Awat Bokanî
نازەنین ئەو نامەیەم جیاوازە بۆت تا بە کەی دوورم دەکەی ئاوا لە خۆت ئەشکی چاوە و خوێنی دڵ خامەم نییە نازەنین لەو شێوەیە نامەم نییە نامە نا، هاوار و داد و ناڵەیە شەرحی حاڵی ئەم ژیانە تاڵەیە جاروبار تەنیا کە بووی بیخوێنەوە هەر نەبێ ئاوام وە بیر خۆ بێنەوە یاد بکە یادێ لە ڕابردوو لە من یادی ئەو ڕۆژانە هەرچەند بێ کەمن یادی ئەو داماوە بێ فێڵ و درۆ یەک دڵی پڕ خۆشەویستی دا بە تۆ بۆ دەڕۆی بۆ مانەوەت چیت لێم دەوێ چی دەڵێی ڕازیم ئەمن هەر نامەوێ هەرچی کردم تا لە عەشقم تێبگەی داخەکەم تۆ سازی خۆت هەر لێدەدەی ئەو ئەوینەی خۆت لە من مەستێنەوە هەر نەبێ ئەو جارەشم هەستێنەوە خۆشە ئەم جارە بکەی یادێ لە من گەر بپرسی گیانەکەم دادێ لە من شاد دەبم بەو ڕۆحە پڕ ئازارەوە بەم دەروونە پڕ لە تین و نارەوە یەک هەناسەم پێ بدە زیندووم کەوە گیانەکەم مردووم وەرە گیانم دەوە بێکەسیم دیوە بە حاڵی خۆمەوە ئاشنا دەدوێن بە تانە و لۆمەوە خۆم لە خۆم نامۆ و لە خۆشمدا ونم نازەنین نامۆ و غەریبی شار منم بێکەسی وەک من نییە لەو بارەوە باوەشت ئەمنە لەوێ بمشارەوە کز لە گۆشەی بێکەسی هەر ناڵەمە یادی تۆ هاوڕێی هەزاران ساڵەمە ئەو دەمەی یادت دەکەم سەرخۆش دەبم دێمە نێو باوەشتەوە بێهۆش دەبم لێوی ویشکم گەر بە ماچێ تەڕ بکەی باشترە تاکوو لەگەڵما شەڕ بکەی هەست دەکەم بوونم بە بوونت بەستەیە بوونی تۆ شعر و مەقام و ڕستەیە تۆ نەبی دنیا لە من وێرانەیە خزم و خێش پاکی لە من بێگانەیە هاتنت جێژن و سروود و شادییە سەربەخۆبوونە گوڵم ئازادییە با بپێوین کۆنەڕێی شازی ئەوین لێ بدەین بۆ مانەوە سازی ئەوین چی وشەی ناسک لە نێو مێشکم هەیە چی شیاوی خۆشەویستیی ئێمەیە گوڵ ببارێنن بە دێر و بەستەوە ناوی تۆ گوڵ بێ لە نێو هەڵبەستەوە خۆت بخە نێو باوشم، سارد و سڕم با بە تینی خۆشەویستیت گڕ گرم
Nazenîn ew nameyem cyawaze bot Ta be key dûrim dekey awa le xot Eşkî çawe û xwênî dil xamem nîye Nazenîn lew şêweye namem nîye Name na, hawar û dad û naleye Şerhî halî em jyane taleye Carubar tenya ke bûy bîxwênewe Her nebê awam we bîr xo bênewe Yad bike yadê le rabirdû le min Yadî ew rojane herçend bê kemin Yadî ew damawe bê fêl û diro Yek dilî pir xoşewîstî da be to Bo deroy bo manewet çît lêm dewê Çî delêy razîm emin her namewê Herçî kirdim ta le ’eşqim têbgey Daxekem to sazî xot her lêdedey Ew ewîney xot le min mestênewe Her nebê ew careşim hestênewe Xoşe em care bikey yadê le min Ger bipirsî gyanekem dadê le min Şad debim bew rohe pir azarewe Bem derûne pir le tîn û narewe Yek henasem pê bide zîndûm kewe Gyanekem mirdûm were gyanim dewe Bêkesîm dîwe be halî xomewe Aşna dedwên be tane û lomewe Xom le xom namo û le xoşmida winim Nazenîn namo û xerîbî şar minim Bêkesî wek min nîye lew barewe Baweşt emne lewê bimşarewe Kiz le goşey bêkesî her naleme Yadî to hawrêy hezaran saleme Ew demey yadit dekem serxoş debim Dême nêw baweştewe bêhoş debim Lêwî wîşkim ger be maçê ter bikey Baştire takû legelma şer bikey Hest dekem bûnim be bûnit besteye Bûnî to şi’ir û meqam û risteye To nebî dinya le min wêraneye Xizim û xêş pakî le min bêganeye Hatinit cêjin û sirûd û şadîye Serbexobûne gulim azadîye Ba bipêwîn konerêy şazî ewîn Lê bideyn bo manewe sazî ewîn Çî wişey nask le nêw mêşkim heye Çî şyawî xoşewîstîy êmeye Gul bibarênin be dêr û bestewe Nawî to gul bê le nêw helbestewe Xot bixe nêw bawşim, sard û sirim Ba be tînî xoşewîstît gir girim