Ebdula Peşêw
هەر ببارە داکە سەریان جگەرگۆشەی سەوزی پەمۆ بێهوودەیە نە خوڕڕەی خوێن تێریان دەکا، نە ڕێژنەی تۆ ئەوان خەرەندی بێبن و کەندولەندی شۆرەکاتن هەر تێیان کە پڕ نابنەوە و دەمیان بەشە وەک چۆن بەش بوو هەر کە هاتن لەو ڕۆژەوە تۆ دەباریت مینبەر نەما دەمی نەگری و لاڵی نەکەی سەنگەر نەما خۆتی تێدا خاڵی نەکەی هەڵۆ نەما لوتکەکانی پێ بەرنەدەی قەڵەم نەما ئاودەستخانەی پێ دەرنەدەی لەو ڕۆژەوە تۆ دەباریت دیواندڕی دەمهار نەما لە ئوتێلی پێنج ئەستێرە نەیخارێنی چۆڕێک ئاوی ڕۆشن نەما، پێی نەوەڕی مژێک هەوای سازگار نەما نەیتارێنی گوتم نەرمی، پەمۆزادەی کەچی هاتی شاخت بە خوێنی شاخ چەش کرد گوتم کەسکی، وەک گیا سادەی کەچی هاتی زەوی و ئاسمان سەر و بنی دنیات ڕەش کرد تۆ بالۆرە و سیاچەمانە و «دەی دەی زەردەی»ی «باڵدار»ت کوشت بۆنی چرۆی سەر قەرتاڵە و گیزەگیزی سەماوەری دەشت و دەری بەهارت کوشت تۆ بازرەقەی سوێسکە و پۆڕی قەلی چیا و بازبازێنی کارمامزی بنارت کوشت تۆ چیت نەکرد تۆ چیت نەکرد تۆ مێگەل و بەردەبێر و گاڕانت برد بە گردەوە قاڕە و باڕەت لەبیر کۆز و شیناوەردت لەبیر کێڵگە و ترێت لەبیر ڕەز بردەوە تۆ چیت نەکرد تۆ چیت نەکرد تۆ غەزەبی ئاسمانان بووی داباریت و دەمی تەوری خۆت گەیاندە بنج و بنیاد کۆت و بەندت کردە لینگی شلکە چەمی زمانی ماد شال و شەپکت لەبەر بەژنی لاوک داکەند بۆ لاکخۆران، پارچە پارچە، تیکە تیکە هەڵتخستم لەسەر تەناف تۆ حەمرینت بۆ لم ڕاخست تۆ قەراجت بردە پشت قاف تۆ چیت نەکرد تۆ «دڵدار»ت گۆڕبەدەر کرد تۆ چاوساغی شەیتانان بووی بۆ وڵاتی شۆڕەسوار و پەریزادان هەی بێ شەرەف تۆ شەرەفت کرد بە «دەفتەر» مەفتەنت کرد بە دۆشەگی بن گەوادان
Her bibare Dake seryan Cigergoşey sewzî pemo Bêhûdeye Ne xurrey xwên têryan deka, ne rêjney to Ewan xerendî bêbnû kendulendî şorekatin Her têyan ke Pir nabnewew demyan beşe wek çon beş bû her ke hatin Lew rojewe to debarît Mînber nema demî negrîw lalî nekey Senger nema xotî têda xalî nekey Helo nema lutkekanî pê bernedey Qelem nema awdestixaney pê dernedey Lew rojewe to debarît Dîwandirî demhar nema Le utêlî pênc estêre neyxarênî Çorêk awî roşin nema, pêy newerî Mijêk heway sazgar nema neytarênî Gutim nermî, pemozadey Keçî hatî şaxt be xwênî şax çeş kird Gutim keskî, wek gya sadey Keçî hatî zewîw asman Serû binî dinyat reş kird To balorew syaçemanew «dey dey zerdey»y «baldar»t kuşt Bonî çiroy ser qertalew gîzegîzî semawerî deştû derî beharit kuşt To bazreqey swêskew porî qelî çyaw bazbazênî karmamzî binarit kuşt To çît nekird To çît nekird To mêgelû berdebêrû garanit bird be girdewe Qarew baret lebîr kozû şînawerdit lebîr kêlgew tirêt lebîr rez birdewe To çît nekird To çît nekird To xezebî asmanan bûy Dabarîtû demî tewrî xot geyande bincû binyad Kotû bendit kirde lîngî şilke çemî zimanî mad Şalû şepkit leber bejnî lawik dakend Bo lakxoran, parçe parçe, tîke tîke Heltixistim leser tenaf To hemrînit bo lim raxist To qeracit birde pişt qaf To çît nekird To «dildar»t gorbeder kird To çawsaxî şeytanan bûy Bo wilatî şoreswarû perîzadan Hey bê şeref To şerefit kird be «defter» Meftenit kird be doşegî bin gewadan