Şêrko Bêkes
لە ماڵەوەم ئەمەوێ ئەمشەو تەنیایی پاڵ پێوە نێم تا بچمە دەرەوە منیش بۆ خۆم ئازادانە لەو ڕەقیبە مل باریک و چاو زۆر زەقە دوور کەومەوە زۆر ئاسانە تەلەڤیزیۆنەکە ئەکەمەوەو هەڵپەڕکێ و دەهوڵ و زورنا ئەدۆزمەوە ئەمەش گەڕانێکی کەمی ئەوێ و وەختێ ئەزانی هەر زوڕنا و هەر دەهۆڵە و هەموو هاتوونە ماڵەوە و تەنیایی گوێچکەی کەڕ ئەبێ و مەجبوورە ڕاکاتە دەرێ هەرواشم کرد تەلەڤیزیۆنم کردەوە کیژی بێژەر دەم و چاو خڕ وەک گۆی زەوی قژێکی ورد هەر بە قەدەر کورتە هەواڵ قسەی خێرا وەک ڕۆیشتنی دێڕەکانی بنی شاشە بلووزێکی پڕتەقاڵی سەر پرتەقاڵ نەمزانی بۆ دەستێکم برد بۆ پرتەقاڵی سەر مێز و بۆنێکم کرد دەنگێکی خۆش ئەتوت گوێچکەم بووە بە لووت بۆنی وەنەوشەی دەنگیم کرد ژنی بێژەر گەیشتبووە سەر شەقامی دوا دێڕی ناو هەواڵەکان، پرتەقاڵی بێژەر وتی: ئەم ئێوارەیە «زەمین لەرزەیەک» بە پلەی شەش لەسەر پێوانەکەی ڕێختەر، دای لە بەشی سەرووی «یابان»، تووڕە بووم و هاوارم کرد: زەمین لەرزەی چی ژنەکە؟ زەمین لەرزەی چی پرتەقاڵ؟ بوومەلەرزە... بوومەلەرزە ئەم زمانەیش هەموو جارێ بەر بوومەلەرزە ئەکەوێ و بە پێوانەی... تۆفیق وەهبی و بە پێوانەی هێمن ... هەژار... شەوێک نییە لە دوو سێ لاوە ... نەڕووخێ. هاوارم کرد ...ئەی پرتەقاڵ، مەڵێ «یابان»...بڵێ «ژاپۆن»... ژاپۆن وەکو وڵات ئەم زمانەیش چی بەسەر هات؟! لەداخاندا ... تەلەفزیۆن ئەکوژێنمەوە، دیسان تەنیایی دێتەوە و بەرامبەرم دائەنیشێ.
Le malewem Emewê emşew tenyayî pal pêwe nêm Ta biçme derewe Minîş bo xom azadane Lew reqîbe mil barîk û çaw zor zeqe Dûr kewmewe Zor asane Televîzyoneke ekemewew Helperkê û dehul û zurna edozmewe Emeş geranêkî kemî ewê û Wextê ezanî her zurna û her dehole û Hemû hatûne malewe û Tenyayî gwêçkey ker ebê û Mecbûre rakate derê Herwaşim kird Televîzyonim kirdewe Kîjî bêjer Dem û çaw xir Wek goy zewî Qijêkî wird Her be qeder kurte hewal Qisey xêra Wek royştinî dêrekanî binî şaşe Bilûzêkî pirteqalî Ser pirteqal Nemzanî bo destêkim bird bo pirteqalî ser mêz û Bonêkim kird Dengêkî xoş Etut gwêçkem Buwe be lût Bonî wenewşey dengîm kird Jinî bêjer geyştibuwe ser şeqamî Dwa dêrî naw hewalekan, Pirteqalî bêjer witî: Em êwareye «zemîn lerzeyek» Be piley şeş leser pêwanekey rêxter, Day le beşî serûy «yaban», Tûre bûm û hawarim kird: Zemîn lerzey çî jineke? Zemîn lerzey çî pirteqal? Bûmelerze... bûmelerze Em zimaneyş hemû carê Ber bûmelerze ekewê û Be pêwaney... tofîq wehbî û Be pêwaney hêmin ... hejar... Şewêk nîye Le dû sê lawe ... nerûxê. Hawarim kird ...ey pirteqal, Melê «yaban»...bilê «japon»... japon Weku wilat Em zimaneyş çî beser hat?! Ledaxanda ... telefzyon ekujênmewe, Dîsan tenyayî dêtewe û beramberim da’enîşê.