Mihemed Mamlê
ڕۆڵە ڕووناکی گلێنەی چاوم بەندی جەرگ و دڵ هێزی هەناوم ڕیحانەی بۆنخۆش سوورەگوڵەکەم ئاوپڕشکێنەی کوڵی دڵەکەم چۆڵەمەی ئەستۆم ڕەگی حەیاتم هەنگوین و قەند و نوقڵ و نەباتم خەوی خێرت بێ دە بنوو درەنگە تا کەڵەبابەی بەیان بێدەنگە ئەی لایە لایە ڕۆڵە لای لایە ئەوشۆ بەزەییت بە مندا نایە ژیر بەوە ڕۆڵەی ژیر و جوانم لە داخی لانک دەگری دەزانم دەڵێی بۆ حەبسم بۆ دەستەبەستەم بەو بەند و حەبسە من جەستە خەستەم لە نێو کورد نەبێ دەسرازە نییە ئەو بەند و قوفڵ و قەڕازە نییە؟ ڕۆڵە من بیرم لە تۆ زیاترە دەسرازە و لانک بتبێ چاترە ئەی لایە لایە ڕۆڵە لای لایە مات بە پێت بڵێم لەبەر چی وایە بۆیە دەتپێچم تا خووی پێ بگری نەک تا من ماوم لە بەنددا بمری ڕاستە نەتەوەی شێری ژیانی نەتەوەی پاکی گەلی کوردانی بەڵام چونکوو کورد ئەوڕۆ بێکەسە بەشیان لە دنیا کۆت و مەحبەسە بۆ چارەڕەشیت نەماوە ژینم قەت پێم خۆش نییە مەرگت ببینم ئەی لایە لایە ڕۆڵە لای لایە هەزار تێبینی دواڕۆژم لە لایە سەد چاک و پیرت بۆ دەخولێمەوە لەبەر سێبەرت بحەسێمەوە بۆت بەخت دەکەم عومری درێژم سەد تاڵی و سوێریت لەسەر دەچێژم نەمامی باڵات بە فرمێسکی چاو شەو و نیوەشەو لێی دەنێم شەواو هەر پێگەیشتی دوژمنی زاڵم دەتبڕێ و بەزەی نایە بە حاڵم ئەی لایە لایە ڕۆڵە لای لایە هەی خاکوەسەر خۆم ڕەنجم بە بایە ئەوکاتە دەگەڵ کاکت دوو بە دوو بکەن هاواری حەقی لە دەست چوو دەس دەنێو دەست نێن بە ڕاو تەگبیر یەکتان بە قەڵەم یەکتان بە شمشیر ئاخ کوڕم پێت خۆشە ئەسیر نەمێنی سەربەست پێت بڵێم بکەوە شوێنی قەڵەم دەست دەیە ببە مەکتەبی وەخت و بێوەخت لە خوێندن نەبی هۆنراوە: هەژار موکریانی
Role rûnakî gilêney çawim Bendî cerg û dil hêzî henawim Rîhaney bonxoş sûregulekem Awpirişkêney kulî dilekem Çolemey estom regî heyatim Hengwîn û qend û nuqil û nebatim Xewî xêrit bê de binû direnge Ta kelebabey beyan bêdenge Ey laye laye role lay laye Ewşo bezeyît be minda naye Jîr bewe roley jîr û ciwanim Le daxî lanik degrî dezanim Delêy bo hebsim bo destebestem Bew bend û hebse min ceste xestem Le nêw kurd nebê desraze nîye Ew bend û qufil û qeraze nîye? Role min bîrim le to ziyatire Desraze û lanik bitbê çatire Ey laye laye role lay laye Mat be pêt bilêm leber çî waye Boye detpêçim ta xûy pê bigrî Nek ta min mawim le bendida bimrî Raste netewey şêrî jiyanî Netewey pakî gelî kurdanî Belam çunkû kurd ewro bêkese Beşyan le dinya kot û mehbese Bo çarereşît nemawe jînim Qet pêm xoş nîye mergit bibînim Ey laye laye role lay laye Hezar têbînî dwarojim le laye Sed çak û pîrit bo dexulêmewe Leber sêberit bihesêmewe Bot bext dekem omrî dirêjim Sed talî û swêrît leser deçêjim Nemamî balat be firmêskî çaw Şew û nîweşew lêy denêm şewaw Her pêgeyiştî dujminî zalim Detbirê û bezey naye be halim Ey laye laye role lay laye Hey xakweser xom rencim be baye Ewkate degel kakit dû be dû Biken hawarî heqî le dest çû Des denêw dest nên be raw tegbîr Yektan be qelem yektan be şimşîr Ax kurim pêt xoşe esîr nemênî Serbest pêt bilêm bikewe şwênî Qelem dest deye bibe mektebî Wext û bêwext le xwêndin nebî Helbestvan: Hejar Mukiryanî