ئەی نائومێدی ئەی نائومێدی
ئەی ڕەنجەڕۆیی و دڵ نائومێدی
بەدبەختی وەک من توخوا سا کێ دی
دەردی مەجنوونیم هێناوەتە دی
هەر لە نەجدەوە تا هەردانی دوجەیل
بۆ لەیل ئەگەڕام دەروون لە غەم کەیل
هاتمە بێستوون لای قەسری شیرین
بۆ فەرهاد گریام بە دڵەی نمین
نەکەرۆز گەڕام وادی بە وادی
شوێنی هەوارگەی ئێلی مرادی
شیو و هەرد و بەرد تا لووتکەی بەرزان
گشت وەیشوومە پڕ گەڵاڕێزان
لە دەربەندیخان چوومە کەلیخان
ئەو ناوە یەکسەر شێواوە و وێران
بە جەوری فەلەک یەکسەر وێرانە
بایەقوش تێیدا گرتوویە لانە
پرسیم بایەقوش دۆستی هاودەردم
لە جیهان بێزار یاری چۆڵگەردم
بۆچی وا چۆڵە ئەم مەرز و بوومە
لە کوێ پەیدا بوو وەیشوومەی شوومە
جوابی دامەوە بە قوڵپەی گریان
منیش وا جەرگم بووە بە بریان
ئیمساڵ بەهارمان کە بێ بارانە
گوڵاڵەی سوورمان جەرگی یارانە
لە هەر سێ لاوە شاییە بەڕیزە
خەنەبەندانیان خوێنی ئازیزە