شۆڕش مەحموودی
ڤێ فرقەتێ ئەبتەر کرین فەریاد ژ دەستێ فرقەتێ ژار و زەئیف و زەر کرین فەریاد ژ دەستێ فرقەتێ پور زەر کرین وەک زێر مام چاڤێن ب لوتفێ پیر مام دائیم ژ رێ چاڤنێر مام فەریاد ژ دەستێ فرقەتێ چاڤنێرێ رەفتارا تە بووم موشتاقێ گولزارا تە بووم لەو دوور ژ دیدارا تە بووم فەریاد ژ دەستێ فرقەتێ دوور بووم ژ وێ رەفت و چوونێ، وان ئشوەیان گوفت و کەنێ نایێ ب چاڤان من دنێ فەریاد ژ دەستێ فرقەتێ دونیا ب من مژ بوو خومام خەو ژی ل چاڤان بوو حەرام عومرەک ب ڤی حالێ هە مام فەریاد ژ دەستێ فرقەتێ ساعەت ل من تێک سال بوون دائیم ل سەر دەست فال بوون هەرفێن دهاتن «دال» بوون فەریاد ژ دەستێ فرقەتێ ئیرۆ تنێ دەرهات «ئەلیف» مەعنا دچوو بەژنا شەریف یا خارە لێ کێمخە و قەدیف فەریاد ژ دەستێ فرقەتێ ڤێ فرقەتێ پور دل شەواند جەرحێن قەدیم دیسا کەواند شیشێن د سۆر تێدا تەواند فەریاد ژ دەستێ فرقەتێ داخێن مە دیسا رەش کرن یەک یەک ژ نوو ئاتەش کرن لێ زێدە پەنج و شەش کرن فەریاد ژ دەستێ فرقەتێ سەودا و سەوس و گێژ کرم پور هەر د دل خوونڕێژ کرم چەندان وە بووم لێ هێژ کرم فەریاد ژ دەستێ فرقەتێ بللاهـ ژ نالە و زاریان گەزمێن د وان خومماریان خەو ناکرن شەڤتاریان فەریاد ژ دەستێ فرقەتێ شەڤ بوو دنێ چەشمێ مە دا حەتتا بەشیر مزگین دا دێ بێ سەحەر شاهێ گەدا فەریاد ژ دەستێ فرقەتێ مزگین کو دا من ئەڤ قەدەر رووحا شیرین من هاتە دەر خەیلەک ل من رۆن بوون بەسەر فەریاد ژ دەستێ فرقەتێ رۆن بوو ب دیدارا تە دل بوو خەرقێ ئەنوارێ تە دل نارەت ژ فەروارێ تە دل فەریاد ژ دەستێ فرقەتێ مننەت مە دلدارێ خوە دی دیسا ژ نوو یارێ خوە دی سولتان و خووندکارێ خوە دی فەریاد ژ دەستێ فرقەتێ رەشکاکولێ سونبول چەڤین مننەت مە دیسا خەم رەڤین نوو بوو ل دل حوبب و ئەڤین فەریاد ژ دەستێ فرقەتێ دەردێ خەدار بێم فرقەتە فرقەت ژ جان پور زەحمەتە یا سەهل کو ئاشق رهـ دتە فەریاد ژ دەستێ فرقەتێ نارێ فیراق و سۆهتنێ ئێشا خەدەنگا نوهتنێ پرس کن ژ عوششاقان تنێ فەریاد ژ دەستێ فرقەتێ ئاشق ئەون هەر دەم مرن چەند یەک د ڕەمزێن دلبەرن کەیبەر ل دل من بێهترن فەریاد ژ دەستێ فرقەتێ شەوقا ب ڕەمز و ئاورن ئاشق هەر ڕۆ جارەک مرن ل وەکوو ئەور هەر دگرن فەریاد ژ دەستێ فرقەتێ یا رەب ب دیدارێ خوە کی من واسلێ یارێ خوە کی بەس سۆهتییێ نارێ خوە کی فەریاد ژ دەستێ فرقەتێ مە ژ دۆستێ ساتەک دوور نەکی پەرکەندە و مەهجوور نەکی دیسا ژ نوو دل هوور نەکی فەریاد ژ دەستێ فرقەتێ کەیبر دهاتن سەد وەلێ هاتیە نێڤ ئەحمەد دلێ لەو کوشتنا سەد وەک مەلێ فەریاد ژ دەستێ فرقەتێ خاکا ریا دلبەر مەلا بکشین د چاڤان وەک جەلا دیدارێ قسمەت بوو هەلا فەریاد ژ دەستێ فرقەتێ
Vê firqetê ebter kirîn feryad ji destê firqetê Jar û zeîf û zer kirîn feryad ji destê firqetê Pur zer kirîn wek zêri mam çavên bi lutfê pîri mam Daîm ji rê çavnêr mam feryad ji destê firqetê Çavnêrê reftara te bûm muştaqê gulzara te bûm Lew dûr ji dîdara te bûm feryad ji destê firqetê Dûr bûm ji wê reft û çûnê, wan ‘işweyan guft û kenê Nayê bi çavan min dinê feryad ji destê firqetê Dunya bi min mij bû xumam xew jî li çavan bû heram Umrek bi vî halê he mam feryad ji destê firqetê Sa‘et li min têk sali bûn daîm li ser dest fali bûn Herfên dihatin “dal”i bûn feryad ji destê firqetê Îro tinê derhat “elîf” me‘na diçû bejna şerîf Ya xar e lê kêmxe’w qedîf feryad ji destê firqetê Vê firqetê pur dil şewand cerhên qedîm dîsa kewand Şîşên di sor tê da tewand feryad ji destê firqetê Daxên me dîsa reş kirin yek yek ji nû ateş kirin Lê zêde penc û şeş kirin feryad ji destê firqetê Sewda û sews û gêj kirim pur her di dil xwûn rêj kirim Çendan we bûm lê hêj kirim feryad ji destê firqetê Billah ji nale û zariyan gezmên di wan xummariyan Xew nakirin şevtariyan feryad ji destê firqetê Şev bû dinê çeşmê me da hetta beşîr mizgîn da Dê bê seher şahê geda feryad ji destê firqetê Mizgîn ku da min ev qeder rûha şîrîn min hate der Xeylek li min ron bûn beser feryad ji destê firqetê Ron bû bi dîdara te dil bû xerqê enwarê te dil Naret ji ferwarê te dil feryad ji destê firqetê Minnet me dildarê xwe dî dîsa ji nû yarê xwe dî Sultan û xwundkarê xwe dî feryad ji destê firqetê Reşkakulê sunbul çevîn minnet me dîsa xem revîn Nû bû li dil hubb û evîn feryad ji destê firqetê Derdê xedar bêm firqet e firqet ji can pur zehmet e Ya sehl ku ‘aşiq rih dite feryad ji destê firqetê Narê fîraq û sohtinê êşa xedenga nuhtinê Pirs kin ji ‘uşşaqan tinê feryad ji destê firqetê ‘Aşiq ew in her dem mirin çend yek di remzên dilber in Keyber li dil min bêhtir in feryad ji destê firqetê Şewqa bi remz û awir in aşiq her ro carek mirin Li wekû ewr her digirin feryad ji destê firqetê Ya Reb bi dîdarê xwe kî min wasilê yarê xwe kî Bes sohtîyê narê xwe kî feryad ji destê firqetê Me j’dostê satek dûr nekî perkende û mehcûr nekî Dîsa ji nû dil hûr nekî feryad ji destê firqetê Keybir dihatin sed welê hatiye nêv ehmed dilê Lew kuştina sed wek melê feryad ji destê firqetê Xaka riya dilber Mela bikşîn di çavan wek cela Dîdarê qismet bû hela feryad ji destê firqetê