Şêrko Bêkes
ئێستا کچێک نیشتیمانمە وا هات عاشقان! وا خۆی هات! بە پۆشاکی گەڵاڕێزانەوە وا هات! بە نۆزدە ساڵی زەردەوە بە نۆزدە چرای تاریک و بە نۆزدە زامی سەوزەوە لەگەڵ پەپوولە پاییزەی غەریبانا بەڕێوەیە و دێ بۆ لاتان! تکام وایە وەختێ گەیشتە بەردەمتان تکام وایە لە ناو ئاسمانی بیستنا باڵندەی گوێتانی بەنێ! لە چاوتانا تەماشاتان گەش گەش هەڵکەن دەسکەن بە سینەی خۆتانا و لەگەڵ ماچی دیمانەدا سێوی دڵتانی بۆ هەڵدەن! ئەو قەسیدەی بای وەشتێکی برینداری سەر شەقام و ناو ماڵەکانی خۆتانە 'با'یەکی ئێجگار دڵشکاو بارانێکی نائۆمێد و کتێبێکی بێزار لە زمانی خۆی و ئەمە حیکایەتی غەدر و شانۆنامەی ئاخاوتنی جووڵەی جەستە و دەست و پەنجەی یەک بە یەکی هەمووتانە وا هات عاشقان! وا خۆی هات ئەم عاشقە لەگەڵ خۆیا نیشتیمانی گوڵ و سووتوی هەڵگرتووە و لەگەڵ خۆیدا دیرۆکێکی قوربانیتان بۆ دێنێتە ئەم هۆڵەوە وا هات عاشقان! وا خۆی هات! من 'کامەران'م یەکەم درۆی نووساو و بەرجەستە بە خۆمەوە ناوەکەمە! هەر وەک ئەوەی 'دڕدۆنگ' ناوی 'دڵنیا' بێ و 'قاقر'یش ناوی 'دارستان'! دیسانەوە وەکوو دوێنێ و وەکوو پێرێ و پار و پێرار ڕۆژێکی تری سواومە و دیسانەوە هەر خۆم سوغرەکێشی خۆمم و بێواز بێواز پاڵنان بە بێزاریمەوە بەردەوامە دەمەو عەسرە و چون چڕ و چاوی نیشتیمان هەوا گرژە و گەڕەک مۆنە و چەند 'هەزار'ێکی چرچ و لۆچ لە گیرفانی پانتۆڵێکی غەمگینمایە و ئەڵێی پشیلەی بەر گەرمای بێتاقەتم خاو و خلیچک لە ماڵەوە ئەچمە دەرێ ڕۆژی سواو نە چرکەی لە خولەکی گیر ئەبێ و نە خولەکی لە سەعات و نە هیچ شتێکی پێوە بەند ئەبێ و نە هیچ شتێکیش هەرگیز ئەتوانێ توندی بکاتەوە! مانەوەیێکی بێهوودە و سووڕانەوەیێکی بێهوودە و ونبوون لە ناو بۆشاییدا لەم ڕۆژژمێرەی ئێستەدا سەعات له ڕۆژ هەفته له مانگ مانگیش له ساڵ وەڕس بووه من له خۆما له ناو خۆما ڕەنگم له ڕەنگم بێزارە و دەنگم له بوونم بێزارە هەر لەم کۆڵانەی ئێمەدا دەرگا لە چوارچێوەی خۆی و شووشە لە پەنجەرەی خۆی و سیلەی کۆڵان لە کۆڵان و کۆڵان لە دەر و دیوار بێزارە بێتاقەتی لەتەکمایە و هەنگاو ئەنێ یان سێبەرمە یان هاوڕێ وەختێ ئەگەمە ناو شاریش سەرنج ئەدەم شۆستە لە شەقامی خۆی و وشە لە زمانی خۆی و نهۆم لە تەلاری خۆی و دوکان لە جامخانەی خۆی و هەموو شتێ لە شتێکی خۆی بێزارە لە ناو منا بێزاری هێند چڕ بووەتەوە خۆم ئەبینم بێشەڵانم و گەڕاڵێکی ناو زماکم و تاڵێ هەتاو ناگاتە لام من بە تەنها هەر تەماشای پەرت و پەرشی پایزانە و دوو دەستی پەنجە پەژموردە و دوو قاچی لە لەش وەڕسی سەر شەقامی ئێوارانێکی دووبارەی هەتا شەوی جادەی سەهۆڵەکەم هەیە و هیچی تر نە ئەوەی هەموو ڕۆژ لای من کورت و کورتتر ئەبێتەوە هەر ژیانە ئەوەی بەردەوامیش درێژ درێژ ئەبێتەوە سێبەری ژان و زیگاری خەمەکانە لەم نەخشەیەدا بێزاری زەلکاوێکە و هەموو ڕۆژێ چەندین کەڕەت سەرمانی تیا نوقم ئەکەن هەموو ڕۆژێ من ئەپرسم لە چی ئەچم!؟ چێشتی ترشاو!؟ تەنەکەی خۆڵ!؟ زێرابی ماڵ!؟ لە چی ئەچم!؟ لە ئێستەدا وا هەست دەکەم من خۆڵ و پووش و پەڵاشی وەرزی نامۆیی خۆمم و ئاوێنەیێکی شکاوی ورد و خاشی بێهوودەیی و تەنیاییم و نیشتیمانیش وا ئەبینم بووە بە گسکێکی گەورە و هەموو ڕۆژێ لەبەر دەمی مێژوویەکی بی دەربەستدا گسکەم ئەیات من گەنجێتیم ئەوەندە بێ ڕێز کراوە لە خەونیشا خۆم ئەبینم یان بووم بە تەیرێکی گول و یاخود بە مێش وەڕسبوون چییە!؟ دڵێکە لەشی خۆی ئافەرۆز کردووە یان مەلێکە هەموو ئاسمان لەبەر دەمیا بە قەد سەقفی قەفەسێکە لەم ڕۆژژمێرەی ئێستەدا بە هەر شوێنێکا تێپەڕم بێزاری تارماییێکە و لە پڕێکا پەیدا ئەبێ و لەبەر دەمما ڕائەوەستێ بەیانیت باش! من ناوم 'بولبولە'ە خەڵکی ئەم باخچەیەم دەمێکە باخەوانێکی تووڕەمان لێ پەیا بووە نە گوڵێ، نە دارێ، نە مەلێ بێ ئاگا بوون چۆن هاتووە و کێ کردوویەتی بە باخەوان بێجگە لە خۆی باخەوانی لەخۆبایی ناهێڵێ بە دڵی خۆم بخوێنم ئەڵێ تۆ فڕینت شوومە و گۆرانییەکی لاساری ئەڵێ تۆ بە قەد ڕیقنەیێک ڕێزی نیشتیمان ناگری پێم ئەڵێ ئەم هەموو ناوزڕاندنی سەر و سنەوبەر و دارسێوانە لە پای چی!؟ پێم ئەڵێ تۆ وەڕسکەری، وەڕسکەر بەیانیان زوو پێش 'با' و پێش کازیوە و بەر لە نیشتیمان خۆی لە خەو هەڵئەسی بە جووکەجووک مێشکی ئەم درەختانەت بردووە! تۆ خەوت لە ئاو، لە گوڵ، لە گیا زڕاندووە ئەم هەموو زەردەزیڕەی پرسیارانە چییە ئەیانورووژێنی؟ پێم ئەڵێ ئەو دەنووکە دەنووکی خۆت نییە! بۆیە بێزار بووم و ئەمەوێ ئەم باخچەیە بەجێ بێڵم و لە داخانا سەری خۆم هەڵگرم و ڕوو بکەمە باخچەیەکی دوور دووری هەندەران! ئاو بێزاری خۆی بردە لای ڕەگەکان ڕەگەکان بردییانە لای ناوقەدی دارەکان ناوقەد بردییە لای لق و پۆپ لق و پۆپ بردییە لای پژ و پۆ و گەڵاکان ئەوانیش بردییانە لای چاودێر و و ئەویش بردییە لای سەرۆکی شارەوانی و و ئەویش بردییە لای نیشتیمان نیشتیمانیش هیچ گوێی نەگرت لەسەر جادەی سەهۆڵەکە ڕاوەستاوم نیوەم خەونی مردووی خۆم ئەژمێرێ و نیوەکەی تر بووەتە زەردەی کز و ماندووی خۆرنشینی چاوانم و لە جەستەما بۆ بەرەوخوار دائەگەڕێ لە قەراخ شار ئەگەمە کەناری ئێواران بێزاری هەر لەگەڵمایە ئێوارەو باش من ناوم 'مەترە'یە مەترەی ئەرزپێوان بێزارم بێزار ئەوە چەن ساڵە کۆمەڵەدەستێکی نیشتیمان لە بناری ئەو شاخەوە هەتا ناو شار ئەمکەنەوە و ڕامئەکێشن جاری وا هەیە من چەند جار تەواو ئەبم بەڵام ئەوان ئەرزەکانیان تەواو نابێ! بێزارم بێزار بێزار ژمارەیەکم نییە جەستەی ژان نەکا و شەوان نەیکەن بە ناڵەناڵ! ئەڵێم لەوانەیە ڕۆژێ وەختێ ئیتر بێ هیوا بووم هەر خۆم بە خۆم بخنکێنم و یاخود ئیتر لە تاوانا هەستمە سەرپێ و خۆم هەڵدەم و ئەڵقە ئەڵقە بچمە ملیان؟! ئەگەمەوە ناو تاریکی و ناو هەژاری و بەردەم ماڵێ من خۆم ڕۆژ بووم بەڵام پڕیان کردم لە شەو من خۆم گۆمیلکەی نێرگز بووم پڕیان کردم لە تینوێتی و پووش و پەڵاش من بۆخۆم ئیستە و ئایندەم کەچی سواری مێژوویەکی کۆنیان کردم غەڵغانێک و شمشێرێکی ژەنگاوییان دایە دەسم بردییانمەوە بۆ ناو قەڵای تامارەکانی ڕابردوو کە وڵات بوو بە چەتەووڵی هەڕەشە و چی دەرگایە لێی داخستی ئیتر شتێک نییە لەوا هەرگیز تۆ پێی بڵێی خۆشەویستی من تەڵاشم یان کۆتەرەم!؟ هەموو جارێ خۆم ئەبینم گێژاوێ خولم ئەدات و ئەمباتە بنی بنەوە و لە ناکاویش هەڵم ئەداتە سەرەوە نە ئەوەتا بە ئێجگاری نوقم بم و نە ئەوەتایش هەتاکوو سەر هەر لە سەرێ بمێنمەوە! لەسەر جادەی سەهۆڵەکە ڕاوەستاوم لە دووری دووری دوورەوە بە قرخەقرخ 'با'یەکی پیرەمێرد دێت و سمێڵێکم لێ با ئەدا و لەبەر دەمما ئیستێک ئەکا و سەیری لێ دێ کە لە توخمی ئەویش بم و لەویش نەچم سەیری لێ دێ هەورێکی تازەی پاراوم لە دەنگایە و هەڵکردن و گڤە و قسەم ناچنەوە سەر لێڕەوار و دۆڵەکانی باپیرانم سەیری لێ دێ خۆم دابڕیوە لە دەنگی و ناچمەوە سەر ئەو ئاوێنە پیرۆزانەی بە دیواری مۆزەخانەی جەستەی ئەوا هەڵواسراون سەیری لێ دێ ئەو ئەڕوات و من دەس ئەکەم بە هەناوما و ڕۆ ئەچم و بە برینا شۆڕ ئەبمەوە و هەرچی خەڵتەی درۆی مەڵاس و چی خەڵتەی شانازییە کە بەر ئەگرن لە ئاوی ڕەوانی ڕۆحم و زەینم تۆپەڵ تۆپەڵ دەریان دێنم دەس ئەگێڕم بەناو دڵما ڕەحم بە هەستی خۆم ناکەم ڕەحم بە ئازاری خۆم و هیچ نەزیفێکی خۆم ناکەم دەس ئەگێڕم ملی مێژووەکەی خۆم ئەگرم بەری نادەم هەتاکوو هەڵی ئەکێشم و بەرەو ئەوپەڕی بێباکی تووڕی ئەدەم من نازانم چتێک هاتۆتە ڕۆحمەوە من نازانم چ ناوێکی لێ بنێم و چۆنی بانگ کەم کۆبوونەوەی برووسکەیە و ئەویش نییە من نازانم پانخواردنەوەی وەڕسبوونە و ئەویش نییە من نازانم تەنها ئەوەندە ئەزانم ئەوەی هاتووەتە ڕۆحمەوە دوێنێ نییە و هەرگیز هەرگیز لە باو ناچێ و لە کەس ناچێ و کاڤڵێکی داهاتووە بەڵام بێزاری ئەوسەری وا لە کوورەی تووڕەبوونا یاخود لە ناو گڕکانێکا ئەو ساتەی ئەتەقێتەوە لاشاوەکەی شاری مردوو ڕائەماڵێ و دەمامکی نیشتیمانیش لە سەرەوە هەتا بەر پێ دائەماڵێ لەسەر جادەی سەهۆڵەکە ڕاوەستاوم من تەمەنم نۆزدە مۆمە و لەو نۆزدەیە فووی نیشتیمان سێ چوارێکی هێشتووەتەوە بۆ شەوقی بزە و پێکەنین نۆزدە باڵندەی ناو خەونی لاوێتیم و لەو نۆزدەیە ساچمەکانی نیشتیمان سێ چوارێکیان هێشتووەتەوە بۆ چریکە و بۆ هەڵفڕین نۆزدە هەناسەی بەردێکی سەرەڕێگام نۆزدە بڵقی قیری جادەیێکی هاوین نۆزدە قاوغە فیشەکی شەڕی ناوخۆ نۆزدە تیکەی لە قوڕگ گیراو نۆزدە گۆرەوی کونکون و نۆزدە سکاڵای ونکراو نۆزدە ڤالیۆم بۆ نۆزدە شەو نۆزدە ساڵیش لە ناو زەرفێکی بەتاڵا! لەسەر جادەی سەهۆڵەکە ڕاوەستاوم گەنجم وەکوو هەندێ درەختی سەر شۆستەی شان و مل و قژ پۆڵایی پشتگوێخراو تازەم وەکوو تازەترین بێهیوایی نوێترین ڕەنگی تەنیایی گەنجم وەکوو عەلاگەیێکی ڕەنگینی فڕێدراو ئەوەتا هەردوو پێکەوە 'با' ئەمانبا و هەردوو هەر خشەخشمان دێ و ئەو لە تەنەکەی بەتاڵ و لقی دار و پێچکەی ماشێن و کورسییەکان گیر ئەبێت و لەملایشەوە من لە میلی خەولێکەوتووی سەعاتەکانی بێکاریدا دائاڵێم و لە قاچ و قۆلی نیشتیمان هەردوو هەر خشەخشمان دێ هەردووکیشمان لەبەرخۆوە لە ترسی چاوی تارمایی ژێر سێبەری پەنایێکا تووڕە و بێزار بۆڵەمان دێ نیوەڕۆ باش من ناوم کیسەڵە ئەوە چەند ساڵە لەم گوێ گۆمە حەماڵی ئەکەم ئا ئەو کونەش ماڵەکەمە بەڵام دوێنێ چەند قاچێکی نیشتیمانم لێ پەیابوون تووڕە و تڕۆ بە نووکەشەق هەتا ئەو خوارە بردیانم پێیان وتم: لە بەر بەرژەوەندی 'ئاو' و ئەو شاخانە لەبەر بەرژەوەندی هوما و باز و ئەو هەموو کەڵەکێویانە ئەبێ بڕۆی ئەبێ بڕۆن هەتا زووە ئێرە چۆڵ کەن چونکە هەڤاڵ هەڵۆزادە وا بەنیازە لە دوای نەورۆز ئا ئەم ئاستە لە سەرەوە هەتا ئەو سەر بکات بە کێڵگەی نازداری گوڵی خەشخاش! من گوێم لێیە لێرە خاک نرکەنرکێتی و ئەناڵێنێ و ئەوەندەیان لێ دزیوە لەمسەرەوە هەتا ئەو سەری فیدراڵی هەموو جەستەی کوناودەرە ئەم کاتەو باش من ناوم 'عەدالەتە' لەسەر زەمین چاوێکی خوا و دەستێکی خوام ئەوەتەی هاتوومەتە ئەم نیشتیمانەوە کەس نامناسێ و کەس نامبینێ و ئەوەی ناوی نەبێ منم من لێرە تەنهام هەموو شەوێ بە چرپاکەی خۆمەوە ئەمبەستنەوە پلاستەرێکیش ئەدەن لە دەمم ئەم نیشتیمانە ئەوەندە ڕقی لە منە هەر هەلێکی بۆ هەڵکەوی سەرم ئەبڕێ من بە ئاسانی نادزرێم بەڵام لێرە ئەگەر ئاگام لە خۆم نەبێ ئەمدزن و ئەمفڕێنن ماسکەکەی من ئەبەستن و ترازووەکەم هەڵئەگرن و ئەچنە دەرێ بۆ ناو خەڵک و سلسار سلسار ئەڵێن ئێمە نەک عەدالەت خودایەکی تازەهاتووی ئەم وڵاتەین! ئەم دەست بەو دەستی نەزانی و پەنجە دزرا ئەم قاچ بەو قاچی نەزانی و ڕێگە دزرا ئەم چاو بەو چاوی نەزانی و سەرنج دزرا ئەم باڵ بەو باڵی نەزانی و فڕین دزرا سارومارە سارومارە ئەم دیرۆکی دەسەڵاتی سەرزەمینە و بۆنی دەمی درۆکانی ئەم ڕۆژگارە! لەسەر جادەی سەهۆڵەکە ڕاوەستاوم بەڵام دڵم وا لە ناو مشتی 'با'یەکا هێواش هێواش لە گۆیژەوە دێتە خوارێ و سووتووی جەستەی ژنێک دێنێ و لەبەر لووتی نیشتیمانا فوویەک لە سووتووەکە ئەکا و ئینجا ئەڵێ یادگارێ بۆ سەروەریت هەر وەستاوم و بەڵام ڕۆحم خۆی بە تاڵی بارانێکا هەڵواسیوە هەر لە تاڵەقژی دایکم و خوشکەکانم و لە نەسڵی مووی پایزێکی بێوەژنی کۆڵانەکەی ئێمە ئەچێ ڕاوەستاوم بەڵام چاوم کەوتۆتە ناو ئەو جامەوە کە ژنێکی دەروەزەکەر لەبەر پێی خۆیا دیناوە و ناوبەناوێ زرنگەیێک لە ناو جامەکا هەڵەسێ و لێرەیشەوە لەگەڵ ئەوا چاوی منیش دائەچڵەکێ شەو باش! شەو باش! من ناوم کراسی ژنانەیە ئەوەی نیشتیمان پێی شەرمە بیکاتە بەری خۆی منم! ئەم مێژووی نێرە ئەم نیشتیمانی سمێڵە تەنها جارێ منی نەکردە بەر هەتاوێ بەر جۆگە ئاوێ بەر شووشە گوڵاوێ ئەوانەی منیان لە بەر کرد: گسک بوون و مەنجەڵ بوون و تەنەکەی خۆڵ ئەوانەی منیان کردە بەر: بەژنی درێژی غەریبی و بەژنی تەنیایی و ئازار بوون ئەوانەی منی پێ بەخشین هەر بێدەنگی و قفڵ و تێڵا و شریخەکانی قامچی و جل و بەرگی دەردەدار بوون من ناوم کراسی ژنانەیە ئەوەی ئاگای لە من نەبێ و گوێی لە هاواری من نەبێ گوێچکەی تەپی نیشتیمانە! من مێینەم! من سەراپا هەموو جەستەم لە گوناه و پرسیاری ڕووتی حەرام پێکهاتووە! لە یەکەم ڕۆژی بوونمەوە بەردی ڕەجم لە قوماتمەوە پێچراوە و نیشتیمان تفم لێ ئەکات! لەسەر جادەی سەهۆڵەکە ڕاوەستاوم لەپڕێکا نیشتیمان بە خۆی و کڵاوی ئاڵاکەیەوە بە خۆی و ڕێکلامی ڕیش و سمێڵ و ئارمی پۆپرەی نێرێتییەوە بە خۆی و مەدالیای پڕهەڕەشەی سەر سنگییەوە بە خۆی و شمشێرەکەی 'ئەی ڕەقیب'ەوە بە پەڕی گیڤ و مەغرووری تاوسییەوە کۆمەڵێ چەکداری چاوزەق چاوزەق لە پشتییەوە سنگ دەرپەڕیو دێتە لام و بە دوو پەنجە تەوقەیێکم لەگەڵ ئەکات و دەس ئەکا بە ئەرشیڤی فەخر لێ نیشتووی باخەڵیا سی-دی سروودێکی تازەی ئەم ڕۆژگارەیم ئەداتێ ئینجا زەردەخەنێیێک لە جۆری زەردەخەنەی مسینی دەسکرد ئەیگرێ وەک پێم بڵێ من نیشتیمانی تاقانەی هەموو دنیام ئەوسا ئەڕوا و بەجێم دێڵێ ئەم کاتەو باش! منیش هاتووم من جوانوویەکی بێکارم خەڵکی کەرکووکم کوڕی نەوت و گازم و کوڕی ئەو هەموو بۆری و چاڵانە بەڵام ئەوەی بە ڕێکەوتیش نەیانبینم ئەو باوکانەن لەبەر ئەوەی بەردەوامیش ئەسووڕێمەوە لە هەموو کەسێکی دی زیاتر نیشتیمان ئەبینم بەڵام جەخار هەموو حیلە و کوڕژنەکانم بە با چوون و هەموو سمکۆڵەکانم گەرگەسان بوون و ئەم نیشتیمانە پیرۆزە گوێی لێم نەبوو ڕەشەبایش وتی ئەو هەموو گڤەگڤە و هەر گوێی نەگرت چەخماخە وتی ئەو هەموو برووسکە و داگیرسان و دڕژانانە و هەر گوێی نەگرت باخچە وتی، شەقام وتی، بازاڕ وتی قەڵەم و دەفتەر و کیڵگە و لێڕەوار و تەیر و تواڵ و ئاژەڵ و ئەو هەموو پەلکەگیا و گەڵا و مێروولە و قەلەباچکە ڕەشپۆش و کەروێشکی هەتیو و ئەو هەموو وشە غەمگین و ئەو هەموو پاییزە بێوەژنانە بە دەم زریکە و قیژەوە هاواریان کرد بەڵام ئەم نیشتیمان پیرۆزە هەر گوێی نەگرت هاوار خۆی وتی ئەوە چەن ساڵە لە نووزەی مناڵیمەوە هەتا ئێستا دەمم ناوە بە گوێچکە پان و پۆڕەکانی ئەم نیشتیمانە سەرزلەوە ئەوە چەن ساڵە ئەم هەموو گەڵاڕێزانە و ئەم هەموو دەست و پەنجەڕێزانە و ئەم هەموو نیگاڕێزانە یەک لە دوای یەک ڕەوانەی ناو گوێچکەکانی ئەو ئەکەم هەموویان ئەڕۆن و بەڵام کەسیان ناگەڕێنەوە نازانم لەو گوێچکانەدا چییان بەسەر دێ کێ ئەبینن!؟ ئەگەنە کوێ!؟ نازانم لەسەر جادەی سەهۆڵەکە ڕاوەستاوم سی-دییە تازەکەی نیشتیمان بە دەسمەوە و 'با'یەک بە چرپە پێم ئەڵێ کە نیشتیمان ئیشی پێت نەبوو خۆی دێ بۆ لات هەر ئەو کاتەیش زەردەخەنە ئەیگرێت و دێتە پێش و ماچت ئەکا وەختێ کە ئیشی پێت نەما ئەگەر خوداش لە بەینا بێ و تکاکار بێ نایێ بۆ لات تۆ نیشتیمان ئەم سروودە چی لێ بکەم ئەگەر هێناوتە بۆ ئەوەی وەک هەمووجار لە جێگەی نان قسەی سەوز و سوورم باتێ بیبەرەوە با شاخ و داخ گوێی لێ بگرێ ئەگەر هێناوتە بۆ ئەوەی لە باتیی ماڵ لە بری کار، لە جێی ژن بەڵێنی بێ قاچم باتێ بیبەرەوە با کورسییەکانی پەرلەمان گوێی لێ بگرن مەرحەبا گیانە مەرحەبا! من ناوم کورسییە کەس نەیزانێ من ئەیزانم ئەم هەموو چەقۆی غەدرانە ئەم هەموو جۆگەی خوێنانە ئەم هەموو ماسکی دزییانە ئەم هەموو ڕەژووی ڕقانە لەسەر منە! لەسەر دانیشتنی سەر من ئەکرێن! بەڵام ناڵێن کەسیان ناڵێن لەسەر منە! هەموو ئەڵێن لەبەر چاو و باڵای جوانی ئازادییە! لەسەر شیری ساوایانە لەبەر ئاوە لەسەر نانە لەسەر گوڵە و لەبەر هێلانەی چۆلەکە و لەسەر شاڵاوی ناوەختی گەلەگورگی دەور و بەرە بەڵام ناڵێن کەسیان ناڵێن لەسەر منە و لەبەر منە! کەلاوەی قوتابخانەیێک هاواری کرد: چەندین وەرزە نانی بەڵێن بە هەنگوینی خەیاڵەوە ئەخۆین چەندین ساڵە دروشم و شیعر و بانگەشە و پەیڕەوی ناوخۆ و بەرنامە و سروودی تازە و کۆن ئەخۆین! شەقامێکی ماندوویش وتی: "بە دەنگی پێی ڕێبوارانا سکی خاڵی و سکی تێری ئەم زەمانە لە یەکتر جوێ ئەکەمەوە دەنگی قاچی سکی خاڵی بە حاڵ ئەگاتە گوێچکەم و دەنگی قاچی سکی تێریش هێندە قورسن ئەملەرزێنن!" تەنەکەی بەردەمی دەرگای ماڵە قوڕێ وتی شەوێک تەنها بە یەک پژمینی خوا ئیتر من چووم بە ئاسمانا و نەهاتمەوە و لەو شەوەوە هەتا ئێستا من بە دەوری سەرزەمینا ئەخولێمەوە! بەرمیلی بەردەمی دەرگای تەلارەماڵێکیش وتی: هەر بە تەنها پاشماوەکەم هێندە قورسە بە گەڕەکێکی برسێتی هەڵناگیرێ! برسێتیت باش! من ناوم 'نان'ە لەو شوێنەی زۆرم پێئەکەنم و لەو شوێنەی کەمم ئەگریم من و هەوا و ئاو و ئازادی و جوانی کۆمەڵێ خوشک و براین هەموومان لە یەک دایک و باوکین باوکمان خاکە و سەرزەمینە و و دایکمان ژیان من ئێستا لە زۆر شوێنی ئەم سەرزەمینەدا بێکەسم و بە کوڵ ئەگریم بەڵام هەموو جارێک 'با'یێکی گەنج لای ئازادییەوە دێت و دەست ئەکاتە ملم و ماچم ئەکات و پێم ئەڵێ خەم مەخۆ هەروا تەنیا نابیت خەم مەخۆ منت هەم من ئیستە لێرە هەمیشە لە پرسە دام پرسەی گوڵەگەنم پرسەی ئاو پرسەی دارستان وەلێ هەمووجارێکیش هەتاوێکی ڕاسپاردە لە لای ئایندەوە دێت و دەس ئەکاتە ملم و دڵنەواییم ئەکات و پێم ئەڵێ خەم مەخۆ هەروا تا هەوا تاریک بوو لێوبەبار نابی خەم مەخۆ منت هەم لە ماڵەوە ڕۆژێ سفرەکەمان وتی: "لە نێو ئێمەشا بەختەکان لە یەکتر جیان! تیامانایە و گەلێ زۆرن ئەو سفرانەی هەتیوبار و بێوەژنن و تەنها جارێک 'سەری خۆیان' نەدیوە پڕ بێ لە قاپی سک بەختەوەر!" بیرم نایە نانێکی من لە دڵەوە پێکەنی بێ و کەوچکێکم وتبێتی: "وا تێرم خوارد!" لەسەر جادەی سەهۆڵەکە ڕاوەستاوم سەرنج لە سی-دییەکە ئەیەم لەسەر بەرگەکەی نیشتیمان خۆی ئەبینم لە بەردەم شاخێکی بەرزا ڕاوەستاوە وەکوو شەپقە هەورێکی کردووەتە سەری و پێئەکەنێ و بە دوو پەنجەیش نیشانەی 'ڤ(v)' درووست ئەکا و بە فیزەوە نیشانی خوا و خەڵکی ئەدا
Êsta kiçêk nîştîmanme Wa hat ’aşiqan! Wa xoy hat! be poşakî gelarêzanewe wa hat! Be nozde salî zerdewe be nozde çiray tarîk û be nozde zamî sewzewe legel pepûle payîzey xerîbana berêweye û dê bo latan! tikam waye wextê geyşte berdemtan tikam waye le naw asmanî bîstina balindey gwêtanî benê! le çawtana temaşatan geş geş helken desken be sîney xotana û legel maçî dîmaneda sêwî diltanî bo helden! ew qesîdey bay weştêkî birîndarî ser şeqam û naw malekanî xotane 'ba'yekî êcgar dilişkaw baranêkî na’omêd û kitêbêkî bêzar le zimanî xoy û eme hîkayetî xedir û şanonamey axawtinî cûley ceste û dest û pencey yek be yekî hemûtane wa hat ’aşiqan! wa xoy hat em ’aşiqe legel xoya nîştîmanî gul û sûtwî helgirtuwe û legel xoyda dîrokêkî qurbanîtan bo dênête em holewe wa hat ’aşiqan! Wa xoy hat! min 'kameran'm yekem diroy nûsaw û berceste be xomewe nawekeme! her wek ewey 'dirdong' nawî 'dilnya' bê û 'qaqir'yiş nawî 'daristan'! dîsanewe wekû dwênê û wekû pêrê û par û pêrar rojêkî tirî swawme û dîsanewe her xom suxrekêşî xomim û bêwaz bêwaz palnan be bêzarîmewe berdewame Demew ’esre û çun çir û çawî nîştîman hewa girje û Gerek mone û çend 'hezar'êkî çirç û loç le gîrfanî pantolêkî xemgînmaye û elêy pişîley ber germay bêtaqetim xaw û xilîçk le malewe eçme derê rojî swaw ne çirkey le xulekî gîr ebê û ne xulekî le se’at û ne hîç şitêkî pêwe bend ebê û ne hîç şitêkîş hergîz etwanê tundî bikatewe! maneweyêkî bêhûde û Sûraneweyêkî bêhûde û winbûn le naw boşayîda Lem rojjimêrey êsteda Se’at lih roj Heftih lih mang Mangîş lih sal wers bûh Min lih xoma lih naw xoma rengim lih rengim bêzare û Dengim lih bûnim bêzare Her lem kolaney êmeda derga le çwarçêwey xoy û Şûşe le pencerey xoy û Sîley kolan le kolan û Kolan le der û dîwar bêzare Bêtaqetî letekmaye û hengaw enê yan sêberme yan hawrê Wextê egeme naw şarîş serinc edem Şoste le şeqamî xoy û Wişe le zimanî xoy û Nihom le telarî xoy û Dukan le camxaney xoy û Hemû şitê le şitêkî xoy bêzare Le naw mina bêzarî hênd çir buwetewe xom ebînim bêşelanim û Geralêkî naw zimakim û Talê hetaw nagate lam Min be tenha her temaşay perit û perşî payzane û dû destî pence pejmurde û dû qaçî le leş wersî ser şeqamî êwaranêkî dûbarey heta şewî cadey seholekem heye û hîçî tir ne Ewey hemû roj lay min kurt û kurtitir ebêtewe her jyane Ewey berdewamîş dirêj dirêj ebêtewe sêberî jan û zîgarî xemekane Lem nexşeyeda bêzarî zelkawêke û Hemû rojê çendîn keret sermanî tya nuqim eken Hemû rojê min epirsim le çî eçim!? Çêştî tirşaw!? Tenekey xol!? Zêrabî mal!? Le çî eçim!? Le êsteda wa hest dekem min xol û pûş û pelaşî werzî namoyî xomim û Awêneyêkî şikawî wird û xaşî bêhûdeyî û tenyayîm û Nîştîmanîş wa ebînim buwe be giskêkî gewre û Hemû rojê leber demî mêjûyekî bî derbestida giskem eyat Min gencêtîm ewende bê rêz kirawe le xewnîşa xom ebînim yan bûm be teyrêkî gul û yaxud be mêş Werisbûn çîye!? Dilêke leşî xoy aferoz kirduwe yan melêke hemû asman leber demya be qed seqfî qefesêke Lem rojjimêrey êsteda be her şwênêka têperim bêzarî tarmayyêke û le pirêka peyda ebê û leber demma ra’ewestê Beyanît baş! min nawim 'bulbule'e xelkî em baxçeyem demêke baxewanêkî tûreman lê peya buwe ne gulê, ne darê, ne melê bê aga bûn çon hatuwe û kê kirdûyetî be baxewan bêcge le xoy baxewanî lexobayî nahêlê be dilî xom bixiwênim elê to firînit şûme û goranîyekî lasarî elê to be qed rîqneyêk rêzî nîştîman nagrî pêm elê em hemû nawzirandinî ser û sinewber û darsêwane le pay çî!? Pêm elê to weriskerî, werisker beyanyan zû pêş 'ba' û pêş kazîwe û ber le nîştîman xoy le xew hel’esî be cûkecûk mêşkî em dirextanet birduwe! to xewt le aw, le gul, le gya ziranduwe em hemû zerdezîrey pirsyarane çîye eyanurûjênî? Pêm elê ew denûke denûkî xot nîye! boye bêzar bûm û emewê em baxçeye becê bêlim û Le daxana serî xom helgirim û Rû bikeme baxçeyekî dûr dûrî henderan! Aw Bêzarî xoy birde lay regekan Regekan birdîyane lay nawqedî darekan Nawqed birdîye lay liq û pop Liq û pop birdîye lay pij û po û gelakan Ewanîş birdîyane lay çawdêr û Û ewîş birdîye lay serokî şarewanî û Û ewîş birdîye lay nîştîman Nîştîmanîş hîç gwêy negirt Leser cadey seholeke rawestawim Nîwem xewnî mirdûy xom ejmêrê û Nîwekey tir buwete zerdey kiz û mandûy xorinşînî çawanim û Le cestema bo berewxiwar da’egerê Le qerax şar egeme kenarî êwaran Bêzarî her legelmaye Êwarew baş min nawim 'metre'ye metrey erizpêwan bêzarim bêzar ewe çen sale komeledestêkî nîştîman le binarî ew şaxewe heta naw şar emkenewe û ram’ekêşin carî wa heye min çend car tewaw ebim belam ewan erzekanyan tewaw nabê! bêzarim bêzar bêzar jimareyekim nîye cestey jan neka û şewan neyken be nalenal! elêm lewaneye rojê wextê îtir bê hîwa bûm her xom be xom bixinkênim û yaxud îtir le tawana hestime serpê û xom heldem û elqe elqe biçme milyan?! Egemewe naw tarîkî û naw hejarî û berdem malê Min xom roj bûm belam piryan kirdim le şew Min xom gomîlkey nêrgiz bûm piryan kirdim le tînwêtî û pûş û pelaş Min boxom îste û ayndem keçî swarî mêjûyekî konyan kirdim Xelxanêk û şimşêrêkî jengawîyan daye desim Birdîyanmewe bo naw qelay tamarekanî rabirdû Ke wilat bû be çetewwilî hereşe û çî dergaye lêy daxsitî îtir şitêk nîye lewa hergîz to pêy bilêy xoşewîstî min telaşim yan koterem!? hemû carê xom ebînim gêjawê xulim edat û embate binî binewe û le nakawîş helm edate serewe ne eweta be êcgarî nuqim bim û ne ewetayş hetakû ser her le serê bimênmewe! Leser cadey seholeke rawestawim Le dûrî dûrî dûrewe Be qirxeqirx 'ba'yekî pîremêrd dêt û Simêlêkim lê ba eda û leber demma îstêk eka û Seyrî lê dê ke le tuxmî ewîş bim û lewîş neçim Seyrî lê dê hewrêkî tazey parawim le dengaye û Helkirdin û give û qisem naçnewe ser lêrewar û dolekanî bapîranim Seyrî lê dê xom dabrîwe le dengî û naçmewe ser ew awêne pîrozaney be dîwarî mozexaney cestey ewa helwasrawin Seyrî lê dê Ew erwat û min des ekem be henawma û ro eçim û be birîna şor ebmewe û herçî xeltey diroy melas û çî xeltey şanazîye ke ber egirin le awî rewanî rohim û zeynim topel topel deryan dênim Des egêrim benaw dilma Rehim be hestî xom nakem Rehim be azarî xom û hîç nezîfêkî xom nakem Des egêrim milî mêjuwekey xom egirim berî nadem Hetakû helî ekêşim û berew ewperî bêbakî tûrî edem Min nazanim Çitêk hatote rohmewe Min nazanim Çi nawêkî lê binêm û çonî bang kem Kobûnewey birûskeye û ewîş nîye Min nazanim Panxwardnewey werisbûne û ewîş nîye Min nazanim Tenha ewende ezanim ewey hatuwete rohmewe Dwênê nîye û hergîz hergîz le baw naçê û Le kes naçê û Kavlêkî dahatuwe Belam bêzarî ewserî wa le kûrey tûrebûna yaxud le naw girkanêka Ew satey eteqêtewe laşawekey şarî mirdû ra’emalê û Demamkî nîştîmanîş le serewe heta ber pê da’emalê Leser cadey seholeke rawestawim Min temenim nozde mome û lew nozdeye fûy nîştîman sê çwarêkî hêştuwetewe bo şewqî bize û pêkenîn nozde balindey naw xewnî lawêtîm û lew nozdeye saçmekanî nîştîman sê çwarêkyan hêştuwetewe bo çirîke û bo helfirîn nozde henasey berdêkî sererêgam nozde bilqî qîrî cadeyêkî hawîn nozde qawxe fîşekî şerî nawxo nozde tîkey le qurg gîraw nozde gorewî kunkun û nozde sikalay winkiraw nozde valyom bo nozde şew nozde salîş le naw zerfêkî betala! Leser cadey seholeke rawestawim Gencim wekû hendê dirextî ser şostey Şan û mil û qij polayî piştigwêxraw Tazem wekû tazetrîn bêhîwayî Nwêtrîn rengî tenyayî Gencim wekû ’elageyêkî rengînî firêdraw Eweta herdû pêkewe 'ba' emanba û Herdû her xişexşiman dê û Ew le tenekey betal û liqî dar û pêçkey maşên û kursîyekan gîr ebêt û Lemlayşewe min le mîlî xewlêkewtûy se’atekanî bêkarîda da’alêm û Le qaç û qolî nîştîman Herdû her xişexşiman dê Herdûkîşman leberxowe Le tirsî çawî tarmayî Jêr sêberî penayêka tûre û bêzar Boleman dê Nîwero baş Min nawim kîsele ewe çend sale lem gwê gome hemalî ekem a ew kuneş malekeme belam dwênê çend qaçêkî nîştîmanim lê peyabûn tûre û tiro be nûkeşeq heta ew xware birdyanim pêyan witim: le ber berjewendî 'aw' û ew şaxane leber berjewendî huma û baz û ew hemû kelekêwyane Ebê biroy Ebê biron Heta zuwe êre çol ken çunke heval helozade wa benyaze le dway newroz A em aste le serewe heta ew ser bikat be kêlgey nazdarî gulî xeşxaş! min gwêm lêye lêre xak nirkenirkêtî û enalênê û ewendeyan lê dizîwe lemserewe heta ew serî fîdralî hemû cestey kunawdere Em katew baş min nawim '’edalete' leser zemîn çawêkî xwa û destêkî xwam ewetey hatûmete em nîştîmanewe kes namnasê û kes nambînê û ewey nawî nebê minim min lêre tenham hemû şewê be çirpakey xomewe embestinewe pilasterêkîş eden le demim em nîştîmane ewende riqî le mine her helêkî bo helkewî serim ebrê min be asanî nadzirêm belam lêre eger agam le xom nebê emdizin û emfirênin maskekey min ebestin û tirazuwekem hel’egirin û eçne derê bo naw xelk û silsar silsar elên ême nek ’edalet xudayekî tazehatûy em wilateyn! em dest bew destî nezanî û pence dizra em qaç bew qaçî nezanî û rêge dizra em çaw bew çawî nezanî û serinc dizra em bal bew balî nezanî û firîn dizra sarumare Sarumare em dîrokî deselatî serzemîne û bonî demî dirokanî em rojgare! Leser cadey seholeke rawestawim Belam dilim wa le naw miştî 'ba'yeka Hêwaş hêwaş le goyjewe dête xwarê û Sûtûy cestey jinêk dênê û Leber lûtî nîştîmana fûyek le sûtuweke eka û Înca elê Yadgarê bo serwerît Her westawim û Belam rohim xoy be talî baranêka helwasîwe Her le taleqjî daykim û Xuşkekanim û Le neslî mûy payzêkî bêwejnî kolanekey ême eçê Rawestawim Belam çawim kewtote naw ew camewe Ke jinêkî derwezeker leber pêy xoya dînawe û Nawbenawê ziringeyêk le naw cameka helesê û Lêreyşewe legel ewa çawî minîş da’eçlekê Şew baş! Şew baş! min nawim kirasî jinaneye ewey nîştîman pêy şerme bîkate berî xoy minim! em mêjûy nêre em nîştîmanî simêle tenha carê minî nekirde ber hetawê Ber coge awê ber şûşe gulawê ewaney minyan le ber kird: gisk bûn û mencel bûn û tenekey xol ewaney minyan kirde ber: bejnî dirêjî xerîbî û bejnî tenyayî û azar bûn ewaney minî pê bexşîn her bêdengî û qifil û têla û şirîxekanî qamçî û cil û bergî derdedar bûn min nawim kirasî jinaneye ewey agay le min nebê û gwêy le hawarî min nebê gwêçkey tepî nîştîmane! min mêynem! min serapa hemû cestem le gunah û pirsyarî rûtî heram pêkhatuwe! le yekem rojî bûnmewe berdî recim le qumatmewe pêçrawe û nîştîman tifim lê ekat! Leser cadey seholeke rawestawim Leprêka nîştîman be xoy û kilawî alakeyewe Be xoy û rêklamî rîş û simêl û Armî poprey nêrêtîyewe Be xoy û medalyay pirhereşey ser singîyewe Be xoy û şimşêrekey 'ey reqîb'ewe Be perî gîv û mexrûrî tawsîyewe Komelê çekdarî çawzeq çawzeq le piştîyewe Sing derperîw Dête lam û be dû pence tewqeyêkim legel ekat û Des eka be erşîvî fexir lê nîştûy baxelya Sî-dî sirûdêkî tazey em rojgareym edatê Înca zerdexenêyêk le corî zerdexeney misînî deskird eygirê wek pêm bilê Min nîştîmanî taqaney hemû dinyam Ewsa erwa û becêm dêlê Em katew baş! minîş hatûm Min cwanûyekî bêkarim xelkî kerkûkim kurî newt û gazim û kurî ew hemû borî û çalane belam ewey be rêkewtîş neyanbînim ew bawkanen leber ewey berdewamîş esûrêmewe le hemû kesêkî dî zyatir nîştîman ebînim belam cexar hemû hîle û kurjinekanim be ba çûn û hemû simkolekanim gergesan bûn û em nîştîmane pîroze gwêy lêm nebû reşebayş witî Ew hemû givegve û her gwêy negirt Çexmaxe witî Ew hemû birûske û dagîrsan û dirjanane û her gwêy negirt Baxçe witî, şeqam witî, bazar witî Qelem û defter û kîlge û lêrewar û Teyr û twal û ajel û ew hemû pelkegya û gela û Mêrûle û qelebaçke reşpoş û Kerwêşkî hetîw û Ew hemû wişe xemgîn û Ew hemû payîze bêwejnane Be dem zirîke û qîjewe hawaryan kird Belam em nîştîman pîroze her gwêy negirt Hawar xoy witî ewe çen sale Le nûzey minalîmewe Heta êsta demim nawe be gwêçke pan û porekanî em nîştîmane serzilewe Ewe çen sale em hemû gelarêzane û em hemû dest û pencerêzane û em hemû nîgarêzane yek le dway yek rewaney naw gwêçkekanî ew ekem Hemûyan eron û Belam kesyan nagerênewe Nazanim lew gwêçkaneda çîyan beser dê Kê ebînin!? Egene kwê!? Nazanim Leser cadey seholeke rawestawim Sî-dîye tazekey nîştîman be desmewe û 'ba'yek be çirpe pêm elê Ke nîştîman îşî pêt nebû xoy dê bo lat Her ew kateyş zerdexene eygirêt û dête pêş û maçit eka Wextê ke îşî pêt nema Eger xudaş le beyna bê û tikakar bê Nayê bo lat To nîştîman em sirûde çî lê bikem Eger hênawte bo ewey wek hemûcar Le cêgey nan qisey sewz û sûrim batê Bîberewe Ba şax û dax gwêy lê bigrê Eger hênawte bo ewey le batîy mal Le birî kar, le cêy jin Belênî bê qaçim batê Bîberewe ba kursîyekanî perleman gwêy lê bigirin Merheba gyane merheba! min nawim kursîye kes neyzanê min eyzanim em hemû çeqoy xedrane em hemû cogey xwênane em hemû maskî dizîyane em hemû rejûy riqane leser mine! leser danîştinî ser min ekirên! belam nalên kesyan nalên leser mine! hemû elên leber çaw û balay cwanî azadîye! leser şîrî sawayane leber awe leser nane leser gule û leber hêlaney çoleke û leser şalawî nawextî gelegurgî dewr û bere belam nalên kesyan nalên leser mine û leber mine! kelawey qutabxaneyêk hawarî kird: çendîn werze nanî belên be hengiwînî xeyalewe exoyn çendîn sale diruşim û şî’ir û bangeşe û peyrewî nawxo û bername û sirûdî taze û kon exoyn! şeqamêkî mandûyş witî: "be dengî pêy rêbwarana Sikî xalî û sikî têrî em zemane le yektir cwê ekemewe dengî qaçî sikî xalî be hal egate gwêçkem û Dengî qaçî sikî têrîş hênde qursin emlerzênin!" tenekey berdemî dergay male qurê Witî şewêk tenha be yek pijmînî xwa îtir min çûm be asmana û nehatmewe û Lew şewewe heta êsta min be dewrî serzemîna exulêmewe! bermîlî berdemî dergay telaremalêkîş witî: her be tenha paşmawekem hênde qurse Be gerekêkî birsêtî helnagîrê! Birsêtît baş! Min nawim 'nan'e Lew şwêney zorim pê’ekenim û Lew şwêney kemim egrîm Min û hewa û aw û azadî û cwanî Komelê xuşk û birayn Hemûman le yek dayk û bawkîn Bawkiman xake û serzemîne û Û daykiman jyan Min êsta le zor şwênî em serzemîneda bêkesim û be kul egrîm Belam hemû carêk 'ba'yêkî genc lay azadîyewe dêt û Dest ekate milim û maçim ekat û pêm elê Xem mexo herwa tenya nabît Xem mexo minit hem Min îste lêre hemîşe le pirse dam Pirsey gulegenim Pirsey aw Pirsey daristan Welê hemûcarêkîş Hetawêkî rasparde le lay ayndewe dêt û Des ekate milim û dilnewayîm ekat û Pêm elê xem mexo herwa ta hewa tarîk bû lêwbebar nabî Xem mexo minit hem Le malewe rojê sifrekeman witî: "le nêw êmeşa bextekan le yektir cyan! tyamanaye û gelê zorin ew sifraney hetîwbar û bêwejnin û tenha carêk 'serî xoyan' nedîwe pir bê le qapî sik bextewer!" bîrim naye nanêkî min le dilewe pêkenî bê û kewçkêkim witbêtî: "wa têrim xward!" Leser cadey seholeke rawestawim Serinc le sî-dîyeke eyem Leser bergekey nîştîman xoy ebînim Le berdem şaxêkî berza rawestawe Wekû şepqe hewrêkî kirduwete serî û Pê’ekenê û be dû penceyş nîşaney 'v(v)' dirûst eka û Be fîzewe nîşanî xwa û xelkî eda