Nasir Rezazî
ساقییا! وا بادەوە، وا بادەوە ڕوو لە لای من کە بە جامی بادەوە موشتەری وەک من لە مەیخانێ کەمن زۆربەیان شاد و بەکەیف و بێ خەمن مەی حەرامە بۆ سەهەندە و بێ خەمان مەستی بێ خەم بۆ چی بگرن ئێخەمان؟ ئەم شەرابە تاڵە بۆ دەرد و خەمە لێی حەرام بێ ئەو کەسەی دەردی کەمە ئەم شەرابە ئاڵە بۆ بێ دەرد نییە لێی حەرام بێ ئەو کەسەی ڕەنگ زەرد نییە بۆ کەسێکە مەی: کە دەردی کارییە بێ خەمێک بیخواتەوە، زۆردارییە بۆ کەسێکە مەی: دڵی پڕ بێ لە داخ بۆ چی لێی بخواتەوە بەرزە دەماخ؟ ئەو کەسەی بێ کەس نییە و خانە خەراب دەک بە ژەهری ماری بێ بادە و شەراب ساقییا، وا وەرگەڕێ، وا وەرگەڕێ ڕوو لە لای من کە، مەچۆ بۆ سەرپەڕێ لەنگەرێ بگرە، مەبە وا بەرزەفڕ بێنە بۆ من، بێنە بۆ من، جامێ پڕ مەی حەڵاڵە بۆ منی وێرانەماڵ بۆ منی سەرگەشتەو و ڕووت و ڕەجاڵ بۆ منی بابردەڵەی گردەنشین بۆ منی دڵ پڕ لە ناسۆر و برین بۆ منی ئاوارەو و دوورە وەتەن بولبولی بێ بەش لە گوڵزار و چەمەن ساقییا! بۆ کوێ دەچی، بۆ کوێ دەچی؟ تۆش لەبەر ئەو ملهوڕانە ملکەچی؟ تۆش بە ڕەنگ و بۆی ئەوان خواردت فریو؟ چاوی تۆشی هەڵفریواند زێڕ و زیو؟ چڵکی دەستە ماڵی دنیا وەک دەڵێن ماڵپەرست پەیمان شکێنە و بێ بەڵێن قەدری جوانی کوا دەزانێ ماڵپەرست جوانپەرستە پیری خاوەن زەوق و هەست
Saqîya! wa badewe, wa badewe Rû le lay min ke be camî badewe Muşterî wek min le meyxanê kemin Zorbeyan şadû bekeyfû bê xemin Mey herame bo sehendew bê xeman Mestî bê xem bo çî bigirin êxeman? Em şerabe tale bo derdû xeme Lêy heram bê ew kesey derdî keme Em şerabe ale bo bê derd nîye Lêy heram bê ew kesey reng zerd nîye Bo kesêke mey: ke derdî karîye Bê xemêk bîxwatewe, zordarîye Bo kesêke mey: dilî pir bê le dax Bo çî lêy bixiwatewe berze demax? Ew kesey bê kes nîyew xane xerab Dek be jehrî marî bê badew şerab Saqîya, wa wergerê, wa wergerê Rû le lay min ke, meço bo serperê Lengerê bigre, mebe wa berzefir Bêne bo min, bêne bo min, camê pir Mey helale bo minî wêranemal Bo minî sergeştewû rûtû recal Bo minî babirdeley girdenşîn Bo minî dil pir le nasorû birîn Bo minî awarewû dûre weten Bulbulî bê beş le gulzarû çemen Saqîya! bo kwê deçî, bo kwê deçî? Toş leber ew milhurane milkeçî? Toş be rengû boy ewan xwardit firîw? Çawî toşî helfirîwand zêrû zîw? Çilkî deste malî dinya wek delên Malperist peyman şikênew bê belên Qedrî cwanî kwa dezanê malperist Cwanperiste pîrî xawen zewqû hest