Emîn Gerdîglanî
کاتێ شەپۆلی پەرچەمت گڕ بەسەری شەوا دەکەن شەو دەڕەوێ زەوی و سەما، گوڵ لەبەری هەوا دەکەن دەشت و چیا دەبن بە گڕ، باڵی بزەت کە دەرکەوێ چاو زمان و دڵ هەموو، پێکەوە یا خودا دەکەن تۆ کە بە نیو نیگایەکت گڕ لە جیهانێ بەردەدەی تاوی بزە و شەبەنگی ڕووت، چی لە دڵی چیا دەکەن دێی کە بە کۆیە نوورەوە، شەو دەخزێتە ژوورەوە گیانە لە خەو دەڕاسن و دەرکی دڵ ئاوەڵا دەکەن دەردەکەوێ لەگەڵ بەیان کاتێ گزنگی ڕووی گەشت شەونم و سەوزە ناوەکەت، پڕ بە گەر و هەرا دەکەن تاکو خەیاڵی تۆ لەگەڵ ئەم دڵە عاشقەی منە بووکی وشە و پەریی شیعر، دێن لەگەڵم سەما دەکەن دەردەکەوێ کە تیشکی ڕووت شەو لە پەساری ئەشقەوە بەرد و گوڵ و کوڵۆ بەرەو پیری دەڕۆن و ڕادەکەن با بشەکێ بە نەرمەبا، بەژنە زراو و بەرزەکەت ئەو دەم ئەبینی دەشت و کۆ چۆن خەم و تەم بە با دەکەن شەو دەڕەوێت و تیشکی ڕووت پڕ لە ئەوین دەکا بەیان شاخ و قەڵەم لە باوەشی جاڕە گوڵا سەفا دەکەن
Katê şepolî perçemit gir beserî şewa deken Şew derewê zewî û sema, gul leberî hewa deken Deşt û çya debin be gir, balî bizet ke derkewê Çaw ziman û dil hemû, pêkewe ya xuda deken To ke be nîw nîgayekit gir le cîhanê berdedey tawî bize û şebengî rût, çî le dilî çya deken Dêy ke be koye nûrewe, şew dexzête jûrewe gyane le xew derasin û derkî dil awela deken Derdekewê legel beyan katê giznigî rûy geşt Şewnim û sewze naweket, pir be ger û hera deken Taku xeyalî to legel em dile ’aşiqey mine bûkî wişe û perîy şî’ir, dên legelim sema deken Derdekewê ke tîşkî rût şew le pesarî eşqewe Berd û gul û kulo berew pîrî deron û radeken Ba bişekê be nermeba, bejne ziraw û berzeket Ew dem ebînî deşt û ko çon xem û tem be ba deken Şew derewêt û tîşkî rût pir le ewîn deka beyan Şax û qelem le baweşî care gula sefa deken