عەبدوڵڵا پەشێو
من چ لەو هەموو فایلانە بکەم؟ ڕوو لە هەر کوێ کەم هەر فایلستانە! ئاخ بۆ لەمپاکەی عەلائەدین ئاخ دەرگەی داخراوی فایلگەکانی شەشدەری دنیام بۆ بکاتەوە. ئاخ بۆ لەشکرێک دایانتەکێنێ و پەڕ لەدوای پەڕیان هەڵبداتەوە! هیچم ناوێ نە لەشکر و نە لەمپاکەی عەلائەدین. دانیشتووم و جامی جەمم بەرامبەرە! سەیری شاشەی دنیا دەکەم دەبینم ڕۆژی مەحشەرە: هەر فایلە و بە فایلدا هەڵدەمیزێ هەر فایلە و فایلۆکەیەک ڕادەژەنێ فایل فایل دەرمان دەکا فایل بمرێ فایل پرسەی بۆ دادەنێ. وا دەبینم فایلێک لەملا قەڵەمەکەی تیژ دەکات و گۆڕ بۆ فایلێک هەڵدەکەنێ لەولا تریش فایلی جامڕەش بە یەک ئۆردووی حیمایەوە بە دراوسێیە جامڕوونەکان پێدەکەنێ. ئەمیان لێرە وەک مریشکێک کڕ کەوتووە پەیتا پەیتا هێلکەفایل دەترووکێنێ ئەویان لەولا بەدیار سفرەی فایلێکەوە وەک گوجیلە بۆ ئێسقانێک دەقرووسکێنێ. هۆ لەولاوە فایلە پۆپنەکانی بەغدا دێن و دەتسن بە فایلەکانی تاراندا. لە ئەنقەرەش فایلە پۆشتە و پەرداخەکان چەتەر بۆ هی شام هەڵدەدەن لە گەرمەی فایلباراندا. جامی جەمم بەرامبەرە! دەیانبینم: لەبن سەنگی فایلەکانی موعاوییە و شاعەباس و سوڵتان سەلیم لاقیان گێڕە دەستیان گۆجە ئەستۆیان خوار... پێتان دەڵێم: بێفایدەیە تیشک و سۆنەر بێفایدەیە ڕاچێتە و داودەرمان بە بار ئەوان بە هیچ ڕاست نابنەوە مەگەر تابووت ئووتوویان کا و ڕاست ببنەوە وەک ئەسپیندار!
Min çi lew hemû faylane bikem? Rû le her kwê kem her faylistane! Ax bo lempakey ’ela’edîn ax Dergey daxrawî faylgekanî şeşderî dinyam bo bikatewe. Ax bo leşkirêk dayantekênêw per ledway peryan helbidatewe! Hîçim nawê Ne leşkrû ne lempakey ’ela’edîn. Danîştûmû camî cemim berambere! Seyrî şaşey dinya dekem Debînim rojî mehşere: Her faylew be faylda heldemîzê Her faylew faylokeyek radejenê Fayl fayl derman deka Fayl bimrê Fayl pirsey bo dadenê. Wa debînim Faylêk lemla qelemekey tîj dekatû gor bo faylêk heldekenê Lewla tirîş faylî camreş be yek ordûy hîmayewe Be dirawsêye camrûnekan pêdekenê. Emyan lêre Wek mirîşkêk kir kewtuwe Peyta peyta Hêlkefayl detrûkênê Ewyan lewla Bedyar sifrey faylêkewe Wek gucîle Bo êsqanêk deqrûskênê. Ho lewlawe Fayle popnekanî bexda Dênû detsin be faylekanî taranda. Le enqereş Fayle poştew perdaxekan Çeter bo hî şam heldeden Le germey faylbaranda. Camî cemim berambere! Deyanbînim: Lebin sengî faylekanî Mu’awîyew şa’ebasû sultan selîm Laqyan gêre Destyan goce Estoyan xwar... Pêtan delêm: Bêfaydeye tîşkû soner Bêfaydeye Raçêtew dawderman be bar Ewan be hîç rast nabnewe Meger tabût ûtûyan kaw Rast bibnewe wek espîndar!