Jalal Malaksha
دانامرکێ هەتا دڵی هەر زیاد ئەکا گڕ و گڵپەی ڕۆحی یاخی بووی ئەشقیام! ڕامەوەستە، بڕو لە لام با تاوانی من تۆش نەگرێ کەوتوومە بەر تووکە شەقی چارەنووس و وەک گۆیەکەی سەرگەردانی گۆڕەپانی نەفرەتی خوام! ژیانم لێ وەڕەز بووە زەوی لە ژێر گرانی لەشما ئەناڵێنێ چاوی ڕۆژ لە حاند سیمای من هەڵنایێ من چۆلەکەی باڵشکاوی وەرزی ڕەشی گەردەلوولم ڕۆحم لەگەڵ ئارامشدا، لە زەوی تا ئاسمان دوورە... دڵم پڕە لە هاوار و گوێچکەی گەردوون لە بەرامبەر پاڕانەوەم کپ و کەڕە لێم نابیسێ سکاڵایێ ئاسمانی من نزم و نەوی سەرم تا بن میچی دەگا هەورێکی ڕەش سەر تا پامی داپۆشیوە ئاسۆ تا ئاسۆ تاریکە تەنیا ڕێگەی بەر هەنگاوم لە خۆمەوە دەست پێدەکا و دەگا بە هەڵدێری ڕۆحم چ ئاستەنگێکی باریکە ئاسۆ تا ئاسۆ تاریکە باران... باران، بارانی ڕەش دەبارێت و تەڕم دەکا و نامشواتەوە! لە ناو تۆف و کڕێوەی وەرزی شەختەبەندی تەمەندا ڕەق هەڵاتووم! بو کوێ دەڕۆم؟ نازانم لە کوێوە هاتووم؟ شێرەبەفرینەی دەستکەردی منداڵانی چارەنووسم ڕوژ وەک ئەژدیهای ئەفسانە لووشم دەکا و دەمخواتەوە! هەتا لوتکە چەندی ماوە؟ ئەی خوا گەورە و بچووکەکانی سەردەمی ویژدان تۆپیو "جولجوتا"ی من لەسەر دوندی کام کوێستانە بە ئەندازەی هەزار عیسای ناسری لە خاچ دراوم یەهووداکان لەو دیو پەرچینی ماچەوە بە ساکاری ڕۆحی ماندووم گاڵتە ئەکەن ئەی خوا گەورە و بچووکەکانی سەردەمی ویژدان تۆپیو هەتا لوتکە چەندی ماوە؟! مەهێڵن، مە... ئەمجارە کە گەیشتمە لوتکە، بەردی گیانم بەربێتەوە من نامەوێ ئەم زەوینە پڕ تاوانە لە ژێر پێما بخولێتەوە ئاخر مەگەر نازانن من ساڵگارێکە گاشە بەردەکەی «سیزف»م لە کۆڵ ناوە؟ هەتا لوتکە چەندی ماوە؟ ڕاستە، من بووم لە ئاگردانەکەی ئێوە ئاورم دزی بۆ مرۆڤ و لە مەشغەڵدانی ڕوحی خۆم تیشک و ڕووناکیم دابەش کرد گوناهم کرد! بۆیە ئێستا لە تاراوگەی هەڵەمووتم! ئاورەکەیان بەردایەوە لە گیانی خۆم تەماشام کەن، چۆن ئەسووتم؟ ڕزگارم کەن... لە چوار مێخەیان کێشاوم هەموو شەوێ بە ژاری ژین دەشتی گیانم ئاژین ئەکەن ئەم مۆتەکە سواری ڕۆحی ماندووم بووە و دانابەزێ! ئاسمان بێزوو بە خوێن ئەکا هەر داڵ ئەزێ! هەر داڵ دێن و جەرگم دەخۆن ئەم ئاسمانە هەر داڵ ئەزێ! هەر داڵ ئەزێ! ئاخۆ گوڵی شۆرانی لە کام کوێستانە؟ کوێستان نەما بەرد بە بەردی بەخوێنی خۆم نەشۆرمەوە! هەر دەڕۆم و ناگەم بە ئەو ناونیشانەی «شۆڕە خەزاڵ» بۆی داناوم! هەر ئەڕۆم و زام لە سەر زام لەسەر سینگ و دڵم دەڕوێ گوڵی هەزار هەزار عەزرەت لە کوێستانی دڵما پشکووت ڕێگەی گەڕانەوەش نییە پردەکانی پشتی سەرم گشت ڕووخاون هەوارەکەی «خاتوو خەزاڵ»یشیان کردە قەرەبرووت! هەتا لوتکە چەندی ماوە؟ ئەی خوا گەورە و بچووکەکانی سەردەمی ویژدان تۆپیو! هەتا لوتکە چەندی ماوە؟ ئەی من تا ئێستا چۆن ماوم؟!
Danamirkê Heta dilî her zyad eka Gir û gilpey rohî yaxî bûy eşqyam! Rameweste, biru le lam Ba tawanî min toş negrê Kewtûme ber tûke şeqî çarenûs û Wek goyekey sergerdanî gorepanî nefretî xwam! Jyanim lê werez buwe Zewî le jêr giranî leşma enalênê Çawî roj le hand sîmay min helnayê Min çolekey balişkawî werzî reşî gerdelûlim Rohim legel aramişda, Le zewî ta asman dûre... Dilim pire le hawar û gwêçkey gerdûn Le beramber paranewem kip û kere Lêm nabîsê sikalayê Asmanî min nizim û newî Serim ta bin mîçî dega Hewrêkî reş ser ta pamî dapoşîwe Aso ta aso tarîke Tenya rêgey ber hengawim Le xomewe dest pêdeka û Dega be heldêrî rohim Çi astengêkî barîke Aso ta aso tarîke Baran... baran, baranî reş Debarêt û terim deka û namşiwatewe! Le naw tof û kirêwey werzî şextebendî temenda Req helatûm! Bu kwê derom? Nazanim le kwêwe hatûm? Şêrebefrîney destikerdî mindalanî çarenûsim Ruj wek ejdîhay efsane Lûşim deka û demxiwatewe! Heta lutke çendî mawe? Ey xwa gewre û biçûkekanî serdemî wîjdan topîw "culcuta"y min leser dundî kam kwêstane Be endazey hezar ’îsay nasrî le xaç dirawim Yehûdakan lew dîw perçînî maçewe Be sakarî rohî mandûm galte eken Ey xwa gewre û biçûkekanî serdemî wîjdan topîw Heta lutke çendî mawe?! Mehêln, me... Emcare ke geyştime lutke, Berdî gyanim berbêtewe Min namewê em zewîne pir tawane le jêr pêma bixulêtewe Axir meger nazanin min Salgarêke gaşe berdekey «sîzif»m le kol nawe? Heta lutke çendî mawe? Raste, min bûm le agirdanekey êwe Awrim dizî bo mirov û Le meşxeldanî ruhî xom Tîşk û rûnakîm dabeş kird Gunahim kird! Boye êsta le tarawgey helemûtim! Awrekeyan berdayewe le gyanî xom Temaşam ken, çon esûtim? Rizgarim ken... Le çwar mêxeyan kêşawim Hemû şewê be jarî jîn Deştî gyanim ajîn eken Em moteke swarî rohî mandûm buwe û danabezê! Asman bêzû be xwên eka Her dal ezê! Her dal dên û cergim dexon Em asmane her dal ezê! Her dal ezê! Axo gulî şoranî le kam kwêstane? Kwêstan nema berd be berdî Bexwênî xom neşormewe! Her derom û nagem be ew nawnîşaney «şore xezal» boy danawim! Her erom û zam le ser zam Leser sîng û dilim derwê Gulî hezar hezar ’ezret Le kwêstanî dilma pişkût Rêgey geraneweş nîye Pirdekanî piştî serim gişt rûxawin Hewarekey «xatû xezal»yişyan kirde qerebrût! Heta lutke çendî mawe? Ey xwa gewre û biçûkekanî serdemî wîjdan topîw! Heta lutke çendî mawe? Ey min ta êsta çon mawim?!