خەونی تیژڕەو وەک تیشک و دەنگ
Lewetî hem xew debînim Xewnî mexmerî xasereng Xewnî bilind wek estêre Xewnî tîjroy wek tîşkû deng Lewetî hem xew derwênim Roj le dway roj, sal le dway sal Xew derwênim Kewşen be kewşen, malew mal Xew derwênim Hendê caran ke denûsim Peyvêk lêre, yekêk lewê, yaxî debin Min pyademû ewan swar Min bê balû ewan baldar Herçend dekem nayangemê Hênde sirkû dûredestin Ke derazêm Serim deken be pilûrew şaney şe’ir heldebestin Car heye, simoreyekî sirkû qîtel Em çil, ew çil, lêm radeka Her ke xewm lê dekewê Be pêy xoy dê Leser lepim sema deka Car heye Cengî estêran, çirnobil, helebcey wêran, demamkekey maykil caksin, le şûşeda mirov çandin, înternêtû kuntêbûnî çînî uzon rawim denên Demtoqênin Ke derazêm Gerdûn beheştî sermore Estêrekan Yekem şewe tarîkayî detrûkênin Yekem werze wekû behê, be pelû poy asmanewe dezrîwênin Ke bêdarim debînim Çend tinoke awêkî zendeqçûy ber hetawîn Ke derazêm debînim Tîşkî xor dexoynewe Xureman dê, şetawîn Lewetî hem xew debînim Satewextêk azîzekey ewêm Kîje esmerekey hewlêr Le firgeda çawerême Her xoyû baqeyêk kinêr Pêş ewey maçbaranî kem Ya tund le amêzî bigirim Lêm depirsê Çon be serçû korî şi’rî dyarbekirim Satêkî tir lew xeweda Le mehabad nermeş’ir dexwênmewe Qamşilû bom le qirimjinî çeple deda Min her wa bûm Êstaş her wam Lewetî hem xew debînim Lewetî hem xew derwênim Satewextêk be destêkim Şwarî kêwî hemrîn degirim Destekey dîm, şaneyeke Wirdepêlî golî «wan»y pê dadênim Satêkî tir Pêyekim le hewremane Ewî tirim berew ’efrîn sûk heldênim Ta destimalî syaçemane Le gerdinî kêlî bi’alênim Lewetî hem xew debînim Lewetî hem xew derwênim Satêk, lewê Le postexaney bayezîd Debînim hezretî xanî Xermaney nûr Dewrî dawe Lêy deçme pêş Sam demgirê Serinc dedem Ewîş wek min şilejawe Min le şermî gewreyî ew Ewîş ta be êksipirês kewşû kalek Bo feqê koyyekey xoy Rewan bika berew balek Lewetî hem xew debînim Lewetî hem xew derwênim Nîweşewêk le xewmda Birûske lêy damû mirdim Hawrêyanim le sêberî darebenêk Leser tateşorêkî al Termekeyan dirêj kirdim Aweçorey dewruberim Peyta peyta, bû be coge Paşan be çem Qazû qurîng Qetaryan best Awête bûn Pirîşkî aw, tîşkû tem Lew naweda bêşkey dinyay radejnî Şinebayekî yezdanî Yasemen xunawkey dekird Asman pir bû le estêrey reng qezwanî Ke kifnîşyan kirde berim Lepir kifnekem xoy helxest Berz bowe Rengî gora Bû be pelkezêrîneyek Nermû şilk, alû wala Zorî nebird Helîkirde kizeba Bînim pelkezêrîneke Şekayewe, bû be ala Lewetî hem xew debînim Lewetî hem xew derwênim Xewnî mexmerî xasereng Xewnî bilind wek estêre Xewnî tîjrew wek tîşkû deng