Ebdula Peşêw
دە دابەزە، مایەسیریت هەڵتۆقیوە کورسی بنت کرم و کەڕووی هەڵهێناوە داگەڕێ لەو شانشینەی بە هەواوە وەکوو دوومەڵ لەسەر دڵمان هەڵیداوە دە دابەزە! تەماشا کە چۆن کەمتیارە دەرپێدڕ و قاسەبڕ و بە گۆشتی خاک مڕەکانت تێم ئاڵاون ببینە چۆن چنگ و کەڵبەی سیم و تەلبەند بەژنی دەشت و شانی شاخ و دەمی دۆڵیان هەڵدڕیوە دە بپرسە گوڵەگەنم بۆ تۆراوە کێ ساماڵی زەردەخەنەی هەڵبڕیوە! دە دابەزە! دە چاویلکەی ڕەش وەلانێ دەست لە ملی کورسی کەوە بۆری و تانکەر لە یاد بکە چاوقوچانێ! دڕ بە ئاڵقەی زوڕناژەن و لێپۆکان دە دە لڤینێ، دە تەکانێ بەس گوێ هەڵخە بۆ ئەوانەی چیا بە بای زگ تەخت دەکەن بۆق دەکەنە قارەمانێ زۆر نا جارێک کاروانی جامڕەشەکانت جێ بهێڵە و پێی پیرۆزت لەسەر زەوی جلشڕ دانێ بە جادەیەکدا گوزەر کە تاسەی تیا بێ بادەرەوە بۆ گەڕەکێ بۆ کۆڵانێ گوێ ڕادێرە بۆ وەڕینی موەللیدان بڕۆ سەیری قژڕنین و لەخۆدانێ دە لڤینێ، دە تەکانێ زۆر نا جارێک دێڕێک شیعر بورینگێنە دەست درێژ کە بۆ داستانێ پێمەڕەیەک لە خاک گیر کە خشتێک لەسەر خشتێک دانێ دە دابەزە دە چاویلکەی ڕەش وەلانێ وا تۆفانێک بەڕێوەیە چ تۆفانێ تۆفانی هەزارەزیلەی گەدەی برسی و مستەکۆڵەی ڕوو لە کورسی و ڕووی وەک خەزەڵی خەزانە تۆفانی کۆتەرەی دار و پەردووی زنج و پەڕ و باڵی هەڵوەریوی ڕەوەزانە تۆفانی کراسی ڕەش و گرمەی هەرەسی بێدەنگی و قرمەی دەرگەی قەفەزانە ئەو تۆفانەی من دەیبینم گوێچکەی نییە بۆی بخوێنی لینگی نییە سندمی کەی قاسەی نییە تێی بئاخنی ملی نییە لە داری دەی! چی لێ دەکەی؟ دە پێم بڵێ چی لێ دەکەی؟ تۆفانێکە و هەر مل دەنێ دەمی نییە تا بە پارووی بەرماوەی خۆت قەپاتی کەی! قوونی نییە تا بە کورسی کاغەزینت خەڵاتی کەی! دە دابەزە دە داگەڕێ دە چاویلکەی ڕەش وەلانێ وا تۆفانێک بەڕێوەیە من دەیبینم چ تۆفانێ!
De dabeze, mayesîrît heltoqîwe Kursî binit kirmû kerûy helhênawe Dagerê lew şanşîney be hewawe Wekû dûmel leser dilman helîdawe De dabeze! Temaşa ke çon kemtyare derpêdrû Qasebrû be goştî xak mirekanit têm alawin Bibîne çon çingû kelbey sîmû telbend Bejnî deştû şanî şaxû demî dolyan heldirîwe De bipirse gulegenim bo torawe Kê samalî zerdexeney helbirîwe! De dabeze! De çawîlkey reş welanê Dest le milî kursî kewe Borîw tanker le yad bike çawquçanê! Dir be alqey zurnajenû lêpokan de De livînê, de tekanê Bes gwê helxe bo ewaney Çya be bay zig text deken Boq dekene qaremanê Zor na carêk Karwanî camreşekanit cê bihêlew Pêy pîrozit leser zewî cilşir danê Be cadeyekda guzer ke tasey tya bê Baderewe bo gerekê bo kolanê Gwê radêre bo werînî mwellîdan Biro seyrî qijrinînû lexodanê De livînê, de tekanê Zor na carêk Dêrêk şî’ir burîngêne Dest dirêj ke bo dastanê Pêmereyek le xak gîr ke Xiştêk leser xiştêk danê De dabeze De çawîlkey reş welanê Wa tofanêk berêweye çi tofanê Tofanî hezarezîley Gedey birsîw mistekoley rû le kursîw Rûy wek xezelî xezane Tofanî koterey darû perdûy zincû Perû balî helwerîwî rewezane Tofanî kirasî reşû Girmey heresî bêdengîw Qirmey dergey qefezane Ew tofaney min deybînim Gwêçkey nîye boy bixiwênî Lîngî nîye sindimî key Qasey nîye têy bi’axnî Milî nîye le darî dey! Çî lê dekey? De pêm bilê çî lê dekey? Tofanêkew her mil denê Demî nîye ta be parûy bermawey xot qepatî key! Qûnî nîye ta be kursî kaxezînit xelatî key! De dabeze De dagerê De çawîlkey reş welanê Wa tofanêk berêweye min deybînim çi tofanê!